PATADA 23
23
–6–
1Ane siko molimbu motunda sangkani pai tau bangke lantinya, neʼe boi nukalingani kaʼisemanya tau setu. 2Mau maʼai kadarayamu mangkoni sondo-sondo, taʼamakamo sawoyo ndayamu seʼe. 3Neʼe manyanya da mangkoni waʼa anu monyami anu ndaporiokoi ri suaramu, maka bara podo maʼuji siko.
–7–
4Neʼe mompari-mpari gaga ua da rayamu koreʼe. Da nupeʼontoka monawa-nawa ewancetu. 5Maka podo sampompida mata aga-aga setu da paya, ewa reʼe paninya da moyoko ri raoa ewa tonci kuayangi.
–8–
6Neʼe mangkoni sangkani-ngkani pai tau manongo. Pai neʼe woʼu nuposawoyo pangkoninya anu monyami. 7Maka, da natoʼo, “Maʼi tapangkoni rangani pangkonimu,” ntanoka tinako ndayanya banya ewanceʼe. Maʼalusu pompaunya paikanya rayanya ntaninya. 8Ripurinya nepa da nulua muninunjaa anu roo nuomo, pai pura-pura waʼa mpaumu anu maʼalusu pai siʼa bereʼe yowenya.
–9–
9Neʼe boi nupatujuki ntau anu tengo, maka bareʼe da napedongeka patujumu setu.
–10–
10Neʼe kojo boi nuwianaka da mangalimba tida ntana panta bara da mantima tana ana ilu. 11Maka i Pue toponcambiranaka anu maroso, Sira anu da mampopasambiraka tau seʼe mantadai siko.
–11–
12Parindayamo pompaguru gurumu pai pegurumo ri gori pangkotomu.
–12–
13Neʼe boi kanuʼu-nuʼu rayamu mampaguru anamu. Ane nutabasika lauro siʼa bareʼe da mate, 14paikanya da tesorepaka.
–13–
15Ee anaku, maʼai kojo kawongko ndayaku ane loʼe siko. 16Menaa rayaku anu kudonge siko timama ri pampasowamu pau.
–14–
17Neʼe boi masina rayamu ri tau masalaa. Pepoʼinaya mpaliu ri Pue 18da naka reme ngkatuwumu ripurinya madago, pai mampomata-matamu bareʼe da paya.
–15–
19Pedongeka anaku! Pealimo tau loʼe, da nupatimamasi kojo jaya ngkatuwumu. 20Neʼe mogalo-galo pai topoyangu-yangu bara tau manyanya, 21maka tau seʼe da mewali kaasi-asi. Ane podo yore-yore siko bareʼemo masae porengkomu da patesandagutika.
–16–
22Pedongemo ri papamu; maka ane banya siʼa bareʼe da reʼe siko. Ane matuʼamo inemu, da nupatongawamo ewambeʼi nupantubunaka siʼa.
23Pompaguru anu monco, kaloʼe, popanini pai parata ndaya pura-puranya setu sintinaja da ndaoli, paikanya maʼai ngkasuli anu da ndapobalu.
24Sambaʼapapa da mawongko rayanya ane ananya madago poʼengkonya; bangke rayanya ane ananya loʼe.
25Tuarapa ine pai papamu da mampokawongko siko; tuarapa da lindo raya mbeʼa anu mampoana siko.
–17–
26Patomata mpodago pai peluluimo katuwuku, anaku! 27Waʼa mbeʼa anu mampobalu koronya inceʼe sambaʼa patambo anu da mampakarugi. 28Tau seʼe tumunda ewa topangangka pai da mampapopuʼu sondo tuama da mosalara.
–18–
29-30Ara nuincanimo nunjaa anu da mewali ri tau anu sondo panginunya anggoro, pai maria ngkani mampeinu panginu anu matuʼa kojo? Tau setu da tejeani pai mapari naepe. Bareʼe bali-bali popaiso pai mapari rayanya. Mawaa matanya papowela-wela koronya, ntanoka pura-pura setu nakoto mantilawangi. 31Neʼe nupapaliu koromu nakuasai anggoro, mau ndakita taʼanya mampaka sawoyo raya pai ndakita makilaya ri raya galasi pai madago poilinya ri wuroko. 32Maka iraneo mowuro da nuepe koromu ewa nepa roo natungku jalimoʼo. 33Monggio-nggio peolemu, bareʼe tumotoa ponawa-nawamu pai mapaʼi raya ngangamu. 34Nuepe-epe siko ewa momua-mua ri wuntu pantidoa ngkapala anu ntongo mpolayagi ri tongo ntasi; malili matamu pai siko jamo kalute-lute. 35Nepa da nutoʼo, “Taʼanya yaku nawombo pai natoposaka ntau, paikanya bareʼemo kuendo nunjaa anu roo tepewali. Oo, maʼai kojo kayuru mataku! Da kumanginu woʼu!”
