PATADA 22
22
1Toʼo anu madago inceʼe anu masuli painaka aga-aga anu sondo;
napotowe ntau inceʼe anu maruu kadagonya painaka ndawaika salaka pai wuyawa.
2Tau koreʼe pai tau kaasi-asi mampotumpu sangaya anu siwia:
I Pue anu malaburu tau seʼe pura-pura.
3Tau anu loʼe rayanya da metilawangi ane nakita da reʼe rugi;
tau tengo da melinja mpaliu painaka mampomberataka pari.
4Tau anu mepoʼinaya ri Pue pai mampakalauka koronya,
da lindo rayanya, da gana-gana katuwunya pai da ndatubunaka.
5Tolia pai patambo toka ri jaya ntau anu bareʼe mayoa;
tilawangi pura-pura setu anu da rayamu tesorepaka.
6Paguruka sambaʼa ananggodi jaya ngkatuwu anu sintinaja pai siʼa,
da naka rantani tuʼa siʼa da ewanceʼe katuwunya.
7Tau anu kaasi-asi da nakuasai ntau anu koreʼe;
tau anu moncabo da kuasai ntau poncabonya.
8Tau anu mamponcawuka denggo sangaya-ngaya da mangampota rugi;
ripurinya da paya rosonya da mowia gori mpepokononya.
9Tau anu madago raya da ndadonco i mPue,
maka siʼa mntila pangkoni ri tau anu mapari katuwunya.
10Irimo tauanu mampokono mampetikodi tau,
da naka teʼonto posisala, popaiso pai pombeposari.
11Tau anu mampokono kayoa ndaya pai maʼalusu pompaunya,
da mewali bale-bale i mokole.
12Ri pampatongawa pombamba ntau anu bareʼe mayoa,
i Pue mangajaga da naka ndaporewu mpaliu anu monco.
13I malose mampokono da maroo-roo ri banua,
maka natoʼo, “Njau singa ri sambalikunya boi da nasoko yaku ri yae njaya.”
14Pekanarasi mbeʼa anu bareʼe tumoro inceʼe ewa sambaʼa tilombu;
tau anu ndapokarau i mPue da manawu ri rayanya.
15Lawi sintinaja ana da mowia katengo,
paikanya inabasi lauro sanu mangkoto da mabalisaka poʼengko ntau seʼe.
16Isema anu da rayanya koreʼe,
ua pampipisinya tau anu kaasi-asi,
pai mawai parasee ri waʼa ntau sugi
ripurinya siʼa da mewali kaasi-asi.
Togo mpuyu patada ntau loʼe
22:17–24:22
17Pedongeka da kupampaguruka siko patada ntau loʼe! Parindayamo waʼa pompaguruku. 18Da mawongko rayamu ane nuparindaya waʼa pompaguruku. Maka ane ewanceʼe siko tokamo ane siko da mangampake. 19Inceʼe kupaguruka siko wawaseʼi maka kutangarandaya da naka siko mantambusaka katuwumu ri Pue. 20Reʼe togo mpuyu patada anu roo kuʼukika siko – waʼa mpatada anu banganinya pangaincani pai patuju anu madago; 21pai anu da mampaguruka siko nunjaa anu kamonconya kojo. Mewali, ane napeoasi ntau ri siko da nukoto mawai sononya anu monco.
–1–
22Neʼe boi mampakarugi tau anu kaasi-asi, ua mangkita bereʼe rosonya; pai ri suara mpobotusi neʼe boi mamposaru-saru tau anu bereʼe kuasanya. 23Maka i Pue da mancambiranaka
kara-kara ntau seʼe pai Sira da
mampepate tau anu majeani tau seʼe.
–2–
24Neʼe boi mogalo-galo pai tau anu pasengke, pai anu ganggara majaʼa rayanya. 25Maka masae-sae da nusue siʼa, pai bareʼemo da nukoto mantaji engko setu.
–3–
26Neʼe boi nujanji da mangkoyo inda ntau ntaninya. 27Maka ane bareʼe nukoto mabayari sako langka ngkayoremu da natima ntau.
–4–
28Neʼe kojo boi nuencu tida ntana anu roo nadika ntau piamomu.
–5–
29Bara reʼemo nupangkita tau loʼe mawianaka tetalanya? Tau setu da ndapapotetala ri langkanae waʼa mokole, banya podo ri banua ntau biasa.
