HABAKU 3
3
Pekakai i Habaku
3:1-19
1Ewaseʼi pekakai i Nabi Habaku:
2Boo Pue Kudonge bambari mpowia-Mi,
painaka kuepe madonde rayaku.
Tuarapa powiami anu bangke setu da Ndiwali ntuju woʼu
pai da ndipowia woʼu ri sindara kami seʼi.
Mbolimo Ndipokapuru kami
mau rapanya mapane raya-Mi.
3Komi Pue Ala Anu Magali rata ungka ri Temani,
Komi rata ungka ri buyu mongkodo Parani.
Yangi nakulamuti mpeawami;
lino buke pai peunde tila-Mi.
4Komi rata pai rara anu mengkido-ngkido,
ungka ri dodo mpale-Mi mesuwu sindi anu makilaya,
njairia kareʼe ndipasambanika kuasa-Mi.
5Ndipokau juʼa melinja ri suara-Mi
pai kapate melulu ri taliku-Mi.
6Ane meʼonto komi mondende lino,
ane meole komi waʼa banca guaga.
Waʼa buyu anu lawi njaumo mabira;
waʼa pongku ntana anu rodo-rodo metaunaka,
ri waʼa mpongkuntana setumo pelinja-Mi ungka ipiamo.
7Kukita waʼa mpalili Kusani naperata eka,
pai to Mijea kandende-ndene.
8Boo Pue, bara ua katasinya painaka mapane raya-Mi?
Bara waʼa ngkoro ue anu mampakarau raya-Mi?
Ndipelamba limu ewa nyara pai kareta mpoʼiwali,
ri tempo mpawaimi penangi ri waʼa ntau-Mi.
9Ndipatikalimo gorosi mpana,
mata mpanami jamo da ndalapa.
Nepa lino ndibira mewali waʼa ngkoro ue.
10Mangkita Komi monjua waʼa buyu
ungka ri yangi tudu uja ewa ndabubu.
Ue ri ara ntana mogundu oninya,
roponya mobalumba pai moleke.
11Kampiri-mpiri poyokomata mpanami,
tawalami makilaya kampiri-mpiri,
painaka teʼontomo reme pai wuya ri kareʼenya.
12Ri kapane ndaya dilinjaki lino;
Ndilanda waʼa banca ua kapane ndaya-Mi.
13Komi ndeku ri suara da mangalapasaka waʼa ntau-Mi
pai da mangancorepaka mokole anu ndipilisi.
Ndiwombo madungka topombawanaka ntau baleparu,
ndisaewe pura waʼa ntaunya.
14Waʼa mata mpana-Mi mayosu tadulako ncurodado iwali,
sindara ngkarata ncurodadonya ewa lompiu,
da naka tewuraga kami.
Mogele mawongko raya ntau seʼe,
ewa tau anu ri ponjii-njii
mamparini tau anu makura katuwunya.
15Pai nyara-Mi ndilandasi daga
pai tasi bangke anu mowura-wura.
16Madonge incetu tengiri rayaku
kandende-ndende witiku.
Malente wukuku bareʼemo reʼe rosoku,
ri mbeʼi ntano da kanjoʼuku torarambe witiku.
Ri karodo ndaya da kupopea
popahuku mPue Ala ri waʼa ntau anu mopaungku.
17Mau rapanya puʼu ara bereʼe wuanya
pai puʼu anggoro bereʼe anggoronya,
mau ntano saitu bereʼe anu ndapota
pai wua gandu ri jamaa mampaka teloo raya,
mau waʼa bimba mate pura-pura
pai bonco mpinatuwu soa-soa,
18bareʼe da bali kawongkondayaku,
maka Komi Pue Ala toponcorepakaku.
19 #
2 Sem. 22:34, Pol. 18:33 Komi mawaika yaku roso,
ewa witi lagiwa, witiku ndapakaroso.
Komi anu mamponinika yaku naka uono
sindara mpelinja ri buyu mongkodo.
