Apostolmi 26
26
1Tisheno Agrippa no Paul vilo ishi pi, “Olikhi oghenguno pilu kepu azah otsü ani.”
Ike Paul no pa u kihí piye no pa likhi pa shokha keu tsà pithu: 2“O Akükau Agrippa! Ni ye Jewmiqo no inguku akeu jeli kümtsü lono ilikhi ishokhalu kepu ghenguno ishí tsalà lo ozülo puthugholu akeu ye angukivi shilu ani kepi kümsülu anie, 3eno akhotoshi Jewmiqo kukhuaye eno panongu dolo kütsala achekeqo kümtsü nono akivishi ithi akeu ghenguno ke. Tighenguno, kutuu no itsà iní tsü penike ino oqhüiniju ani.
4“Jewmiqo kümtsü no ino itimi lakhi shiaphi lono, iküxü huthu keu lono, ilikhi ighakhu lo eno Jerusalem kutólo ghí kíshi xü ighi keno ithi ani. 5Panongu ye ado kushuwa lono ni ithi ighivea eno panongu no pulo aghí aye ni ye achineye lo puloniqhiyi eno mükamüghai keu Phariseemi lakhi shi xü acheni ipi ishepe shi tsülu nani. 6Eno itehi ye Alhou no ni pù-asüqo lau kiu tushoqhi keno ino tipau shou lajube keu ghenguno ishí ye ishou atsa kügha anie. 7Ashoqhi hipau shikupu keu ithulu niye lajupu akeu lo ningu ashiaye chighikini ye putho-pucho amlotsüqhiyi Alhou qe acheni ke. O Akükau Agrippa! Hipau lajupu ghenguno Jewmi hipaqo no akipimí itsü anie. 8Alhou no kithimi xüputhu ke ipi kushiye nongu khami ye pülü müla no acheni kea?
9“Ni ampi ghí alaghi jeli kümtsü lono Nazareth nó ghami Jisü ipikeu lachileni shiju ke. 10Eno tihutoi Jerusalem lo ino hitoi shike. Achinetou kükagha lono, ino Ampeuʼw timi kutomo akughuki lo khathave, eno kughou panongu pìthíve nikeu shi keno ino panongu lachile keu shi iw pulobe tsü cheke. 11Ghuthu kutomo ni ye panongu ghimeqhi nike ghenguno synagog lakhi lono lakhi lo wuche, eno anguka lono pano likhi pano chine pipüthave peniye shiche. Ni ye panongu kijipüsa nikeu no kütakihi ache, ikehu inami phughiqo lo ghí ino panongu hawu niye wuche ke.
12“Hitoi kicheghüzü shi chekeu tsalà lakhi lo ni ye achinetou no kükagha eno aküka itsü keu pesü Damascus lo wuche ke. 13O Akükau, puchomghü lo ino alà lo che kelo, ni ye atsütsǘ lono aküvü lakhi ithulue, tiye khetsünhe küvü nguno vüqalei shi püzü ni eno igholo chekemiqo veholuve ke. 14Tishi kelo ningu kümtsü ayeghi lo ilu iqive eno Arameami tsau no ivilo ishi pikeu sütsa chilue, ‘Saul, Saul, no ye kushiye ikijipüsa ani kea? Ashu lo püsüpuku nikeu ye oghenguno kümsapue.’
15“Ike ino iniju, ‘Ampeu, no ye khuu kea?’
“ ‘Ni ye nono kijipüsa akeu Jisü ke,’ ipi Ampeu no khochile. 16‘Itehi ithulo eno puthughovelo. Ino ogizülo ipeghi akeu ye opelo iqeu shipe niye eno nono ni ithuluve keu eno ithulu niye kutò akeu thopi shipe nike osüküsǘ shi niye ke. 17Ino olikhi ow timiqo lau no eno Jewkumomiqo lau no oxapheluve nani. Ino panongu lau opuwu ani 18eno tiye panongu nhethi àküzǘ lono aküvü ithulu peniye ke, eno Satan küká lono Alhou küká lo ighive no axinéqo qhikütsü ithuluve pe no ishou pülübe no mitheluve kemiqo gholo ngolu peniye ke.’
19“Ike tishi kehu, Akükau Agrippa, ni ye kungu lono ighi keu nhetsü hebidevemoe. 20Tighenguno ino kütsü chekeu ye atüghishi Damascus lo akemiqo, tithiu no Jerusalem lo eno Judea qha kümtsü lo akemi eno tithiu no Jewkumomiqo pelo amlo pebideve no Alhou lau xaideghive püzü panongu no xaideghive keu hu akümlàqo lono pephe piye peniye ke. 21Tighenguno Jewmi khami no achineki khala lono iküghaluve eno ipìthíve niye pükapütsa ke. 22Ikemu Alhou no ishí tsalà kutólo ikuphutsü ke; tishikehu ni ye hilehi puthugho no kijemi ngò kitilami kümtsü lau ishepe tsülu ani. Ni ye tungkupumiqo ngò Moses no kiu shi nani keno pitsü keu nguno alau ye kiumu alá piamoe, tiye— 23Messiah ye aghime shimoayesa nani eno akìthí lono xüithuve kemi dolo atüghiu shi nani, aküvü kükütsü tsà pesü no paw timiqo eno Jewkumomiqo lau süghitsü nani.”
24Paul no pa shokha keu tsà pi akelo Festus no pa tsà vekha ghi müghachhoi shi pi, “No ye izüuvae, nono kutomo ithi akeu no osaküghüzü anie.”
25Paul no khochile, “Akiqheu Festus, ni ye izü anike kumoe. Ino kiu piani keno tiye kuchou eno achipishi pi anie. 26Akükau ye thime hipaqo kuchopu ithi ani, eno ni ye ighümo no pa vilo pilu ani. Ino pülübeyi akeu ye hipaqo kuchopu pa zülo küsüve müla nani, kughengu hiye cheku-cheghu lono shipe püamoe. 27Akükau Agrippa, no ye tungkupumiqo pülü chenima? No ye pülü cheni kepi ino ithi ani.”
28Tile no Agrippa no Paul vilo pi, “No ye hi ikhonhei dolo no ipütsaqhiluve püzü ipelo Khristomi shiluve pe nani küghashi kümsü ani keshea?”
29Paul no khochile, “Ado ikhonhei shi aghina kushuwa shi aghí namu ino Alhou vilo inikhu akeu ye olikhi kumo no ishí hilehi itsà iní akemi kümtsü pelo itoiluve penishi ani, ikemu itoi ayikichhe lo ngove penishi amoe.”
30Akükau no puthughove eno pa gholo angh ngò Bernice eno tilehi panongu gholo iqa akemiqo kümtsü puthughove. 31Panongu no achebo lono wuve kethiu, tilehi akemiqo no lakhi no lakhi vilo ishi pia, “Timi hipau ye shipimi keu kiumu kühae eno pìthíve kepu momu akughu shive kepu aküzüpu kumoe.”
32Agrippa no Festus vilo pi, “Timi hipau no Caesar lau qhüiniju moke aye vejoi phe puwuve kepu shia kena.”
ప్రస్తుతం ఎంపిక చేయబడింది:
Apostolmi 26: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
