1 Korɛnte Siè 8
8
Hɔ̀ wɛ̃̀hɛ̃ taà bòo
1Ɛ́ hɔ́ ɓen kɛ́ ɓɛ́ bìlaàsiè lɛ ɛ́ ɓɛ́ wóò wòokɛ hɔ wɛ̃̀hɛ̃ lɔ̀n taà bòo, ɛ̀ hɔ̀pe wo bɔn kɛ́ képe kè kùi ɛ́ dàa hɔ bɔ̀dũmunù kɛ̀a bòo lɛ ɛ́ mí dàa wóo khɛ́ hɔ́. Kɛ́ hɔ́pe bɔ̀dũmunù ɛ́ den wóò lɛ́ à nìnbírɔ ɛ̀ wé yèncɛ̀, kɛ́ lé wanminu ɛ́ pe wóò lɛ́ ɛ̀ ɓɛ̀ ńdɛsĩ̀riè ɛ̀ vɛ àá híɛhɔ́. 2Kɛ́ nìnbírɔ ɛ́ tĩì à nɛ mí dũ bòo, à iè wìe lɛ ɲɛùn yí dũ bòo kɛ̀a bòo lɛ à dàa fɔ́ɓán à dũń hɔ́ wɛ̀. 3Kɛ́ nìnbírɔ ɛ́ wɛ Dɔfĩn, ɛ̀ Dɔfĩn ɛ́ dũ ɓàasɔ.
4Ɛ̀ dàá khíi vɛ hɔ wɛ̃̀hɛ̃ taà lànlɔ́ viì, ɛ́ képe wo dũ kɛ́ hɔ́ wɛ̃̀hɛ̃ ɛ́ yí bòo dɔ̀ dímíɲɛ́ hũn, kɛ́ Dɔfĩn mí dòonún ɛ́ temu wi. 5Hɔ̀pe wo bɔn kɛ́ hɔ́ bòo dɔ̀ lɛ ɛ́ ɓɛ́ nìnbirìe dɔ̀ ɛ́ wóò ve nɛ ɓɛ́ «dɔfĩnɓɛ» ɛ́ pe wo wi hɔ hóohũn àá lé sṹsùnù, iè hɔ̀ lɛ ɛ́ «dɔfĩnɓɛ» àá «ɲunhɛ̃sie» ɛ́ buò. 6Kɛ́ képe ɛ́ den dũ kɛ́ Dɔfĩn ɛ́ iè dìcóoní, Hɔ̀pe ɛ́ temu iè kìe Yàá lɛ te hɔ bòo míkùi ɛ́ mɛ́, ɛ̀ lè mɛkɛ̃nì lɛ ɛ́ ké wi hũn ɛ́ bòo sɛ̃̀ Hɔ̀ ǹ. Ɛ̀ Ɲunsɔ wìcóoní ɛ́ lò ɓiɛ̀ temu wi lɛ iè Yiezu Kirisa. Àpe temu lɛ́ ɛ́ bòo míkùi dàa wi, àpe temu lɛ́ ɛ́ képe dàa yìe wi.
7Kɛ́ ɓɛ́ den yí nìnbirìe ɓɛ́kùi ɛ́ temu dũ hɔ́pe sí wɛ̀. Ɓɛ̀dɔ̀ ɛ́ den hɛ̀ mɛ́nɛ hɔ̀pe wɛ̃̀hɛ̃ ǹ fúu ɛ́ hɛ̀rí kɛ̀a zoòni kɛ́ ɓɛ́ ɓen ɛ́ hɔ̀ taà lɛ ɛ́ yan àá lé minù ɛ̀ lɛ̀, ɛ̀ ɓɛ̀ den pɛ́wi wóò líi hɔ́ àá taà lɛ bòo sɛ̃̀ hɔ̀pe wɛ̃̀hɛ̃ ǹ. Peɓɛ̀ hũn nùnlé lɛ pànkɛ́ mí ɛ́ den wóò lɛ́ ɛ̀ ɓɛ̀ nùún nɛ hɔpe taà sɔ ɛ́ lieniɛ ɓɛ́. 8Ɛ́ hɔ́ den yí díe ɛ́ temu mii lɛ́ ɛ̀ kè dàá vɛ́ vɛ lúwiní Dɔfĩn wɛ̀. Kɛ́ ké yí dí hɔ́ ɛ̀ kè yí khe bòo dɔ̀ ǹ, ɛ̀ kè ɓen dú hɔ́ ɛ̀ kè lò ɓiɛ̀ yí yí bòo dɔ̀ ɛ̀ yòó sĩiní wɛ̀. 9Kɛ́ mí pɛ míte bòo sãàní nɛ hɔ lɛ ɛ́ mí te mite ɛ́ dɛ̀ hɔ̀ bòo lɛ ɛ́ mí wɛ ɛ́ wóo wé ɛ̀ bí lɛ́ ɛ̀ ɓɛ̀lɛ ɛ́ ɲɛùn pànkɛ́ mí hɔ́ ńdɛsĩ̀nlɔ́ hũn ɛ̀ khíi vɛ wé hɔ́ bɔ̀koohɔ́ wɛ̀. 10Iè hɔ̀ lɛ kɛ́ álɛ ɛ́ ɲɛùn pànkɛ́ mí hɔ́ ńdɛsĩ̀nlɔ́ hũn ɛ́ mɔn kɔ̀pe lɛ ɛ́ dũ hɔ́pe sí míkùi kɛ́ kɔ́ kɛsí ɛ́ dí lé wɛ̃̀hɛ̃ zũnù hũn, ɛ́ bòo á ɓiɛ̀ yá ɓén yí tĩhiè ɛ́ wóo lɛ̀ hɔ̀pe wɛ̃̀hɛ̃ taà? 11Ɛ́ kɛ̀amu, ɛ́ kɔ́pe kɔ̀ bɔ̀dũmunù iè pe wo ɛ́ lɛ́ ápe kìe zuú ńdɛsĩ̀rɔ lɛ ɲɛùn pànkɛ́ mí ɛ́ wo ɛ́ vĩ́iní míte lò. Hɔ́rɔsí kɛ́ á Kirisa ɛ́ lò den húrun piè yènsénín. 12Ɛ́ mí ɓen wóò wé khe àá mì zɛ̀ɓɛ̀ kɛ̀amu, ɛ̀ ɓóoní peɓɛ̀ tĩɛ̀ nùnlé lɛ pànkɛ́ mí ǹ, ɛ̀ mì iè pe ɛ́ wé khe àá ɔ́pe Kirisa kùusɔ kɛ̀amu. 13Ɛ́ sí iè hɔ̀pe kɛ́ bɔ̀díe ɛ́ temu mii lɛ́ ɛ̀ kìe zuú ɛ̀ dàá khíi vɛ wé bɔ̀koohɔ́, ɛ̀ ǹpe ɛ́ yí nín bĩní lɛ̀ taà hùúu, bòo lɛ ɛ́ wé ɛ̀ ǹ bí lɛ́ ɛ̀ kìe zuú ɛ̀ wé bɔ̀koohɔ́ wɛ̀.
ప్రస్తుతం ఎంపిక చేయబడింది:
1 Korɛnte Siè 8: bwj
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 L’Association Nationale pour la Traduction de la Bible et l’Alphabétisation