Kututika 25
25
Zinkombela za kutendesha Mwanya Wakuzila
(Kututika 35:4-9)
1Nyambi ya Ngula watongwezele Moshesha ngayi, 2“Ufundizize Baishalela ngayi bakatupule ntupu kukwami. Ukatambule ntupu ku bantu nimwabo eye bakatupula na mitima yabo nimwayo. 3Eze zintupu ukatambula, zikenga ngolinde na shiliva na lubemba, 4na makwiza amawahe a kulelema na wutonge wawuhombo na kufumbuluka na wakufubila na makwiza akutenda ha wushako wa bampongo, 5na bitembe bya bikungwe bya bambelele bya kulomba kufubila na bitembe bya bitutunga bya kunyuka na bitondo bya mumbambangoma, 6#25:7.na mazi a mimuni na lukumba lwa kuvwelesha mazi akuwaba na lukumba lwa kutendesha incence#25:6 Byengile makambombo a mutondo batwilenga pe ha kubiyoha byatutwishilenga livumba lyaliwahe. ya livumba lyaliwahe, 7na tumanya twatuwahe twa kulelema na tumanya twamina twa kulelema twa kuyaka mukakobelo ka shizila namu kambandingwa kaha kapumpo. 8Bantu ba ku fwanina kuntendela Ntanda ya Shizila, ngayi mwanga nikekale mukati kabo. 9Ukayitende na byuma byamo nimwabyo ngonehe ku shihanganiko shiya nikuku monesha.”
Likwati lya Kulimama kwa Nyambi ya Ngula
(Kututika 37:1-9)
10“Bakabaze Likwati lya Kulimama lya mutondo wa mumbambangoma, mu wutali walyo likenge mashentimita 114, muwipi walyo likenge mashentimita 69 namu mwimo walyo likenge mashentimita 69. 11Ukalifwike na ngolinde yayiwahe mukati naha munkanda na kuliyaka mufumo wa ngolinde wakulizingwilisha. 12Ukafule kami mahuzi alyo anaa a ngolinde yayiwahe na kuwayaka ku mawulu alyo anaa, mahuzi alyo abili akekala ku mbalila na mbalila. 13Ukabaze mibanda ya ku kulikila ya mutondo wa mumbambangoma, pe ukayifwike na ngolinde. 14Ukengize mibanda mu mahuzi aku zimbalila zibili za Likwati lya Kulimama. 15Mibanda yika shala hinga yakulikiwa mu mahuzi a Likwati, hinga yikafumishiwako. 16Mukayakiwe matapa abili mu Likwati lya Kulimama Likwati lya Kulimama lya wupaki aya nika kupanika aha hanatikitiwi mazu a Nyambi.
17“Ukafule kami muhuko wa nceshe wa ngolinde yayiwahe, wutali wawo wukenge mashentimita 114, muwipi wawo wukenge 69. 18Ukatende makelumbi abili akufula ha ngolinde ya ku shuma, 19likelumbi limo kunkumo na kunkumo ya muhuko. Ukawafule ngayi akenge shuma shimo na muhuko. 20Makelumbi bibumbwabumbwa bya kulifweka na mangeloyi bikalipenza limo na lyamina hayilu ya muhuko, pe mbando zawo za kutandubuka zikafwike muhuko. 21Ukayake matapa abili a wupaki mu Likwati, pe ukafwikeho muhuko hayilu ya Likwati. 22Niho nikaliwanina nenu hayilu ya muhuko wa likwati lya Kulimama lya wupaki, mukati ka makelumbi abili, nikamipana ndayano zami nimwazo ku bantu ba Ishalela.”
Tebulu ya mankende akutupwila kuli Nyambi
(Kututika 37:10-16)
23“Ukabaze tebulu ya mutondo wa mumbambangoma, ya mashentimita 91 mu wutali na mashentimita 46 muwipi na mashentimita 69 mu mwimo. 24Mukayifwike na ngolinde yayiwahe shikuma na kuyizingwilisha mufumo wa ngolinde 25Ukafule mubalo, wuliti wawo ngonehe shikandi sha liboko lya muntu, pe ukazingwilisheko mufumo wa ngolinde. 26Ukafulileko mahuzi anaa a ngolinde akuyikulikila na kuwayaka ku zinkomi zinaa za tebulu ku mawulu wayo. 27Mahuzi akukwata mibanda ya ku shimbila tebulu akayakiwile hahepi na mubalo. 28Wukabaze mibanda ya mutondo wa mumbambangoma na kuyifwika na ngolinde. 29Ukayitendele zindonga za kuhelukila na zindonga za kukunama za kuyaka incence na zinkomoki na zintesho za kutendesha nkombela na malovu a shinyanca. Nimwabyo ebye bikwatilo bikatendiwa na ngolinde ya ku shuma yayiwahe. 30#Bal 24:5-8. Ukayake mankende ashizila akutupula kukwami ha tebulu shikati nimwasho.”
Lyeyeko lya Mimuni
31“Ukafule lyeyeko lya mimuni lya ngolinde ya yiwahe shikuma. Ukafule kapona kalyo na mukoto walyo likenge lya ngolinde lya kufula na nyundo na zintemo zalyo za kuyengiwa za makolwa na zintemo, bikenge bya shuma shimo. 32Pe likekale na myahi mutanu na wumo yikashonkomana hahalyo kunkumo ya zimbalila, kumbalila yimo na yimo, myahi yihatu. 33Ku mwahi na mwahi wa lyeyeko, ku myahi mutanu na wumo kukekale zintemo zihatu za kuyengiwa za kufweka ngonehe alimonde za kushama na makolwa na zintemo. 34Kami lyeyeko lya mimuni likekale na zintemo zinaa za kuyengiwa za kufweka ngonehe ntemo za alimonde za ku shamuna na makolwa na zintemo. 35Pe ku myahi mutanu na wumo kukekale likolwa limo ku nceto ya mwahi na mwahi. 36Makolwa na myahi bikenga shuma shimo na lyeyeko lya mimuni, bikenge bya kufula na ngolinde ya yiwahe ya kufula na shikoma. 37Pe ukatende mimuni mutanu na yibili yaha lyeyeko lya mimuni, pe ukayimike ngayi yimunikenga mukati ka ntanda. 38Ukafule kami zimanya zalyo na mendeko walyo a ngolinde ya yiwahe. 39Ukatendeshe ngolinde yayiwahe ya wulemu wakukuma ku makilongilamu 34 ha kufula lyeyeko lya mimuni na bingwalingwali byalyo nimwabyo. 40Pe ukakeye ha kubitenda ngonehe shiya nakufundizizile ha lipili.”
ప్రస్తుతం ఎంపిక చేయబడింది:
Kututika 25: LLK
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Libuka Lya Kuyela © Bible Society of Zambia, 2020.
