John 9
9
Jisü no Apunu lono Anhethi Iche kemi lakhi Shipivi
1Pa no wuche kelo anhethi iche no punú kemi lakhi ithulu. 2Pa khopemiqo no pa vilo iniju, “Rabbi! Khuu no axiné shive no pa ye anhethi iche püzü punú kea, pa no keo pa pù-azá no kea?”
3Jisü no khochile, “Timi hipau xiné momu pa pù-azá xiné ghenguno kumoe! Ikemu hi shive keu ye pa vechewo akughushu Lhou kümlà pephe piye niye ke. 4Atsala vüqai ake kutólo ningu ye khuu ipuwu keno pa kümlàqo shia moayesae. Putho tsalà wochea, eno tiye khunomu akümlà shimla nani. 5Ino ayeghi lo ake dolo, ni ye ayeghilomi küvü ke.”
6Hi pive kethiu pa no ayeghi lo amití müsüqhi no pesü aniba kunú püzü anhethi kighicheu nhethi lo nùtsü. 7Jisü no pa vilo pi, “Wulo eno Siloam zükhe lono qhukimthevelo!” (Siloam kiqi ye puwu keu). Ikehu timi hu no wu püzü pa gi phave, eno aki lo ideighi kelo pa ye ithuluve.
8Pa kisüghümiqo eno püzüu pa no khuchu che kelo ithi akeqo no ishi iniju, “Timi hipau ye iqa püzü khuchu chekeu ke kumo keshea?” 9Khami no pa ye timi tipau ke ipie.
Kütamiqo no, “Kumoe! Pa ye hupau kimihiue,” ipie.
Ikemu pa likhi pa no tsümomo pi, “Timi tipau hu ye ni ke.”
10“Tishiaye kíshi no onhethi tsükholuvea kea?” ipi panoqo no iniju.
11Pa no khochile, “Panongu no Jisü ipi ku chekeu timi hu no aniba hami kunú pesü inhethi lo nùtsüe. Pa no ivilo wu no Siloam lono qhukimthevelo ipi. Ike ino wu no mitheve kethiu ni ye ithuluvae.”
12Panongu no iniju, “Timi tipau ye khila ani kea?”
“Ni ye müthae,” ipi pa no khochile.
Phariseemiqo no Shikipivi Vehu lo Phukuju shikeu
13Panongu no anhethi iche no punú keu hu Phariseemiqo lau süghi. 14Ike Jisü no aniba kunú pesü timi tipau nhethi khaqhitsü keu ye Sabbath tsalà ke. 15Tighenguno Phariseemiqo ghí pa vilo kíshi no pa ye ithuluve keno ighiju. Timi hu no khochile, “Pa no inhethi lo aniba nùtsü eno ino azü pesü qhukimtheve kelo ni ye itehi ye ithuluvae.”
16Phariseemiqo khami no pi, “Timi hipau ye Alhou lau no ighi kemi kumoe, kughengu pa ye Sabbath tsalà ikhilu amoe.”
Ikemu kütamiqo no iniju, “Kíshi no axinemi lakhi ye amichipu kümlà hitoi keqo shilu nani kea?” Ikehu panongu dolo kijethave.
17Tisheno panongu no itaghi anhethi kighicheu lau kugho ighi no iniju kìthe, “Pa no onhethi khaqhitsü ke, no ye pa ghili kiu pi kepu ani kea?”
Timi hu no pi, “Pa ye Tungkupumi lakhie.”
18Panongu ye anhethi kighicheu pù-azá ku süghimo ke kutólo pa ye anhethi iche ache no ithuluve kepi pülü müla no ake. 19Panongu no ighiju, “Hiye nokujo pú keshea? Anhethi iche no punú ipi nokujo no pikeu ye hi keshea? Pa ye kíshi no itehi ye ithuluvea kea?”
20Anhethi kighicheu pù-azá no ishi khochile, “Pa ye ni pú kepi nino ithi ani eno pa ye anhethi iche no punú kepi nino ithi anie. 21Ikemu pa ye itehi ye kíshi no ithuluvea momu khuu no pa nhethi khaqhive tsü akeno nikujo ye müthae. Pa vilo iniju lo. Pa ye kichimi shivae eno pa ye pa likhi pa ghenguno pilu nanie.” 22Anhethi kighicheu pù-azá ye Jewmi sakiphemiqo kümsà lau no hi pike, kughengu Jewmi sakiphemiqo ye azüu no khukhumu Jisü ye Messiah kepi ikhilu kemi ye synagog lono hapheve nikeu shi xakütha shipepüa ke. 23Tighenguno pa pù-azá ye, “Pa ye kichimi shivea ke; pa vilo inijulo,” ipi ke.
24Panongu no ghuthu akiniù anhethi iche no achekeu hu kusü püzü pa vilo ishi pi, “Amikucho tsà pikeu vechewo Alhou juküvü shitsülo. Ningu no ithi akeu no timi hipau ye axinemi ke.”
25Pa no khochile, “Pa ye axinemi keo kumo keno ni ye müthae. Ikemu ino thime lakhi ithi anie. Ike tiye, ni ye anhethi iche no ache ikemu itehi ni ye ithuluvae!”
26Ikelo panongu no pa vilo iniju, “Pa ye olau kiu shi kea? Pa ye kíshi no onhethi khaqhitsü kea?”
27Pa no khochile, “Ino nongu vilo pivae ikemu nongu no inimo ke. Nongu ye kushiye itaghi chilu nishi ani kea? Nongu ghí pa khopemi shinishi ani keshea?”
28Ikelo panongu no timi hu shikukujoqhi no pi, “No ye timi hipau khopemi ke! Ningu ye Moses khopemiqo ke! 29Ningu ye Alhou no Moses pütsa keu ithi anie, ikemu ningu ye timi hipau ye khilau no ighi keno ti ghí müthae.”
30Timi hu no khochile, “Ya tiye akichiqhie na! Nongu ye pa ye khilau no ighi keno mütha, ikeghi pa no inhethi khaqhitsü ke. 31Ningu no ithi akeu no Alhou ye axinemiqo kighini chilutsü chemoe. Pa ye khuno no Alhou sümsa no pa gholu cheni keno tipaqo kighini chilutsü chenie. 32Khunomu anhethi iche no punú kemi lakhi nhethi khaqhitsü keu ghili chilu miphie. 33Tsalá timi hipau no Alhou lau no ighimo kemi shi aghí aye, pa ye kiumu shimlae.”
34Hipau lo panongu no khochile, “No ye apunu lonomu axiné lo thonhei acheke; no ye kíshi püzü ningu kütsü ani kea!” Tisheno panongu no synagog lono khalau pa hapheve.
Aghungú lo Anhethi Kighichemi
35Phariseemiqo no anhethi iche no achekeu hu hapheve ipikeu Jisü no chilu, eno kughou Jisü no pa ithulu keno pa vilo iniju, “No ye Timi Nu shou pülübe anima?”
36Timi hu no iniju, “Akijeu, pa ye khuu kea? Ivilo pilo tishiaye ino pa shou pülübe kepu shinike.”
37Jisü no pi, “No ye itehi pa ithuluvae; kuchou lo ye opütsa akeu hu no pa ke.”
38Ikelo timi hu no, “Ampeu, ino pülübe ani,” ipi püzü pa no Jisü müláe.
39Jisü no pi, “Küghakütha ghenguno ni ye ayeghi hipau lo ighike, tishianguno anhethi kighichemi pelo ithulu pe eno ithulu akemi pelo anhethi kighichemi shive peniye ke.”
40Phariseemiqo hami pa gholo ngo akemiqo no hi pikeu chilu püzü pa vilo iniju, “Kíshie pia? Ningu ghí anhethi kighichemi ya?”
41Jisü no pi, “Nongu no anhethi kighichemi shi aghí ke aye, nongu ye axiné kipimí aghimoni cheke, ikemu itehi ye nongu no ithulu ani ipi pükha ani kehu nongu kipimí ye aniae.”
ప్రస్తుతం ఎంపిక చేయబడింది:
John 9: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
