PATADA 19
19
1Moruana tau kaasi-asi anu mayoa raya ri katuwunya,
painaka tau tengo anu kambamba-mbamba.
2Kadoyo anu bareʼe nayunuki ngkaloʼe bareʼe madago;
tau anu moncoruru da mampowia kasala.
3Tolino mampakarugi koronya ngkalionya ua katengonya;
ri purinya nepa i Pue anu napetisala.
4Tau koreʼe da kakoteranga-rangani yununya;
tau kaasi-asi da napalaika yununya.
5Tau anu mombamba ri kareʼe mpobotusi,
bareʼe da lapa ungka ri popahuku.
6Pura-pura tau napari-pari da mantima raya ntau bangke;
pura-pura tau napokono da mobale-bale pai tau anu pande mporaya.
7Tau kaasi-asi bareʼe napeole ngkasangkomponya,
pagonya ane jamo yununya.
Mau ewambeʼi pompari-mparinya
bareʼe da nakoto mantima raya ntau seʼe.
8Isema anu mangampepali pangaincani mampotowe koronya;
pai isema anu mamparindaya nunjaa anu napeguru, da lindo rayanya.
9Tau anu mombamba ri kareʼe mpobotusi,
manoto da ndahuku pai da ndagero.
10Bareʼe sintinaja tau tengo da gana-gana katuwunya;
pai bareʼe woʼu singkana watua da mancongka tau makuasa.
11Tau anu loʼe nakoto maomo kasengke ndayanya,
siʼa ndaunde maka bareʼe napepalisi salaa ntau ri siʼa.
12Karau ndaya mokole ewa pangara ncinga;
kapande ndaya mokole ewa rini anu mayoʼosi waʼa mpinamuya.
13Ana anu tengo nakoto magero papanya,
rongo anu banggantali ewa polepe ue anu bareʼe oti-oti.
14Banua pai aga-aga nakoto ntau tuʼa mampareʼeka ananya,
paikanya rongo anu loʼe inceʼe pombai mpuru i mPue.
15Molose-lose inceʼe mampakalintu kayore,
pai ri purinya i malose da yoga.
16Tau anu maepoʼinaya ri waʼa ncongka i mPue Ala da tesorepaka,
tau anu mampesaru-saru da mate.
17Mantulungi tau kaasi-asi siwiamo pai mampaponcabo i Pue;
nepa i Pue anu da mangasili.
18Patimamasi anamu ntongo madagopa ndapakoronya,
maka ane bareʼe, posokinya nupapaliumo da kageronya.
19Mbolimo da naka tau pasengke maepe ngkalionya silinya.
Ane nupelae siʼa, siko podo marangani kajaʼa ndayanya.
20Ane nupodaraya meguru pai da mampedongeka patuju,
ripurinya siko da mewali tau loʼe.
21Tolino mampotumpu tinako ndaya anu sondo,
paikanya podo anu ndapakanoto i mPue anu da mewali.
22Anu ndapomata-mata ri sambaʼa tau inceʼemo katodo.
Moruana kaasi-asi painaka kambamba-mbamba.
23Tubunakamo i Pue, da naka lindo ndayamu;
da rodo rayamu pai lawa ungka ri karugi.
24Reʼe tau anu maʼai kojo kalosenya,
sako da masumpu pangkoni ri nganganya ngkalionya malente rayanya.
25Ane tau anumekiunde ndahuku, tau anu bareʼe gana pangaincaninya marata patiendo.
Ane tau anu madago engkonya ndaseko siʼa da terangani kaloʼenya.
26Ane anu majeani pai mairi tau tuʼanya,
inceʼemo ana anu mepakaea pai ndaposari.
27Anaku ane bareʼemo da nupokono meguru woʼu,
danukalinganimo nunjaa anu roo nupeguru.
28Mawai posabi mbamba, inceʼe mampesaru-saru padika;
mampakarugi tau ntaninya napokawongko ntau majaʼa.
29Tau tengo anu mapeni raya,
manoto da ndatabasi.
