PATADA 18
18
1Tau anu mantilawangi tau ntaninya
inceʼe posokinya podo maendo koronya ngkalionya;
pura-pura parata ndaya yunu nasapu.
2Tau anu tengo bareʼe napedongeka pontotoraka;
siʼa podo da mantoʼo parata ndayanya ngkalionya.
3Salaa pai engko jaʼa dasimpoyunu;
ane ndaposarimo, manoto ndapesambunika woʼu.
4Pompau ntau da mewali popuʼu loʼe,
ewa kayombu ntasi, malino ewa ue anu moili.
5Bareʼe madago mancambiranaka tau anu baleparu,
pai majeani tau anu bareʼe masalaa.
6Ane tau anu tengo moo moo mompau,
siʼa mampapopuʼu popaiso pai merapi da ndatabasi.
7Pompau ntau tengo da mampakagero koronya;
siʼa da tesoʼo pai waʼa mpaunya ngkalionya.
8Penuntuki setu mawongi ndadonge;
napokono ntau mangaomo.
9Tau anu bareʼe mawianaka tetalanya
siwia kajaʼanya pai ani napokono monjaʼati.
10I Pue ewa banua toaya anu maroso;
ndatiria kandeku ntau anu mayoa rayanya marata kalindo ndaya.
11Paikanya nasarumaka ntau waʼa aga-aganya anu da mantatondoni siʼa
da ewa bente anu maroso mantolilimi kota.
12Tau anu mekiunde da manawu,
tau anu lauka raya da ndatubunaka.
13Mancono pau ri kabareʼepanya ndapedongeka,
inceʼe powia ntau anu tengo pai bareʼe naincani ada.
14Ua pampodaraya katuwu, naʼagika ntau mangkoyo kapari;
ane payamo kadaraya setu da payamo woʼu pampomata-mata.
15Tau anu moʼengko madago bareʼe bali-bali napampomaranganga pangaincani;
tau loʼe bareʼebali-bali pampodarayanya pompaguru.
16Pombai mawete jaya
pai mawawanaka tau njoʼu ri waʼa ntau bangke.
17Tau anu mompau riunya ri suara mpobotusi ndakita ewa mayoa,
paikanya njaa anu natoʼo montepuʼu ndaʼuji ane jelamo sampotadanya.
18Pai popaʼundi, ndakoto mamparoo posisala,
sako popaiso ri oyo ntau makuasa ntano ndakoto mamparoo.
19Kasangkompo anu roo ndapakajuʼa rayanya, meruu kasusanya ndatimosuki
painaka kota bente anu maroso;
popaiso ewa singkuagi baa-baa ngkota anu maroso bentenya.
20Ri waʼa mpau anu ndapasowa
da reʼe wuanya anu ndaepe.
21Jika reʼe kuasanya da mancorepaka katuwu bara da majaʼati katuwu;
tau sangaya-ngaya da mangkoyo wua mpaunya.
22Tau anu marata rongo, marata rasi;
rongo inceʼe pombai mpuru i mPue.
23Tau kaasi-asi merapi ri petubunaka;
tau koreʼe mancono ri kakasaranya.
24Reʼe bale anu betodo,
reʼe anu meruu ngkaramunya painaka kasangkompo.
