YOSUA 5
5
1Pura-pura mokole nto Amori ri tondo kasoyoa ngKoro Yarade, pai pura-pura mokole nto Kanaa ri wiwi nTasi ri Tongo, mangadongemo mampakangaumo i mPue Koro Yarade, ri sindara pawote nto Isaraeli koronya setu. Painaka maekamo pai kandendemo tau seʼe mencuara to Isaraeli.
Popasuna ri Giligali
5:2-12
2Ri tempo setu ndatoʼo i mPue ri Yosua, “Powiamo watu ewa tibo nepa da nuwianaka upacara mpopasuna waʼa nto Isaraeli.” 3Nawianaka i Yosua songka i mPue, nasuna waʼa nto Isaraeli ri pongku ntana anu ndapapotoʼoka, “Pongku ntana Popasuna”. 4Ri tempo mpesuwu nto Isaraeli ungka ri tana Masiri, pura-pura waʼa ntuamanya roomo ndasuna. Paikanya ri tempo ngkateyoro-yoro ntau seʼe ri pada bone ri raya anu ompompuyu ntaʼu kasaenya, 5waʼa ana ntau seʼe anu tuama bareʼepa reʼe mau sambaʼa tau anu ndasuna. Pai ri tempo ngkagananyamo opompuyu ntaʼu setu. 6#Pai. 14:28-35 waʼa ntuama anu ri tempo mpesuwu ungka ri tana Masiri maintimo mantaka guma matemo pura-pura, ua bareʼe medonge ri songka i mPue. Inceʼe silulu pai pontandokoro i mPue, tau seʼe bareʼe ndawai mesua ri tana anu koreʼe pai maboko anu ndajanjika waʼa ntau piamo ntau seʼe.
7Inceʼe puʼunya painaka pura-pura ana tuama ntau seʼe bareʼepa ndasuna. Waʼa ntuama anu salapi seʼimo anu nasuna i Yosua.
8Karoonya pura-pura tau seʼe ndasuna, maroo-roopa tau seʼe ri raya ngkema rantani osa wela mpasuna. 9Ndatoʼo i mPue ri Yosua, “Sandeme seʼi tanda ngkasawatuami ri tana Masiri roomo kupalisi.” Inceʼe painaka tana sancuo setu ndapapotoʼoka Giligali nakarataka wawaseʼi.
10 #
Pa. 12:1-13
Sindara mpokema ri Giligali ri rato mosu Yeriko, to Isaraeli mawianaka Posusa Pasa ri ngkinowia kono ri sampuyu pai aopo eo mbuya setu. 11Bangke reme, inceʼe eo anu kaʼisa napangkoni ntau seʼe pangkoni anu ungka ri tana Kanaʼa, inceʼemo: roti anu bareʼe ndaragi pai tarigu anu ndatunu. 12#Pa. 16:35 Montepuʼu sandeme setu bemo reʼe roti mana anu tudu ungka ri yangi, pai meʼontomo to Isaraeli mangkoni roti mana. Montepuʼu ungka njairia tau seʼe mangkonimo wua mpinamuya ri tana Kanaʼa.
I Yosua pai sambaʼa tuama mantangke penai
5:13-15
13Ri anu sangkani sindara i Yosua melinja-linja mosu ri Yeriko. Tingkarasaka nakita tuama sambaʼa mekakore ri suaranya mantangke penai. Natimosuki i Yosua tau setu nepa napeoasi natoʼo, “Siko seʼi yunu bara iwali?”
14Mesono tau setu, “Banya yunu, pai banya woʼu iwali.” “Yaku rata ireʼi ewa tadulako ncurodado i mPue.”
Padonge i Yosua pompaunya ewanceʼe, liu-liu mombukotu manyomba siʼa ri tau setu, nepa natoʼo, “Yaku seʼi watuami pue. Nunjaa anu da kukoto mampowiaka komi pue?”
15Mesono tadulako ncurodado i mPue setu natoʼo, “Yali talupamu; tana kareʼe mpekakoremu setu tana magali.” Nayali i Yosua talupanya.
