HABAKU 2
2
Pesono i mPue ri Habaku
2:1-4
1Yaku da mepone ri menara mpojagaku, mampopea nunjaa anu da ndatoʼo i mPue ri yaku, pai ewambeʼi sononya ungka ri Sira kono peʼodeku.
2I Pue mangasono yaku ewaseʼi, “Wotimo yosa-yosa ri sangkomba tana mepuyu, nunjaa anu da kupatongawaka siko, da naka saru-saru ndabasa. 3#Ib. 10:37 Ukimo incetu, maka seʼi-seʼi banyapa temponya. Paikanya tempo setu da ratamo maliga-liga, pai nunjaa anu Kupatongawaka siko manoto da tepewali. Mau ndakita ewa da masaepa, paikanya popeamo! Tempo setu manoto da rata pai bareʼemo da teencu. 4#Rom. 1:17, Gal. 3:11, Ib. 10:38 Pai neʼe nukalingani; tau anu majaʼa bareʼe da tesorepaka, paikanya tau anu mawianaka pepokono mPue Ala da tuwu ua katodonya ri Pue Ala.”
Petadeasi tila ntau anu majaʼa
2:5-20
5Kakoreʼe setu bareʼe bali-bali mambambasi tau. Tau bagagu mekiunde pai bereʼe karodo ndayanya. Ewa kapate, siʼa seʼi bereʼe kaʼosa ndayanya; ungka ri banca anu sambaʼa njoʼu ri banca anu sambaʼanya napanggurarusi. 6Paikanya pura-pura anu napapeʼuru setu da mampanggeoni pai mampasinggiri siʼa. Da natoʼo ntau seʼe, “Pulorumo siko anu mabuyunaka aga-aga anu banya titi inimu! Sangkuja ngkasae woʼu siko da mampaka koreʼe koromu ri pamparinimu waʼa ntau anu moinda ri siko, da mangabayari indanya ri siko?”
7Paikanya bareʼe kono nuendo, siko anu mampapeʼuru tau ntaninya, da moinda woʼu pai da ndariso mabayari ana doinya. Waʼa iwalimu da rata mampakaeka rayamu. Tau seʼe da mangarampa aga-agamu! 8Siʼa roomo marampoki sondo banca, paikanya waʼa banca anu maleʼo lapa, da mangarampoki siko, ua waʼa mpepepate anu roomo nuwianaka pai kamasigarimu ri waʼa lemba, waʼa ngkota pai waʼa ntau bangainya.
9Pulorumo siko! Siko mampaka koreʼe bangani ncomborimu, pai waʼa rasi anu nurata ri kamasigarimu, da naka uono banuamu pai tewawence ungka ri kapari pai karugi. 10Paikanya rencanamu setu podo mangkeni ea ri raya ncomborimu. Ua parampokimu maria banca, inceʼe pdo mampareʼe rugi ri woto ngkoromu. 11Sakopa waʼa mbatu ri tembo meboo-boo mantadeasi siko, pai waʼa nono banua mampebooka woʼu peboo setu.
12Pulorumo siko! Siko mawangu kota merontana ri jaʼa nepa ndiwanguka pepeate. 13Waʼa banca anu napapeʼuru mampomapari anu bereʼe yowenya pai mpengaya-ngaya anu nawangu ntau seʼe pura nakoni apu. Pura-pura setu ndatunggai i mPue Anu Makuasa. 14#Yes. 11:9 Paikanya ewa tasi bangke anu nabuketi ue, ewanceʼemo lino woʼu da nabuketi pai pangaincani kono i Pue pai kuasaa.
15Pulorumo siko! Siko mampetikodi pai mampakaea waʼa ntau samposorimu; nupapewali tau seʼe molipo-lipo ewa tau mayangu. 16Seʼi-seʼi rata giliramu da ndapakaea, banya da ndatubunaka. Katetubunakamu da tebalisaka mewali bereʼe olinya. I Pue da mangariso siko mangainu ri tabo mpopahuku tilamu. Siko da manginu pai da molipo-lipo. 17Siko mangantowosi waʼa ngkaju ri yopo Libano, pai seʼi-seʼi siko ngkaliomu anu da ndatowo. Siko mangampepate waʼa mpinatuwunya, pai seʼi-seʼi waʼa mpinatuwu setu anu da mangaekasi siko. Pura-pura setu tepewali ua pepepate pai pejeani anu roo nuwianaka ri waʼa lemba, waʼa ngkota pai waʼa ntau banganinya.
18-19Pulorumo siko! Mompau ri kaju saowo, “Pembangumo!” bara ri watu bangke saogu, “Pakarosomo!” Ara da nakoto nturuki da mampompauka siko? Mau rapanya turuki setu ndaparada mbuyawa bara salaka, paikanya belau inosa ri siʼa. Nunjaa yowenya turuki lamoa setu? Incetu podo powia mpale ntolino. Anu da nurata ungka ri siʼa podo waʼa mbamba ngkabongo. Bereʼe yowenya peaya ndaya ntau anu mampowia lamo ri lamoa powia mpalenya, anu bareʼe nakoto mompau-mpau setu.
20I Pue reʼe ri Banua-A anu magali; mbolimo pura-pura tau ri sambawo lino da monjii ri suara-A.
