John 4
4
Jesus ma te maatua fafine o Samaria
1Nga Pharisee ku rorongo ko Jesus ku kkapi na kanoa fenua e faka ukuuku ma e tokarava sapa ma John. 2(Kae e tonu rei, ko Jesus maso koia sisiki faka uku ea koia pe koai; na kau fanonga fuarei koratou a nea ne fai fekau.) 3I te vasia o Jesus ne rongo kia taranga nei, koia ne poi kese arei ma Judea, o foki ki Galilee.
4I na ara e poi iei, koia ku fai ke poi i roto i Samaria. 5I Samaria koia ne au ki te taoni e ati ko Sychar, e si see mmao mai te tofi ne sori e Jacob ki tana tama ko Joseph. 6Te nupu o Jacob e tuu i kuraa. Ko Jesus ne manava ifo i te ara e roa, nofo ifo rei ki raro i vae nupu, i te vasia ku piri matea ki te avatea.
7Te maatua fafine faka Samaria ne au ke asu vai, ma ko Jesus ne muna atu kiei, “Sori mai mo vai ke kau inu.” 8(Na kau fanonga i te vasia ku oro ki roto taoni ke tauvi mai ko mo kai.)
9Tongoi atu rei te maatua fafine, “Ko kee te foi Jew, kae kuou te foi Samaria; ka ma fai faka fefea ko kee ke kaisi mai kia kuou ke inu?” (Natafito nga Jew si see inu kia faangongo ma e longi taanaki ma nga Samaria.)
10Tongoi atu rei ko Jesus, “Kae tera pe ko kee fuarei ke kee iroa ina pe nia ma Tupua e sori, ma pe koai raa e kaisi atu kia ko kee ke inu, ko kee ka kaisi kiei, koia ka soria atu kia ko kee te vai o te ora.”
11Muna atu rei te maatua fafine, “Maurunga ee, ka ko kee rei siei se asu vai ma au, ma te nupu e mmao ki raro. Ko kee ka sau mai rei mai fea ko te vai o te ora? 12Te nupu nei ne sori mai e tatou puna ko Jacob, tera koia ma na tama ma ana manu koratou kaatoa noko inu rei kiei. Ko kee naa pe e muna ko kee e sapa rei ma Jacob nakoia?!”
13Tongoi atu rei ko Jesus, “Koratou kaatoa e inu ki te vai nei ka fia inu fokia. 14Kae tera pe koai ma ka inu ki te vai ka sori atu ea kuou kiei, ka see fia inu fokia rei. Taku vai ka sori kiei, ka puna ia koia te vai maori ki te ora mau.”
15Muna atu rei te maatua fafine, “Maurunga ee, sori mai kia kuou ko te vai naa! Tera kuou ka se ma fai ke fia inu fokia, ma kuou ka see au kunei o utu vai.”
16Muna atu rei ko Jesus, “Poi o kafi ko tou matua oomai rei korua.”
17Tongoi mai rei te maatua fafine, “Kuou siei se matua mo oku.”
Muna atu rei ko Jesus, “E tonu a au ko kee e muna naa, ko kee siei se matua mo ou. 18Ku toka rima anga rei ou taangata ku avanga kiei, ka te tangata e fare taanaki korua naa siei tou matua; ta ko kee naa ku muna tonu mai rei.”
19Muna atu rei te maatua fafine, “Maurunga ee, kuou ku kau matea atu raa ko kee te ʻprophetʼ. 20Oku puna i Samaria e fakaturou ki Tupua i fongo te maunga nei kae kotou nga Jew e mmuna ko Jerusalem te ngangea kotatou e tau fangatasi ke tatou fakaturou ki Tupua.”
21Muna atu rei ko Jesus kia koia, “Te maatua fafine ee, fakatonu mai kia kuou, te vasia ka au, te kano fenua ka si see fakaturou ki te Mmana i fongo te maunga nei o pe i Jerusalem. 22Ko kotou nga Samaria se kotou iroa riaina rei pe koai kotou e fakaturou kiei, kae komatou nga Jew e matou iroa riaina rei pe koai komatou e fakaturou kiei, natafito te faka sao ranga e au mai nga Jew. 23Te vasia ka au, ma ku okotia rei i kunei, tera i te makeke o te Mauri o Tupua te fenua ka fakaturou ki te Mmana pe koia te maori, o aapai kia koia te fakaturou maori pe koia e fifia. 24Tupua te Mauri, ta i te makeke o na Mauri te fenua ka ma fai ke fakaturou kia koia pe koia e tonu maori rei.”
25Tera muna atu rei te maatua fafine kia Jesus, “Kuou e kau iroa te Ariki Fakaroro ka au. Vasia koia ka au iei, koia ka nai faka aria mai kia matou koa nea kaatoa.”
26Tongoi atu rei ko Jesus, “Kuou koia e araara atu kia ko kee nei.”
27I mo vasia ai, te kau fanonga o Jesus ku foki mai, kae koratou ku fereki tomao rei ko aratou mauri ku ratou maua ina atu koia e araara ki te maatua fafine, kae siei pe koai ia ratou ne muna atu ki te maatua fafine, “Nia ma au e fifia kiei?” pe ke feesiri atu kia Jesus pe sea na atamai koia e araara kiei.
28Te maatua fafine e tuku tana umu utu vai, foki arei o poi ki te taoni o faka ari ki te kano fenua i kuraa, 29“Oomai, o ono ki te tangata ku nai faka aria mai kia kuou a nea katoa noko fai ea kuou. Naa pe koia te Ariki Fakaroro?” 30Tera tuku ea ratou koratou taoni, kae oro arei kia Jesus.
31I te vasia ai, na kau fanonga ku kaaisi faka makeke rei kia Jesus, “Fakaako ee, au o kai mo kai ma au!”
32Tongoi atu rei koia, “Kuou aku mo kai ke kai si see kotou iroa riaina.”
33Tera na kau fanonga ku tafito feesiri maso koratou, “Matea se tangata ne au ma ana mo kai?”
34Muna atu rei ko Jesus kia ratou, “Aku mo kai nei, ke kau tautari ki te fifia o Tupua koia ne kau mai kuou, ke faka suku suku te fainga fekau ne sori mai kia kuou ke fai. 35Totou taranga e naa, ‘A foi marama foki ke faa, kae matua arei koa tofi!’ Kae kuou e faka ari atu fuarei: Pupula faka laoi kia roto tofi, vasia nei te kai ku matua ke oro o tari mai. 36Te tangata koia e fai kai ku tauvi riaina ke poi o faka ngiti ki roto koa kai mo te ora mau; take tangata koia e tokai ma take tangata e fai kai koraua ka fetau vaki vaki ngatai. 37Te fai muna nei e tonu rei, ‘Take tangata e tokai, kae fai kai rei take tangata.’ 38Kuou ku fakkau atu kotou ke fai kai ia tofi kotou se ne fai fekau kiei, kae rake faoa ne fai fekau iei, ka kotou ku taufenua mai ia ratou fainga fekau.”
39I te taoni e tokkapi ko nga Samaria ku fakatonu kia Jesus, natafito i te maatua fafine ne nai araara fakina, “Koia ne nai faka ari mai kia kuou a nea katoa noko fai ea kuou.” 40I te vasia nga Samaria ne oomai kia koia, ratou kaisia rei koia ke nofo mai kia ratou, nofo atu rei ko Jesus i kuraa ana foi aso e rua.
41E tokkapi rei fokia ne fakatonu, natafito i tana fai muna muna. 42Muna atu rei koratou ki te maatua fafine, “Vasia nei komatou ku fakatonu, siei natafito pe nia ko kee ne muna kiei, kae maso komatou ku fakarongo kiei, ma ku matou iroa koia maori rei te Faka sao oa taangata nei.”
Jesus e ikirave ki te tama a te pure
43Ia tua oa foi aso e rua, ko Jesus ne poi ki Galilee. 44#Mat 13.57; Mak 6.4; Luk 4.24.Natafito koia maso koia ne muna, “Te ʻprophetʼ si see faka epa ria i na noforanga.” 45#Jon 2.23.Vasia koia ne oko ki Galilee, te kano fenua i kuraa ne ratou faka afea riaina koia, natafito koratou fokia ne oro ki te Kai kai o te Faka sara anga i Jerusalem, ne ratou ravea ina ko ana nea ne nai faia i te vasia o te Kai kai o te Faka sara anga.
46 #
Jon 2.1–11. Tera ko Jesus ne foki ki muri ki Cana i Galilee, i ngangea ne nai furisia ina koa vai kia waeni, ma i ngangea te pure tana tama e ngae ngae i Capernaum. 47Vasia koia ne rongo ko Jesus ku aumai i Judea ki Galilee, koia ne poi o kaisi atu kiei ke au ki Capernaum o ikirave ki tana tama, natafito ku piri ke mate. 48Jesus ne muna atu rei kia koia, “Siei pe koai ia kotou ka ma fai ke fakatonu, oko rei ki te vasia ku kotou ravea koa furisanga ma a ngangea faka mate tino.”
49Tongoi atu rei te pure, “Maurunga ee, kuou e fifia ke tau oro i te vasia o taku tama e koi ora iei.”
50Muna atu rei ko Jesus kia koia, “Poi, tau tama ka ora!”
Te tangata ne fakatonu kia taranga a Jesus, ma ne poi arei. 51I na vasia e foki ki na noforanga, nai fekitei akina arei ko ana fai fekau e oomai ma te rongo, “Tau tama ku ora!”
52Fesiri atu rei koia kia koratou, “Te vasia fea taku tama ne maroro iei?”
Tongoi atu rei koratou, “Te raa e tasi i te avatea naanafi, ma na ngaengae ne eva arei iei.”
53Te mmana ku nai maanatu ina arei te vasia rei sokotasi ko Jesus ne muna atu kia koia, “Tau tama ka ora.” Tera koia ma ana kanoa paito katoa rei ku fakatonu.
54Teinei te rua o te furisanga a Jesus ne fai fekauaki i ana tua ku foki mai i Judea ki Galilee.
ప్రస్తుతం ఎంపిక చేయబడింది:
John 4: TKP
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2025 Wycliffe Bible Translators, Inc.
