Kututika 24
24
Kulimama ku kushumishiwa
1Nyambi ya Ngula wambile kuli Moshesha ngayi, “Yeka kukwami, obe na Aloni na Nandabi na Ambihu, hamo na bakakutwaminina 70 ba Baishalela. Oho mushili tuhu kantabule, shungumanenu hanci na kulamba. 2Obe tuhu ukahenyena kwakwipi na nami ninkayobe, ngoboni bantu hinga bakakandama ku lipili.”
3Moshesha wayile na kutongweza bantu mazu nimwawo a Nyambi ya Ngula na kufundiziza kwendi nimwako. Bantu nimwabo bakumbwile na lizu limo ngayi, “Nimo, tukatenda byuma nimwabyo ebye anamba Nyambi ya Ngula.” 4Moshesha watikitile mazu nimwawo a Nyambi ya Ngula. Oho kwashile lumenemene wazikile kaala ku nceto ya lipili, pe wayakileho mamanya a shanukisho likumi na abili a mishobo likumi na yibili ya Baishalela. 5Niho atumine bandumbana ba Baishalela, pe bahokeshele zinkombela kuli Nyambi ya Ngula, kami bakombelelele bimuna bimo kwinga zinkombela za kulilumikila. 6Moshesha washimbile shitika sha mukeza wa bimuna pe wawuyakile mu zindonga na kuyitila shitika shamina ku kaala. 7Niho ashimbile Libuka lya Kulimama omwe mwatikitiwile ndayano za Nyambi ya Ngula, pe walilabilile bantu na kukatula ku lizu. Pe bantu bambile ngayi, “Nimo, tukatenda nimwabyo ebye anatutongweze Nyambi ya Ngula na kumwombatala.”
8 #
Mat 26:28; Mako 14:24; Luka 22:20; 1Koli 11:25; Bah 9:19-20; 10:29. Niho Moshesha ashimbile mukeza mu zindonga pe wawumyanzilile ha bantu. Wambile ngayi, “Ou niwo mukeza wakushumisha Kulimama oku anatende Nyambi ya Ngula nanenu aha amipanine eze ndayano nimwazo.” 9Niho Moshesha na Aloni na Nandabi na Ambihu na bakakutwaminina ba Ishalela makumi mutanu na abili bakandamine ha lipili, 10pe bamonene Nyambi wa Ishalela. Mu nceto ya mawulu wendi mwamonekele ngo limanya lyaliwahe lya kulema lya shafwila lya kulembuka, lya wuhombo ngo liyilu. 11Nyambi kaliha watendele shibi aba bantu bakakutwaminina Ishalela, bamonene Nyambi, pe balile na kunwa.
Moshesha ha lipili lya Shinayi
12Nyambi ya Ngula wambile kuli Moshesha ngayi, “Wize kukwami hano ha lipili, wutatililengaho, pe nika kupana matapa a mamanya hali ndayano zami na mulao ou natikitiho ku longesha bantu.” 13Moshesha waliwahishile na Yoshuwa mukakumuyavwa, pe Moshesha wakandamine ha lipili lya Nyambi. 14Moshesha wambile kubakakutwaminina ngayi, “Tutatililenu muno mu munkungwa hantu tunaboko. Tunamishiyi na Aloni na Hula, muntu nimwendi uli na shambo ukutwesha kuya kukwabo.”
15Niho Moshesha akandamine ku Lipili lya Shinayi, pe likumbi lyafwikile lipili. 16Kubyazima kwa wuwahe wa Nyambi ya Ngula kwezile ha lipili lya Shinayi, pe likumbi lyafwikile lipili matena mutanu na umo, pe ha mutena wa mutanu na abili Nyambi ya Ngula wehanine Moshesha mu likumbi. 17Kubyazima kwa wuwahe wa Nyambi ya Ngula kwamonekele ngo mundilo ukubanga hayilu ya lipili ku bantu ba Ishalela. 18Moshesha wakandamine hayilu ya lipili, pe wenginine mu likumbi. Wekalileho matena makumi anaa.
ప్రస్తుతం ఎంపిక చేయబడింది:
Kututika 24: LLK
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Libuka Lya Kuyela © Bible Society of Zambia, 2020.
