John 3
3
Jesus ma Nicodemus
1Te taki o nga Jew, na ingoa ko Nicodemus, koia te foi faoa o nga Pharisee. 2I take poo koia ne au kia Jesus ta muna atu rei kiei, “Rabae ee, e matou iroa ina ko kee te fakaako ne fakkau mai e Tupua. Siei pe koai ke nai faia koa furisanga e fai ea kee naa, kae fuarei Tupua e nofo ia koia.”
3Tongoi atu rei ko Jesus, “Kuou e faka ari atu kia kee te maori: Siei pe koai ka nai ravea ina te Kainanga o Tupua, fuarei koia ke faanau fokia.”
4Fesiri atu rei ko Nicodemus, “Ka ma fai faka fefea ko tangata matua ke faanau mai fokia? Koia ka se nai urufia riu manava o na nana, ke faanau faka rua fokia!”
5Tongoi atu rei ko Jesus, “Kuou e faka ari atu kia kee te maori: Siei pe koai ke nai urufia ina te Kainanga o Tupua, kae koia si se ne faanau ia vai ma te Mauri o Tupua. 6Te tangata e faanau tangata ia matua faka taangata, kae koia e faanau faka tupua i te Mauri o Tupua. 7Kau see rere ou mauri, natafito kuou e faka ari atu kia kee, kotou ke faanau fokia. 8Te matangi e ma angi angi saere; e kee rangona ko na ooro, kae see kee iroa ina ko na ngangea e au mai iei pe ka poi kiei. E fakapera rei pe koratou e faanau i te Mauri o Tupua.”
9Nicodemus ne fesiri, “Ka ma fai rei faka fefea?”
10Jesus tongoi atu rei, “Ko kee te matuaa fakaako o Israel, kae ko kee see kee iroa ina? 11Kuou e faka ari atu kia kee te maori: Komatou e mmuna kia nea e matou iroa ina, ma e faka ari atu pe nia ne matou ravea ina, kae siei pe koai ia kotou ke tautari o sau kia matou taranga. 12Kotou see fakatonu kia kuou, vasia e kau araara fakina koa nea oa taangata nei kia kotou; ka ma fai rei faka fefea kotou ke fakatonu kia kuou i toku vasia e kau araara fakina atu koa nea o te vaerangi?! 13Siei pe koai ne poi ki te vaerangi, kae te Tama a Tangata fuarei ne fena ifo mai te vaerangi.
14“Vasia o Moses ne faka tuu ki runga ko te pou o te sineke ngatana i te ngangea tulaavaki, tera ia fai atamai sokotasi, te Tama a Tangata ka rangaia ki runga fokia. 15Tera pe koai ma e fakatonu kiei, ka ratou saua ko te ora mau. 16Tera Tupua e fakapere maatea rei kia taangata nei, tera arei koia ne sori ifo ko tana Tama fangasere; pe koai ma e fakatonu kiei, ka si see mate, kae ka nai maua ko te ora mau. 17Tera te Tupua se ne fakkau ko tana Tama ke au kia taangata nei ke nai faka tautara sia, kae ke au o faka sao. 18Tera pe koai ma e fakatonu ki te Tama e si see faka tautara sia, ka tera kae pe koai ma si see fakatonu kiei, ku naa ko te faka tautara iei, natafito koratou se ne fakatonu ki te Tama fangasere a Tupua. 19Teinei te fai faka tautara e fai faka peinei: te maarama ne au kia taangata nei, kae te kano fenua e fakapere ki te pouri kae siei ki te maarama, natafito aratou tukunga e pariki. 20Pe koai e fai fekauaki koa tukunga pariki, e kivimata ki te maarama, ka si see oomai ki te maarama, natafito koratou si see fifia ki aratou tukunga pariki ke ravea ina. 21Ka koratou e fai koa tukunga e tonu ka oomai ki te maarama, ke faka tonu te maarama ke ata ata pe nia ma ratou e fai tautari ki Tupua.”
Jesus ma John
22Ia tua nei, ko Jesus ma na kau fanonga ne oro ki te motu ngangea i Judea, ma koia ne nofo ana fai ma koratou i ngangea, ma ne fai ko faka uku tapu. 23Ko John fokia noko fai ko te faka uku tapu i Aenon si see mmao ma Salim, natafito a vai e maatea i ngangea. Kano fenua e oro kiei, mae koia e faka ukuuku koratou. 24#Mat 14.3; Mak 6.17; Luk 3.19,20.(Neinei ne fai i te vasia ko John siki tukuna ki te fare pono pono.)
25A rake taangata i te kau fanonga o John ne faka maraua taranga ma te foi Jew ia tukunga o te faka kira. 26Tera koratou ne oro kia John o faka ari atu kiei, “Fakaako ee, ko kee e maanatu te tangata korua i take faasi Vai saria i Jordan, koia noko araara ko kee kiei? Ta tera koia ku fakatafito o fai ko te faka uku, te fenua ku tafito oro kiei.”
27Tongoi rei ko John, “Siei pe koai ke fai pe nia ma ana, e ma fai fuarei Tupua ke nai soria kiei. 28#Jon 1.20.Kotou maso kotou ne fakarongo kia kuou ne muna, ‘Kuou siei te Ariki Fakaroro, tera kuou ne kauna mai ke mua mai ia koia.’ 29Te pure foou koia ona te fafine avanga, kae te soavaka o te pure foou e tuu ma e fakarongo, ma koia e vaki vaki maatea i vasia koia e fakarongo ki te reo o te pure foou. Teinei toku kee fai vaki vaki e katoa iei. 30Koia ke faia ke maurunga ki runga kae kuou ke mau raro ki raro.
Koia e fena ifo mai te vaerangi
31“Tera koia e fena ifo mai te vaerangi e maurunga sapa rei; tera koia ia taangata nei e araara faki kia nea faka taangata nei, kae koia e fena ifo mai te vaerangi e maurunga kaatoa rei. 32Koia e nai munakina pe nia ne nai ravea ma ne nai rangona, kae siei pe koai ke tautari ki ana taranga. 33Kae tera pe koai ka nai faka tonusia o sau koa ana taranga, e nai faka maori ria te Tupua te tonu maori. 34Tera koia ne fakkau mai e Tupua ke au, koia e araara faki ko ana taranga; natafito Tupua e nai soria ina katoa kiei ko na Mauri. 35#Mat 11.27; Luk 10.22.Te Mmana e fakapere ki tana Tama, ta koia ne tuku kiei koa nea kaatoa ki ana rafi rima. 36Pe koai e fakatonu ki te Tama e nai saua te ora mau iei, kae pe koai si see tautari ki te Tama ka see faka orangia, natafito te faka pariki a Tupua ka naa mau ia koia i nga vasia katoa.”
ప్రస్తుతం ఎంపిక చేయబడింది:
John 3: TKP
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2025 Wycliffe Bible Translators, Inc.
