YOSUA 6
6
Kasua kota Yeriko
6:1-27
1Waʼa baa-baa ngkota Yeriko manimpumo ndapangajagai, ndapatimamasi pangadampo mainti-inti da naka neʼe naleʼo nto Isaraeli mancuaki. Bareʼemo maya mau sambaʼa tau anu mesua bara mesuwu ungka ri kota setu. 2Ndatoʼo i mPue ri Yosua, “Seʼi-seʼi Kupapombaikamo ri siko kota Yeriko, mokolenya sangkani pai waʼa ncurodadonya anu makojesi setu. 3Siko pai waʼa ncurodadomu da mantolilimi kota setu sampali sape ri anu sandeme pai da ndipowia ri raya anu aono ndeme. 4-5Papitu tadu mpanyomba, paka mangkekeni surupeta tau seʼe anu sangaya-ngaya da melinja ri suara mPeti mPojanji. Ri eo anu kapapitu, siko sangkani pai waʼa ncurodadomu da mantolilimi kota setu papitu mpali sape pai waʼa ntadu mpanyomba setu da mantawuisi surupetanya da napakayui oninya, ane ndidongemo oni surupeta anu mayui, da mogumoramo pura-pura surodadomu, pai da maruamo bente ngkota setu. Liu-liu da ndisuakimo kota setu.”
6Napeboo i Yosua waʼa ntadu mpanyomba, natoʼoka tau seʼe, “Ndipoajumo Peti mPojanji setu; papitu tau ungka ri oyomi sangaya-ngaya da melinja ri suarata da mantangke surupeta.” 7Nepa napokau i Yosua waʼa ncurodadonya mobarisi mantolilimi kota setu, napaporiu barisi ncurodado anu mangkantawi ri suara mampesindiuka tau anu mampoaju Peti mPojanji i mPue.
8-9Silulu pai anu nasongka i Yosua, melinjamo barisi anu mangkantawi setu ri suara mampesindiuka waʼa ntadu mpanyomba anu mantawuisi surupeta, nepa natonda waʼa ntadu mpanyomba anu mampoaju Peti mPojanji, nepa metondaraka woʼu barisi anu mangkantawi ungka ri taliku. Sindara mpelinja ntau seʼe surupeta setu ndatawuisi mpaliu bareʼe marapa oninya. 10Pura-pura surodado roo ndapatiendo bareʼe maya mepoku sako mompau sanjumi bareʼe maya, ane bareʼepa nawai i Yosua petondoni. 11Ewanceʼemo napampokau i Yosua surodadonya mangkeni Peti mPojanji mantolilimi kota setu sampali sape, roo setu mewalili muni ri kareʼe mpokema ntau seʼe sambengi njairia.
12-13Bangke reme mowuro-wuro mpodago, membangu i Yosua, mobarisi woʼu waʼa ntadu mpanyomba pai waʼa ncurodado mantolilimi kota setu ewa posuncu mpobarisi ri eo anu kaʼisa, riunya barisi anu mangkantawi ri suara mpodago, nepa metondaraka waʼa ntadu mpanyomba anu mantawuisi surupeta, nepa natonda waʼa ntadu mpanyomba anu mampoaju Peti mPojanji, nepa ripuri mpodago waʼa ncurodado anu mangkantawi ungka ri taliku. Sindara mpelinja setu surupeta umani mpaliu natawuisi ntadu mpanyomba. 14Ri eo anu karadua setu natolilimi ntau seʼe kota setu sampali sape, roo setu mewalili muni ri pokema ntau seʼe, ewancetumo napampowia ntau seʼe ri raya anu aono ndeme.
15Ri eo anu kapapitu tau seʼe membangu mowuro-wuro, jamebete pinca reme, nepa mobarisi mantolilimi kota Yeriko papitu mpali sape ewa anu biasa, podo ri eo anu kapapitu napantolilimi ntau seʼe papitu mpali sape. 16Ri kagananya papitu mpali, jabutu natawuisi waʼa ntadu mpanyomba surupetanya napakayui oninya, nawai i Yosua petondoni naka mogumora pura-pura surodado, natoʼo i Yosua, “Ndapepombaikamo i mPue kota seʼi ri komi.” 17Kota seʼi sangkani pai waʼa banganinya sangaya-ngaya da ndagero pura-pura da mewali panyomba ri Pue. Podo i Rahabu weʼa anu bareʼe tumoro setu sangkani pai bangani banuanya anu maya ndapatuwu maka siʼa anu roo mantulungi tauta anu maʼi padaso. 18Bareʼe maya nditima bara nunjaa-njaa ungka ri pura-puranya setu paka da ndagero. Maka ane reʼe anu nditima, kareʼe mpokema nto Isaraeli da napere rugi pai kapari. 19Pura-pura aga-aga anu motaʼa salaka, wuyawa, tambaga pai besi inceʼe da ndapatani tila i mPue, pai da ndapakoroka ri kareʼe mpadika aga-aga i mPue.”
20 #
Ib. 11:30
Nepa natawuisi waʼa ntadu mpanyomba surupetanya. Butu nadonge nto Isaraeli oni surupeta setu mekiumo tau seʼe marimbo-rimbo, maruamo bente ngkota Yeriko. Pura-pura surodado nto Isaraeli meponemo masuaki kota marampa kota setu. 21Pura-pura tau bangani ngkota setu tuʼa, mangura, weʼa, tuama ndapepate pura-pura pai mata mpenai. Pura-pura pinatuwu japi, bimba pai kalide ndapepate.
22Natoʼo i Yosua ri tau radua anu maʼi padaso, “Ndikanjoʼumo ri banua mbeʼa anu bareʼe tumoro setu, pai keni mpesua siʼa sangkani pai tau bangani banuanya ewa anu roomo ndijanjika siʼa.” 23Njoʼumo kojo tau radua setu napoyunumo mesuwu ungka ri raya ngkota setu i Rahabu sangkani pai papanya, inenya pai waʼa ngkasangkomponya pai bangani ncomborinya sangkani pai waʼa anamayununya nakeni mesuwu ri sambaliku mpoʼiwali mosu ri kareʼe mpokema nto Isaraeli. 24Ungka lairia natunju ncurodado nto Isaraeli kota setu sangkani pai waʼa banganinya pura-pura. Podo aga-aga anu motaʼa wuyawa, salaka, tambaga pai besi inceʼe ndapasambaka ndakeni ri kareʼe pampakoroka aga-aga i mPue. 25#Ib. 11:31 Paikanya i Rahabu weʼa anu bareʼe tumoro setu sangkani pai waʼa ntinanya inceʼe natuwuri i Yosua, maka siʼa roomo mantulungi tau radua anu napokau i Yosua maʼi padaso ri kota Yeriko. (Nakarataka wawaseʼi ntongo reʼepa muli i Rahabu ri to Isaraeli.)
26 #
1 Raj. 16:34
Ri tempo setu napareʼe i Yosua tanga, natoʼo, “Isema ntano anu da mampebutuka mawali wangu muni kota Yeriko seʼi, da napere ntadeasi ungka ri mPue.
Isema anu madika pondasinya siʼa da tetaji ananya uyue,
pai isema anu mampataka waʼa dampo
baa-baanya da tetaji ananya anu kasupua.”
27I mPue maaweri i Yosua painaka tebambarimo toʼonya ri samalele ntana setu.
