John 10
10
Ambekheu Kiviu eno Pa Mibeqo
1“Phariseemiqo! Ino kuchou tsà nongu vilo pìní, khuu no ambe khagho lono ambe khaküthabo lo ilomo püzü alaghi kütau lono milisü iloghini keno, pa ye küpkami eno süxakulumi lakhie. 2Khuu no khagho lono iloghini keno pa ye ambeu kheu ke. 3Khagho kheu no pa ghenguno khagho khaqhitsü cheni, eno ambe no pa sütsa chilu cheni. Pa no ajeku ghí pa mibeqo ku püzü panoqo sasü khalau ipe cheni. 4Kughou pa no paw ambeqo kümtsü khalau sasü ipeghiveni keno, pa no panoqo züu shi no wucheni, eno paw ambeqo no pa pape cheni kughengu panoqo no pa sütsa ithi anike. 5Ikemu panongu ye khilemu tüsümi papemo nani ikemu panongu ye tüsümi lau no pove nani, kughengu panongu ye tüsümi lakhi sütsa kimchilu chemo ke.” 6Jisü no kimghi keu tsà hipau peitha ghi pi, ikemu Phariseemiqo ye Jisü no panoqo vilo kiu pi akeno vethamlave.
7Tighenguno Jisü no itaghi pi, “Ino kuchou tsà nongu vilo pìní, ni ye ambeqow khagho ke. 8Izüu ighi kemi kümtsü küpkami eno süxakulumiqo ke, ikemu ambeqo ye panoqo tsà initsü moe. 9Ni ye khagho ke; khukhumu ivechesü ilo kemi ye sükusho anani. Panongu no iloghi eno ipeve anani eno atsüni kümtsha phulu nani. 10Küpkami ye püka, heqhipithí eno kütsakungo nike ghengu likhi no ighi cheni; Ino ighi keu ye panongu pelo aküxü ape niye ke, eno aküxü tipau hu kupukuno shi ape niye ke.
11“Ni ye ambekheu kiviu ke. Ambekheu kiviu ye ambeqo ghenguno pa küxü tsüve cheni. 12Aqekiqemi ye akheu kumo ke eno ambeqo pighi chemoe. Ike kughou pa no tüngtügha chekeu ithuluni keno pa ye ambeqo likhi qhive no pove cheni. Tisheno tüngtügha no ambe lojiqo le no hapiyepighive tsü chenie. 13Timi hu ye pove cheni kughengu pa ye aqekiqemi ke eno pa ye ambeqo ghenguno kiumu tucho-mujo chemoe.
14“Ni ye ambekheu kiviu ke; Ino imbeqo ithi ani eno imbeqo no ni ithi ani— 15tiye I Pù no ni ithi eno ino I Pù ithi akeu toi ke—eno ino ambeqo ghenguno iküxü tsüve cheni. 16Ni ye khaküthabo hilehi küha keu ambe kütauqo anie. Ni ye panongu ghí süghi moayesa ani. Panongu ghí isütsa iní nani, eno tilehi ye ambe loji lakhi ngò ambekheu lakhi anani. 17I Pù no ikimiye keu hu ye ino iküxü pesü tsüve keu ghenguno ke—tiye xüleputhuve nikeu ghengu likhi no aküxü tsüve ke. 18Khunomu ilau no aküxü ikhiluve mülae, ikemu ino ighoshi no ikhiphe pe tsüve anike. Ni ye ikhiphe pe tsüni keu ngò ikhi chileluve kepu kükagha anie. Ni ye I Pù lau no azakütsü hipau ithulu ke.”
19Jewmi khunoqo no atsa hipaqo chilu keno itaghi panongu dolo kijethave. 20Panongu kutomo no pi, “Pa ye tüghaküsa no tsüghape akemi eno aghüzünikhami ke. Kushiye pa tsà iní ani kea?”
21Ikemu kütamiqo no pi, “Atsa hipaqo ye tüghaküsa no tsüghape akemi no piche keu tsà kumoe. Tüghaküsa ye anhethi icheve kemi nhethi xukhotsülu nani keshea?”
Jisü no Pükha Keu Vehu lono Alau Küpüna Keu
22Ikelo Jerusalem lo Ikhiphekütsü Tiqhitini#10:22 Hiye Hanukkah ghí pi cheni. Hiye Syriami no ampe küthü kutólo Jerusalem chineki shipüthave tsükeu ikhiphekütsü shikithe keu tiqhitini ke. Atsala tache kutólo pinyi no Jewmiqo kümtsü no alokivi kijè shi chekeu do lakhi ke. tsalà ghuloki tove. Tiye süsü ghuloki shia, 23eno Jisü ye achineki khalau Solomon ki sheqho lo alà che ghi ae. 24Tilehi Jewmi akemiqo no pa homüxaluve no pi, “No ye ado khitohi ningu pelo avehu küghüzü shi apeni kea? Tsalá nono Messiah shi aghí aye mütsümishei ningu vilo pilo.”
25Jisü no khochile, “Ino nongu vilo pike, ikemu nongu no pülümoe. Ino I Pù je lono mülà keqo hu no ishepe shitsü cheni, 26ikemu nongu no pülümoe, kughengu nongu ye iw ambeqo kumo ke. 27Iw ambeqo ye isütsa chilu cheni; Ino panongu ithi ani, eno panongu no ipape cheni. 28Ino lhokta küxü panongu tsü, eno panongu ye khilemu pühavemo nani; khunomu i-u lono panoqo süxa pewumo nani. 29I Pù khuu no panoqo pesü itsü keno pa ye kümtsü nguno akijeu ke; khunomu I Pù u lono panongu süxa müla nani. 30Ni eno I Pù ye lakhi ke.”
31Itaghi Jewmi pa lachile chekemiqo no atu pesü pa ve nike ikhiqheluve, 32ikemu Jisü no panoqo vilo pi, “Ino I Pù lau no akümlà kivi kutomo nongu piyevae. Tipaqo ghenguno nongu ye atu pesü iveqhi niye ani keshea?”
33Panongu no khochile, “Ningu ye akümlà kivi ghenguno atu pesü ove niye shi amoe, ikemu Alhou pipütha keu ghenguno ke, kughengu no ye timi lakhi keghi Alhou kepi pükha ke.”
34Jisü no panoqo khochile, “Nongu Yeza lo, Alhou no Alhou tsà süghi kemiqo vilo ‘Ino nongu ye “alhouqo,” ke ipi piva, ishi yèpüani ke kumo keshea?’#10:34 Leshe 82:6 35Tsalá pa no Alhou tsà süghi kemiqo vilo ‘alhouqo,’ ipi ku cheni aye—Kuchoyesü ye akou qhivemlae— 36Imaye ni ye Apù no pa likhi paw shi ghi pakütashi qhive no ayeghi lo puwu keu ye kíshiveni kea? Tishiaye nongu ye kushiye ino, ‘Ni ye Alhou nu ke,’ ipikeu ghenguno ni ye Alhou pipütha ani kepi inguku ani kea? 37Ino I Pù kümlàqo shimo ke thaqhülo ipülü kevilo. 38Ikemu tsalá ino tipaqo shi aye nongu no ipülümo namu ikümlàqo pülülo, tishianguno nongu no Apù no ilolo akeu eno ino Apù lolo akeu ithi no vethalu nani ke.” 39Itaghi panongu no Jisü küghaluve niye pükapütsa, ikemu pa no panongu u lono pokajoluve.
40Tisheno Jisü ye John no hukuthu lo Jordan qhalo baptiz shi chekeu küdau idechile wove. Pa ye tilau ngove, 41eno timi kutomo no pa lau ighi. Panongu no pi, “John ye khilemu amichipu kümlà lakhimu shimoe, ikemu pa no timi hipau ghili pikeu kümtsü kuchou ke.” 42Ikelo tipau-a lo timi kutomo no Jisü pülüluve.
ప్రస్తుతం ఎంపిక చేయబడింది:
John 10: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
