Ezekieli 32
32
1Na ga duka mu muhiga gwelikumi na gyiviri, ku mweli gwelikumi na gyiuiri, ku lidiku lyokutanga lyomweli, likuva lya Yahova lya duka ku inze, kuvola, 2Ive mwana womundu, u syomere Farao mwami wa Egepeti, na u mu volere, Ive wa fwananywa neking'ang'a ki soleli kyavetsihiri: navutswa u fwanana noguyoka mu tsinyanza; na vizulira nemigera gyigyo, na wa duvula amadzi nevirenge vivyo, nokukola migera gyavo midamano. 3Mwami Nyasaye a vola ndi: Nda vika miluvo gyange ku ive ku bunyingi bwavandu; na va la ku luva mu muluvo gwange. 4Na nda ku leka ku lirova, nda ku ta kyova mu mulimi ku bulavu, nda leta manyonyi gosi gombwerefu gadze kugwa ku ive, ndigutidza tsinyama tsyelirova lyosi ku ive. 5Nda vika inyama yoyo ku vigulu, nokwizulitsa mavona ubu tambi bubwo. 6Kandi kivala kya u kindidzanga mu, nda ki nwehidza masahi gogo kuduka ku vigulu; nemigerera gyi lizulwa nive. 7Na lwa nsiminya ive, nda kunika ligulu, netsing'ering'ani tsyalyo, nda tsi kola kisundi; na liuva nda kunika nelilesi, nomweli gu la vula kwaaka. 8Ubulavu bwosi bwemigulu bwaakanga, nda bu kola kisundi ku ive, na nda vika kisundi mu kivala kikyo, Mwami Nyasaye a vola. 9Kandi nda vihiriridza myoyo gyetsihiri tsinyingi, lwa ndeta lidividzwa lilyo hagati hetsihiri, mu vivala vya ive u kikiri kumanya. 10Yee, nda kola avandu va genyere ive, navami vavo va la tia ligali kigira ive, lwa nsung'usa kivavi kyange imbiri wavo; na va la degera tsinyinga tsyosi, mundu sa mulala kigira livamwoyo lilye, mu lidiku lyeligwa lilyo.
11Kigira Mwami Nyasaye a vola ndi: Kivavi kyomwami wa Babuloni ki la duka ku ive. 12Nda kola bunyingi bwavandu vovo va gwe ku kivavi kyavetsingulu; vosi va veye avatihidzi vetsihiri: na va lononnya luyai lwa Egepeti, nobunyingi bwakyo bu la dividzwa. 13Kandi nda divi dza tsinyama tsyakyo tsyosi tsi twule ku luginga lwa madzi manyingi; kirenge kyomundu si ki la ga duvula kandi, kandi tsimbagayu tsyetsinya ma si tsi la ga duvula kandi mba. 14Hene yaho inze nda kola amadzi gavo kuva amalengeru, nemigera gyavo nda gyi kola kugenda kuli amagu ta, Mwami Nyasaye a vola. 15Lwa ndi kola kivala kya Egepeti kuva batswa na kyere, kivala kyobudaka, yikyo kyeizula mu, lwa nda kuya avandu vosi va menyanga mukyo, hene yaho va la manya inze mbeye Yahova. 16Yili ni lisyoma lya va li syoma kukyo; avakana vetsihiri va la ki syomera nalyo; kandi ku Egepeti, noku ubunyingi bwa avandu veve, va la syomera nalyo, Mwami Nyasaye a vola.
17Na ga duka mu muhiga gwelikumi na gaviri, ku lidiku lyelikumi na gatano lyomweli, likuva lya Yahova lya duka ku inze, kuvola, 18Ive mwana womundu, u lirire ubunyingi bwa Egepeti, u va sigise hasi, kali uyu, navakana vetsihiri tsyobukumi, kuduka hasi ligali mu lirova, halala na yavo avikanga mbogo. 19Ive u vita bwaha nobulahi? Yika, walirwe halala navasindi. 20Va la gwa hagati ha yavo aviitwa nekivavi: uyu wa vikwa ku kivavi; u mu kwese hasi halala nobunyingi bwibwe bwosi. 21Avetsingulu mu yavo ava nyala va la mu volera kutwula hagati he Kihadisi halala na yavo ava mu konyanga; va sulunguti, va gona makiriri, kali avasindi, viitwa nekivavi. 22Ashuru a veye yo halala nobunyingi bwavandu veve vosi; vilindwa vivye vya mu kumbiridza tsimbega tsyosi; vosi viitwa, va gwa ku kivavi; 23avevilindwa vyavo vya vikwa ku luvega lwehale lwobogo, nobunyingi bwavandu veve bwa kumbiridza kilindwa kikye; vosi viitwa, va gwa ku kivavi, yavo ava kola litihidza mu kivala kya yavo ava veye mwoyo.
24Elam a veye yo nobunyingi bwosi bwavandu veve va kumbiridza kilindwa kikye; vosi viitwa, va gwa ku kivavi, avika ni va veye avasindi vingira hasi ligali mu lirova, ava kola litihidza mu kivala kya yavo ava veye mwoyo, na va ginga tsisoni tsyavo halala na yavo avikanga mbogo. 25Va mu vikira kitali hagati ha yavo aviitwa halala nobunyingi bwavandu veve; vilindwa vivye vya mu kumbiridza tsimbega tsyosi; vosi va li avasindi, viitwa nekivavi; kigira litihidza lyavo lya kolwa mu kivala kya yavo ava veye mwoyo, na va ginga tsisoni tsyavo halala na yavo avikanga mbogo: uyu ya vikwa hagati ha yavo a viitwa. 26Mesheki a veye yo, na Tubali, nobunyingi bwosi bwavandu vavo; vilindwa vyavo vya va kumbiridza tsimbega tsyosi: vosi va li avasindi viitwa nekivavi; kigira va kola litihidza lyavo mu kivala kya yavo ava veye mwoyo. 27Navo si va la gona halala na yavo avobunyali ava gwa ku yavo avasindi, ava sulunguta mu Kihadisi halala nevyuma vyavo vyobulwani, na va viki vivavi vyavo isi wemitwe gyavo, nobudamano bwavo bu veye ku vigumba vyavo; kigira Da li litihidza lya yavo avobunyali mu kivala kya yavo ava veye mwoyo 28Navutswa ive u la vunannyirwa hagati ha vinsindi, na u la gona na yavo aviitwa nekivavi.
29Edom a veye yo, avami veve, navanene veve vosi, mu bunyali bwavo va mali kwalirwa halala na yavo aviitwa nekivavi: va la gona halala navasindi, na yavo avikanga mbogo 30Va veye ho avanene va kasikazini, vosi kuvo, na Vasidone vosi, avika halala na aviitwa; mu litihidza lya va kola nobunyali bwavo va nyoye tsisoni; na va gonanga ni va veye avasindi halala na yavo aviitwa nekivavi, na va ginga tsisoni tsyavo halala na yava avikanga mbogo.
31Farao a la va lola, na a la leminywa mwoyo ku bunyingi bwosi bwavandu veve, kali Farao nelihe lilye lyosi, viitwa nekivavi, Mwami Nyasaye a vola. 32Kigira mbiki litihidza lilye mu kivala kya yavo ava veye mwoyo; naye a la vikwa hagati ha vasindi, halala naviitwa nekivavi, kali Farao nobunyingi bwosi bwavandu veve, Mwami Nyasaye a vola.
ప్రస్తుతం ఎంపిక చేయబడింది:
Ezekieli 32: MBE
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©Bible Society of Kenya, 1967
