Apostolmi 27
27
Paul no Zükilu lono Rome lo Wuve
1Kughou ningu Italy lo wuve nikeu shi kughuve keno, Paul ngò akughumi kütami khamiqo ye aqhe shou zatsüu Julius ipi no Rome Kükaqha kükau ghüshimi muqo lo achekeu pelo sawu penikeu shive. 2Ningu ye Adramyttium lono ighi keu zükilu lo ikuve eno tiye Asia bocho lo wu niye shi akehu ningu ye azüghi lono cheve. Aristarchus khuu Thessalonica lono ighi eno Macedoniami keno pa ghí ningu gholo che.
3Tishiwo thoghiu ningu ye Sidon toluve; ikelo Julius no Paul küpüqhiyi kehu, pa no avehupu shi akeqo tsüpe niye pa küsàmiqo lau wulu pe. 4Tile no ningu ye itaghi cheve eno Cyprus züdoyeghi vechesü wuve, kughengu amlhü no shishe ningu fuchile ake. 5Kughou ningu no Cilicia ngò Pamphylia küma ghüngü lono azüghi kathasü wu keno, Lycia lo Myra ipikeu-a toluve. 6Tilehi aqhe shou zatsüu no Alexandriamiw zükilu Italy lo wuche keu phulu kehu ningu pelo tilehi ikuvepe. 7Ningu ye aveküsa shiche no atsala kutomo thiu no akushukulu Cnidus phughi kupunú lo ighilu. Kughou amlhü kümka ghenguno tilehi ngo mülave keno ningu ye Salmone ghüngü lo Crete züdoyeghi küdau wuve. 8Ningu ye aveküsa shi azüghi mükü küdau no chesü mishiphu lakhi Lasea ipikeu phivilo zükilu kungo-a lo ighilu.
9Ado kutomo puwove eno zükilu sasü wuni keu ighono kümsapu shive kughengu tiye Aghakishi Tsalà#27:9 Achine 23:27 lo Yom Kippur ipi no Jewmi no peitha chekeu tsalà ke. shio thoghiu shi ake. Ikehu Paul no panongu pikichive ghi ishi pi, 10“Aküsàmiqo, ino ithulu akeu ye ningu kicheghüzü lo amhekiqipu kijè sholuni cheni, eno ninguw zükilu ngò anhemgha pù chekeu likhi kumo no ningu küxüu ghí pühave kepu shiveni chenie.” 11Ikemu aqhe shou zatsüu no Paul no pikeu tsà iní tsümo no zükilu küsáu ngò zükilu mipeu pama no mijetsü keu tsà inive. 12Zükilu kungo-a tipau ye süsü tusho ghenguno alomoe, ikehu ningu gholo chekemiqo akichiù no ningu ye Phoenix ipikeu-a lo wuve püzü tisheno süsü tusho tilau no puwove moayesa ke ipi xakütha shie. Phoenix hipau ye Crete lo zükilu kungo-a lakhi eno tiye ahuu eno apéu pishipuwo ithukulupu-a ke.
Pasapagha Sholu keu
13Kughou apéu mülhü no asheshi no fu thuve keno panongu no adokivi lu ghi akütshüpu yì süjo pukuluve no Crete kupunú lo azüghi mükü lono wuve. 14Kushuwa wu miphi lono pasapagha lakhi ahuukipela mülhü ipikeu no paküta keu shi züdoyeghi lono fudaqhisü ighive. 15Ninguw zükilu ye amlhü no fuchile pesü ngove eno azüu wumlave; ikehu ningu ye amlhü no fu keu gholau no wuche. 16Ningu no züdoyeghi kitila Cauda ipikeu kathasü wuche kelo ningu ye akushukulu ashukati akeu sünhekideluve, 17ikehu tilehi akemiqo no ashukati pukuluve. Tisheno akighí pesü zükilu gholo alou aqoshi mutotoi tshüdape qhiluve. Kughengu panongu ye Syrtis zümükü lo asàye küdau posü wu no anibakutho lo meve nikeu müsà akehu, akütshüpu yì aqhou piqive no amlhü gholau no zükilu fu sasü wuche. 18Pasapagha kijè no ningu sükuchoqhi kehu, thoghiu ye panongu no anhemgha xapu chekeqo pesü azü lo vesü thuve. 19Atsala aküthüniu panongu no zükilu nhemghaqo hami ikhi pesü azü lo vesüve. 20Kughou atsala kutomo khetsünhe momu ayepuqo ithumlave no pasapagha no tamo ighi auve keno, ningu ye xülu nani ipikeu lajupu kiumu kühave ke.
21Ningu ye achuqupu kühave no ado kushuwa chumove kethiu, Paul no ningu zülo puthugho no pi: “Aküsàmiqo, nongu no itsà inive no Crete züdoyeghi lono wumove ke aye ningu ye hitoi amhekiqi eno shiküpsa sholumoni cheke. 22Ikemu itehi ye ino nongu qhüiniju ani eno amlo mutolu penike shikumto ani, kughengu nongu lakhimu pühavemo nani; ikemu zükilu likhi kütsave nani. 23Kughengu iküxü mpeu eno ino qe che keu Lhou no paw kungumi lakhi ìji inaputhou no iphivilo puthugho 24püzü ishi pi, ‘Müsà kevilo, Paul. No ye Caesar zülo puthugho no otsa kügha moayesa nani; eno Alhou no paw küpükini vechewo ogholo zükilu lo chekemi kümtsü pesü otsüvae.’ 25Tighenguno aküsàmiqo, amlo kumtoshi lulo, kughengu ni ye Alhou lau pülükibe ani eno pa no ivilo pikeu toi tishi nani ke. 26Tishi namu, ningu ye posü züdoyeghi hami lo ayeghi shou iku ngoluve moayesae.”
Zükilu Kuboleve keu
27Atsala chighí abidiu kutólo ningu ye amlhü no fu pesü Adriatic züghi#27:27 Hiye Italy apéu küdau azüghi akeu pesü pi cheni. lo che, eno kughou zübumta shi akeno, zükilu küsàmiqo ye ayeghi kupunú lo ighilu akeu ghola ithive. 28Ikehu panongu no akimighipu pesü piqiju kelo azü kuthò ye aunhekipishe aqhe no muku#27:28 Momu meter 37 qhau. aghí. Ado hami thiu panongu no itaghi mighiju kelo aunhekipishe lhotoku#27:28 Momu meter 27 qhau. aghí keu phulu. 29Ningu ye atuqo lo shopukuve nikeu müsàve kehu panongu no zükilu athikhau küdau no akütshüpu yì bidí aqhou piqive no atsala küvü ipeghi penike inikhu khea. 30Zükilu lono itshüsü pokajove nike ghenguno zükilu küsámiqo no akütshüpu yì aqhou piqi ke ghili shi püzü tshüpüa keu lono ashukati kuqho pesü azü lo piqive. 31Ikehu Paul no aqhe shou zatsüu eno ghüshimiqo vilo pi, “Timi hipaqo no zükilu gholo ngomo kelo nongu ye xü müla nani.” 32Ikehu ghüshimiqo no tshü pesü akeu akighíqo ghithave kelo, ashukati ye azü no qopesü wuve.
33Inaqhe vüipeghi nike zülo Paul no panongu kümtsü pelo achuqu chu penike hakite. Pa no pi, “Ishí atsala chighí abidiu kutólo nongu ye amlo kichipüha ighivea eno achuqupu kühave kehu kiumu chumovea ke. 34Itehi ye ino nongu pelo achuqu hami likhimu chu penike hakite ani. Nongu ye xülu nike ghenguno chu moayesae. Nongu khumu akütsüsa lakhimu pühamo nani.” 35Pa no hi pive kethiu, asho hami ikhilu eno panongu kümtsü gizü lono pa no Alhou shikimthi tsü. Tisheno pa no asho süpho no chu thuve. 36Panongu kümtsü shikumtoluve eno panongu kutoshi no achuqupu hami chuve. 37Zükilu lo ningu kümtsü aqó lo timi 276 che. 38Kughou panongu no chunishi ke thaqhü chuve keno, zükilu kümthüve niye athikishi xapu chekeu pesü azüghi lo pele sǘve.
39Kughou atsala vü ipeghive keno panongu ye ayeghi kimchi mülave, ikemu azü no vehoilo keu cheku gholo aniba mükü akeu lakhi ithulue, ikehu tokulupu shi aye posü wo tilehi zükilu qhini ke kughue. 40Ike akütshüpu yìqo ghitha pe azüghi alou pheqhisüve eno tipa mütsa no zükilu tutsüghü chekeu lo akighí tsüghapüa keqo kuqhove. Tisheno panongu no amlhü no fupuku sasü wu kepu phì süqhepuku no amükü küdau saipeghive. 41Ikemu zükilu ye posü wo anibakutho lo meluve püzü ayeghi lo shosü pe ngove. Zükilu agizüu no paikhavi meluve kehu ithamlave eno azü kighide no zükilu athikhau küdau ye shopho piniyive.
42Tishi akelo ghüshimiqo ye akughumiqo pelo azü mihisü pove pemo niye pìthíve nikeu shi püghüve. 43Ikemu aqhe shou zatsüu ye Paul küxü pükhatsü nishi akehu, panongu no kiu shi niye püghü akeno tipau shipemo nike lakhave. Pa no khunoqo azümihi ithi ani keno zükilu lono atüghiu shi ilhe iqive no ayeghi küdau wuve penike azah tsü. 44Kütamiqo ye zükilu kubove keu asüluqo momu akughupo kütauqo khamgho pesü wuni keu shie. Hipau gholau no kümtsü shilusamo no azü mükü lo ayeghi toluve.
ప్రస్తుతం ఎంపిక చేయబడింది:
Apostolmi 27: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
