1 Korɛnte Siè 7
7
Hɔ̀ bòo lɛ dìe hɔ̀ yaamu bòo hũn kɔ̃́nírɔ́
1Ɛ́ hɔ ɓen kɛ́ hɔ́ bòo lɛ ɛ́ mí dìekɛa àá mi mì vɛ̃hṹ lɛ ɛ́ mí wɛ̃́ lɛ́ mi ǹ hũn, ɛ̀ ǹ nɛ hɔ sãa ɛ̀ bɛ́rɔ ɛ̀ bí yɛ hṹnu wɛ̀. 2Kɛ́ lɛ ɛ̀ mì dàá bí wóo daaníkɛ ɓán kũǹ, ɛ́ hɔ́ bòo ɛ́ tṹ ɛ̀ hɔ́rɔn bɛ́rɔ ɛ̀ dàá ɓá hṹnu, ɛ̀ hɔ́rɔn hṹnu ɛ̀ ɓiɛ̀ dàá ɓá bɛ́rɔ. 3Á bɛ́rɔ ɛ́ fɔ́ɓán à wóo wé hɔ́ bòo lɛ ɛ́ fɔ́ɓán àá ɓá hṹnu ɛ̀ lɛ́ à ǹ, à hṹnu ɛ̀ lò ɓiɛ̀ fɔ́ɓán à wóo wé hɔ́ bòo lɛ ɛ́ fɔ́ɓán àá ɓá bɛ́rɔ ɛ̀ ɓiɛ̀ lɛ́ à ǹ. 4À hṹnu ɛ́ yí dàa ɲunù mí tɛkɛ̀a lɔ̀n wɛ̀, piè tɛkɛ̀a ɛ́ bòo sɛ̃̀ ɓá bɛ́rɔ ǹ. À bɛ́rɔ ɛ́ lò ɓiɛ̀ yí dàa ɲunù mí tɛkɛ̀a lɔ̀n wɛ̀, piè tɛkɛ̀a ɛ́ bòo sɛ̃̀ ɓá hṹnu ǹ. 5Ɛ́ hɔ́rɔ ɛ̀ bí wóo pĩ́ ɛ̀ bie nɛ mí yá lɛ́ míte ɓá ńkɔnù ǹ, kɛ́ hɔ́ yí bòo ɛ́ mípe mì ɲuunáa ɛ́ wɔ́ mí ɲunù àá dìcóoní ɛ́ nɛ mi ɛ̀ fùansí hɔ́pe sí ǹ pɛ̃̀hṹ dɔ̀ hũn, bòo lɛ ɛ́ wé mì dàá dàń Dɔfĩn ɛ̀ hɛ̃nnin sãaní. Kɛ́ pehɔ̀ máahṹ, ɛ̀ mì bĩní khíi vɛ kóo ɓánlɔ̀n mì yaamu hũn. Kɛ́ dàa bòo mí ɛ́ ɓuɔ́ ɛ̀ hɔ́rɔ ɛ́ dàá míte ɛ́ tɛ, ɛ́ Sitũanɛ ɛ́ wo ɛ́ yí wṹn ɛ́ dàá ɛ́ hàaní miɛ ɛ́ yí nin.
6Hɔ̀pe lɛ ɛ́ nín bie lɛ́ miɛ ǹ ɛ́ yí bòo ɛ́ ń nɛ mi wé àá pànkɛ́ wɛ̀. Kɛ́ lé iè wṹn ɛ́ nín zɛ̃́ní àá miɛ. 7Hɔ̀ ɓen iè ǹpe, ɛ̀ ǹ den hṹn cɛ̀ nɛ ɓɛ báa ɓɛ́kùi ɛ̀ dìń kɛ̀a mi ɛ̀ bí yɛ hã́a wɛ̀. Kɛ́ Dɔfĩn ɛ́ den lɛ́ nìnbirìe ɓɛ́kùi hɛ̃mu bòo ɓà ǹ, hɔ́rɔ àá mí hɔ́n. Ádɔ̀ hɛ̃mù bòo lɛ á yú ɛ́ iè hɔ̀ lɛ, àdɔ̀ bòo lɛ á yú ɛ́ ɓiɛ̀ iè hɔ̀ sí.
8Ɛ́ ń den nɛ ɓɛ báa lɛ yí dàa ɓɛ hã́a àá ɓɛ́ mɛ-hã́a ɛ̀ wo tɛ kansí kɛ̀amu kɛ̀a ǹpe. 9Kɛ́ ɓɛ́ ɓen yí dɛ̀ ɓɛ́te ɛ́ yá ɓaà, ɛ̀ ɓɛ̀ ɛ̀ yɛ iè hɔ̀ lɛ ɛ́ peɓɛ̀ yaamu ɛ́ bòo tṹ hɔ́ lɛ ɛ́ ɓɛ ɛ̀ kań yán ɛ̀ hɔ̀ pɔnù ɛ̀ wóo cĩ̀ní fúu.
10Ɛ̀ ɓɛ̀lɛ ɛ́ yankɛ vɔ́ ɛ́ ń den ɛ́ lè ɲunù bienù lɛ ɛ̀ lɛ́ nin (kɛ́ hɔ́ yɛ̀rɛ́ yí ńpe ɛ́ te le ɛ́ lɛ́, kɛ́ á iè ɔ̀ Ɲunsɔ), nɛ a hṹnu lɛ ɛ́ yan ɛ̀ bí fán ɛ̀ lé ɓá bɛ́rɔ ǹ wɛ̀. 11Kɛ́ á fɛ́rɛ lɔ́ à ǹ, à kansí kɛ̀amu ɛ̀ bí bĩní yɛ, tàá à khũ̀á vɛ ɲí ɓán àá ɓá bɛ́rɔ. À bɛ́rɔ ɛ̀ lò ɓiɛ̀ bí ɲɛ ɓá hṹnu wɛ̀.
12Kɛ́ hɔ́ ɓen kɛ́ ɓɛ́pe lɛ kɛ́, ɛ̀ lɛ iè hɔ̀ bòo lɛ ɛ́ nín bie (hɔ̀ iè ǹpe temu ɛ́ bie kɛ́ á yí Ɲunsɔ wɛ̀): kɛ́ ńdɛsĩ̀rɔ dɔ̀ ɛ́ dàa hṹnu lɛ ɛ́ yí ńdɛsĩ̀rɔ, kɛ́ ápe hṹnu sɔ ɛ́ tɛ̀ nɛ mii kansí àá ɔ́, à bí ɲɛ-a wɛ̀. 13Ɛ̀ kɛ́ ńdɛsĩ̀rɔ hṹnu dɔ̀ ɓà bɛ́rɔ ɛ́ pe yí ńdɛsĩ̀rɔ, kɛ́ ápe ɓà bɛ́rɔ sɔ ɛ́ tɛ̀ nɛ mii ɛ̀ kansí àá ɔ́, à bí pĩ́-ɛ wɛ̀. 14Iè hɔ̀ lɛ á bɛ́rɔ lɛ ɛ́ yí ńdɛsĩ̀rɔ ɛ́ wo lúwi Dɔfĩn piè ńcɛɓánlɔ́ àá ɓá hṹnu bòo hũn, àpe hṹnu lɛ yí ńdɛsĩ̀rɔ ɛ́ ɓiɛ̀ lúwi Dɔfĩn piè ńcɛɓánlɔ́ àá ɓá bɛ́rɔ bòo hũn. Kɛ́ dàa bòo mí, ɛ́ peɓɛ̀ zĩncã́ahɛ̃ ɛ́ dìń kɛ̀a iè nìnbirìe lɛ ɛ́ yí ńdɛsĩ̀riè zĩncã́ahɛ̃, hɔ́rɔsí kɛ́ ɓɛ́ lò den lúwi Dɔfĩn. 15Kɛ́ á ɓen iè ɔ̀pe bɛ́rɔ tàá à hṹnu lɛ yí é ńdɛsĩ̀rɔ ɛ́ temu nɛ mii lan, à lan. Hɔ́rɔsí àpe lɛ iè ɔ̀ ńdɛsĩ̀rɔ ɛ́ wo te míte, iè hɔ̀ lɛ ɛ́ Dɔfĩn ɛ́ vɔn kie nɛ ke kań hũn-wiɛ̀ hũn. 16Ɛ́ kɔ́pe hṹnu lɛ iè ɔ̀ ńdɛsĩ̀rɔ, kɔ́ yí dũ kɛ́ kɔ́ dɛ̀ ɛ́ lɛ́ ɛ́ mì bɛ́rɔ ɛ́ fuen? Ɛ̀ kɔ̀pe bɛ́rɔ lɛ ɛ́ iè ɔ̀ ńdɛsĩ̀rɔ, kɔ́ yí dũ kɛ́ kɔ́ dɛ̀ ɛ́ lɛ́ ɛ́ mì hṹnu ɛ́ fuen?
Mì dìń kɛ̀a bòo lɛ ɛ́ mí dàa hàarí dɛ̃̀ lɛ ɛ́ Dɔfĩn dàa vɔn miɛ
17Kɛ́ hɔ́pe sí ɛ́ ɓen lɔ́ yán, ɛ̀ nɛ hɔ́rɔ ɛ̀ wóo dàá míte ɛ̀ ɓáaníɓán àá piè hɔ́n hɛ̃mù bòo lɛ ɛ́ Ɲunsɔ ɛ́ lɛ́ à ǹ, à dìń kɛ̀a bòo lɛ á hàarí dɛ̃̀, pɛ̃̀hṹ lɛ ɛ́ Dɔfĩn dàa vɔn ɔ̀. Sí den iè pe ɲunù bienù lɛ ɛ́ nín lɛ́ hɔ́ Dɔfĩn zĩhĩ́ɛ míkùi hũn. 18Á bɛ́rɔ lɛ ɛ́ Dɔfĩn mii ve kɛ́ á fɛ̃̀ vɔ́, ɛ̀ bí bie nɛ mii tànkɔ̀ní mí fĩ̀nlɔ́ sɔ wɛ̀. Àlɛ ɛ́ Dɔfĩn ɛ́ vɔn kɛ́ á yí fĩ̀, ɛ̀ ɓiɛ̀ bí bie nɛ mii fĩ̀ wɛ̀. 19Lɛ ɛ̀ bɛ́rɔ ɛ̀ fĩ̀ tàá à bí fĩ̀ ɛ́ pe yí bòo lɛ hie wɛ̀. Hɔ̀ lɛ bòo hie iè Dɔfĩn ɲunù tɛmu mɛ̀ndɛ̃rɔ́. 20Ɛ́ mí nɛ hɔ́rɔ ɛ̀ wóo dìń kɛ̀a bòo lɛ á dàa hàarí dɛ̃̀ pɛ̃̀hṹ lɛ ɛ́ Dɔfĩn ɛ́ dàa vɔn ɔ̀. 21Ɛ́ bòo ɛ́ Dɔfĩn ɛ́ mii ve kɔ ɛ̀ kɔ̀ iè wɔnù? Ɛ́ kɔ́ bí nɛ hɔ hè kɔ̀ kuò wɛ̀. Kɛ́ kɔ́ yú wṹn dɔ̀ lɛ ɛ́ leń kɔ ɛ́ lé hɔ́pe wɔn-yáamu hũn, ɛ̀ kɔ̀ bí fùansí lè ǹ wɛ̀. 22À wɔnù lɛ á Ɲunsɔ ɛ́ vɔn ɛ́ den te mite àpe Ɲunsɔ viì, iè hɔ̀ lɛ ɛ́ piè bòo ɛ́ sɛ̃̀ à ǹ. À nìnbírɔ lɛ te mite lɛ á Ɲunsɔ ɛ́ vɔn ɛ́ den iè ɔ̀ Kirisa wɔnù. 23Dɔfĩn ɛ́ yɛ̀ miɛ àá yàamu hieniɛ cɛ̃̀un, ɛ́ mí wo bí khũ̀á wé ɓɛ́ nìnbirìe wɔ́hĩ́ wɛ̀. 24Kìe zɛ̀ɓɛ̀, nɛ hɔ́rɔ ɛ̀ wóo dìń Dɔfĩn híɛhɔ́ kɛ̀a bòo lɛ á dàa hṹn dɛ̃̀ pɛ̃̀hṹ lɛ ɛ́ hɔ́pe Dɔfĩn ɛ́ dàa vɔn ɔ̀.
Hɔ̀ bòo lɛ dìe ɓɛ̀lɛ lɛ yí yɛ àá ɓɛ́ mɛ-hã́a bòo hũn kɔ̃́nírɔ́
25Ɛ́ hɔ́ ɓen kɛ́ ɓɛ́ nìnbirìe lɛ yí yɛ bòo, ɛ̀ Ɲunsɔ ɛ́ yí lɛ́ ɲunù tɛmu mi ǹ peɓɛ̀ bòo hũn wɛ̀. Kɛ́ ń den nin lɛ́ niǹ nùnlé miɛ ǹ, lɛ iè nìnbírɔ lɛ ɛ́ mí dɛ̀ ɛ́ dɛ ɛ́ sĩ̀nnin nùnlé, àpe lɛ ɛ́ Ɲunsɔ ɛ́ wɔ́ àá mí hiì.
26Hɔ̀pe zoòni lɛ lɔ̀nbuò bòo hũn, ɛ́ nín nùún ɛ̀ nɛ hɔ sãa ɛ̀ hɔ́rɔ ɛ̀ dìń kɛ̀a bòo lɛ á te dàa dɛ̃̀. 27Kɔ́ ɓen dàa hṹnu, ɛ̀ kɔ̀ bí bie nɛ kɔ ɛ̀ ɓé mí yaamu wɛ̀. Ɛ̀ kɔ̀ ɓen yí dàa hṹnu, ɛ̀ kɔ̀ bí bie kɔ yɛ hṹnu wɛ̀. 28Ɛ́ hɔ́pe sí míkùi hũn, kɛ́ kɔ́ den pɛ́wi ɛ́ khie yan hṹnu, ɛ̀ hɔ̀ yí bɔ̀koohɔ́ ɛ́ kɔ́ wɔ́ wɛ̀. Kɛ́ ńyentí ɛ́ lò ɓiɛ̀ khie van yan, ɛ̀ hɔ̀ lò ɓiɛ̀ yí bɔ̀koohɔ́ á wɔ́ wɛ̀. Kɛ́ ɓɛ́ nìnbirìe lɛ ɛ́ yankɛ ɛ́ den lɔ̀n ɓén be cɛ̃̀un ɓɛ́ mɛkɛ̃nì hũn. Ɛ́ sí den iè bòo lɛ ɛ́ ń den ɛ́ cɛ̀ nɛ mi bí vɛ zɔ hũn wɛ̀.
29Kìe zɛ̀ɓɛ̀, lɛ den iè hɔ̀ bòo lɛ ɛ́ nín cɛ̀ ɛ́ nin bie: lè pɛ̃̀hṹ ɛ́ wo kɛ́ yí tóo wɛ̀. Ɛ́ wo dàá mìí zoòni, nɛ ɓɛ báa lɛ dàa ɓɛ hã́a ɛ̀ wé kɛ̀a bòo ɛ́ ɓɛ́ yí dàa hã́a wɛ̀. 30Ɛ̀ ɓɛ̀lɛ ɛ́ wírí ɛ̀ wé kɛ̀a bòo ɛ́ ɓɛ́ yá wírí, ɛ̀ ɓɛ̀lɛ ɛ́ wɛ ɓɛ́te ɛ̀ wé kɛ̀a bòo ɛ́ ɓɛ́ yí wɛ ɓɛ́te, ɛ̀ ɓɛ̀lɛ ɛ́ hɔ̀ bòo ɛ̀ yɛ̀ ɛ̀ wé kɛ̀a bòo ɛ́ ɓɛ́ yí dàa hɔpe bòo lɛ ɛ́ ɓɛ́ yɛ̀ wɛ̀. 31Ɛ̀ ɓɛ̀lɛ ɛ́ dàa le dímíɲɛ́ bòo ɛ̀ wé kɛ̀a bòo ɛ́ ɓɛ́ yí dàa hɔ wɛ̀. Iè hɔ̀ lɛ ɛ́ lépe dímíɲɛ́ sɔ lɛ àá hɔ́ bòo lɛ ɛ́ lé te dàa dɛ̃̀ ɛ́ ɓén vé ɛ́ khíi lé yán.
32Ɛ́ ń den ɛ́ cànkɛ nɛ mi bí kań lé kɔhìé hũn wɛ̀. Àlɛ ɛ́ yí dàa hṹnu ɛ́ wóò hìení mí kuò Ɲunsɔ bòo hũn, à wóò cɛ̀ nɛ mí bòo ɛ̀ tĩìní-ɛ̀ ǹ. 33Kɛ́ álɛ ɛ́ dàa hṹnu ɛ́ pe wóò hìení mí kuò hɔ̀ dímíɲɛ́ bòo hũn. À wóò cɛ̀ nɛ mí bòo ɛ̀ tĩìní ɓá hṹnu ǹ. 34Á iè wìe lɛ ɛ́ wo sankɛa bòo ɲuuniɛ̀ hĩ̀ ɲu tĩ́ihṹ. Ɛ́ kɛ̀amu, á hṹnu lɛ yí yɛ tàá à yentí ɛ́ wóò hìení mí kuò Ɲunsɔ bòo hũn, à wóò cɛ̀ nɛ mí dé míte àá mí nùnlé àá mí bɔ̀werà míkùi Ɲunsɔ núnú hũn. Kɛ́ álɛ ɛ́ yan ɛ́ pe wóò hìení mí kuò hɔ̀ dímíɲɛ́ bòo hũn. À wóò cɛ̀ nɛ mí bòo ɛ̀ tĩìní ɓá bɛ́rɔ ǹ.
35Nín hɔ̀pe sí ɛ̀ khɛ́ mípe mì sãarɔ́ bòo hũn, kɛ́ hɔ́ yí bòo ɛ́ nín mì mɛmɛ́kɛ àá bòo dɔ̀ wɛ̀. Ń den ɛ́ cɛ̀ nɛ hɔ bòo lɛ te mí yìe iè pe ɛ́ mí wé, kɛ́ mí can mì kòo ɔ̀ Ɲunsɔ tɔnlɔ́ hũn.
36Kɛ́ zufìɛ ɛ́ nùún à nɛ kɛ́ mí yí yɛ ɓá ńtɛ̃́un hɔ́rɔsí ɛ̀ mí hɛ̀ wɔ́ khɔn àá ɔ́, kɛ́ ɓà ńtɛ̃́un pɔnù ɛ́ pɔ́ a, á wo nɛ ɓɛ́ sãawi ɛ̀ ɓɛ́ yɛ ɓán, ɛ̀ ɓɛ̀ yɛ ɓán kɛ̀a bòo lɛ á wɛ. Hɔ́rɔsí à yí wé bɔ̀koohɔ́ dɔ̀ wɛ̀. 37Kɛ́ ápe zufìɛ ɛ́ temu munɛ mí tĩì hũn nɛ mí yí mii yɛ hṹnu, kɛ́ á yí-e dɔ̀ ɛ́ ti-e ɛ́ mɛmɛ́kɛ, kɛ́ á dɛ̀ mí kùrú yɛ̀rɛ́ tĩì bòo ɛ́ ɲàakɛnin, hɔ́rɔsí ɛ̀ hɔ̀ iè bòo lɛ sãa á ɛ́ wé. 38Ɛ́ kɛ̀amu, álɛ ɛ́ yan hṹnu ɛ́ wɔ́ bòo lɛ sãa, àlɛ ɛ́ yí yɛ hṹnu ɛ́ pe wɔ́ bòo lɛ sãa ɛ́ pɔ.
39Hṹnu lɛ yan ɛ́ canɓán àá ɓá bɛ́rɔ pɛ̃̀hṹ míkùi lɛ ɛ́ ɓà bɛ́rɔ ɛ́ yìe wi hũn. Kɛ́ ɓà bɛ́rɔ ɛ́ húrun, hɔ́rɔsí à te míte, à dɛ̀ bɛ́rɔ lɛ á wɛ ɛ́ vɛ́ yɛ, kɛ́ ɓàasɔ den fɔ́ɓán à wé ńdɛsĩ̀rɔ. 40Kɛ́ ńpe niǹ viì, kɛ́ á kɛsí kɛ̀amu ɛ́ yí bĩní yɛ, á ɛ́ kań hũn-wiɛ̀ hũn ɛ́ pɔní. Sí iè bòo lɛ ɛ́ nín lieníkɛ, ɛ́ nín nùún ɛ̀ ǹ nɛ lepe Dɔfĩn Mɛkɛ̃nì ɛ́ lò ɓiɛ̀ wi àá mi.
ప్రస్తుతం ఎంపిక చేయబడింది:
1 Korɛnte Siè 7: bwj
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 L’Association Nationale pour la Traduction de la Bible et l’Alphabétisation