Apostolmi 15
15
Jerusalem lo Mijekütsümi Hoho Kuho keu
1Timi khami no Judea lono Antioch lo iqighi no hitoi küpülümiqo kütsüe: “Moses no nongu kütsü keu kukhuaye kiqi lono aphighüyiko-küghá shimo aye nongu ye xamlae.” 2Hipau ghenguno Paul ngò Barnabas pama ye panongu gholo aloqhi kimpi eno kighe keu shive. Ikehu küpülümi kütamiqo gholo Paul ngò Barnabas pama kìshe pesü Jerusalem lo iqho no apostolmi eno kichimiqo sasü hipau vehu küptsaju penikeu shie. 3Akukuhou no panongu puwuve, eno panongu no Phoenicia eno Samaria vechesü kicheghüzü shiche kelo Jewkumomi no kíshi Alhou lau xaideghilu ani keno panongu vilo pitsü. Asütsa kithé hipau chilu no küpülümiqo kümtsü no shishe alokivi shive. 4Kughou panongu no Jerusalem lo ighi keno akukuhomi, apostolmiqo eno kichimiqo no alokivishi panongu sasü, eno Alhou no panongu vechewo kiu mülàtsü keno tipaqo kümtsü panoqo vilo lhepiye.
5Tishi akelo Phariseemi muqo gholo pülüluve kemi khami no puthugho no pi, “Jewkumomiqo ghí aphighüyiko ghave moayesae eno aghokulu shi Moses yeza pape moayesae,” ipi.
6Ikehu apostolmiqo eno kichimiqo no hipau vehu küptsa nike ghenguno kushoe. 7Tsaqüi küptsaju kethiu Peter no puthugho no panongu vilo pi: “Athiküzümiqo, nongu no püzüu no ithi akeu toi Alhou no nongu gholo no ningu kìshelu püzü Jewkumomiqo pelo ikichí lono atsakiviu kükütsü tsà chilu no pülülu peniye shike. 8Alhou, khuu timi mulo ithikicheu keno, pa no ningu lau shikeu hutoi Jewkumomiqo ikhilu ani kepi pephe piye keu michi shi Aghungú Kimthe panongu tsüke. 9Alhou ye ningu eno panongu dolo kothaletha keu shitsümoe, kughengu pa no aküpülü vechewo panoqo mulo shikimthe tsüke. 10Tishiaye itehi nongu ye kushiye Alhou peju ghi nipù-asü momu ningu no puqhemla keu kuokhasü pesü Jewkumomiqo kuo lo xipipe niye pükapütsa ani kea? 11Tishi kepu kumoe! Ningu no pülü chekeu ye Ampeu Jisüʼw küpükini vechewo ningu xalu kehu toi, panongu ghí xalu ke.”
12Tile kuho akemi kümtsü no Alhou no Barnabas ngò Paul pama vechewo Jewkumomiqo lau amichipu eno akümzapu mülàtsü akeu ghili pikeu chilu püzü iqünheive. 13Pama no pitave kelo James no ishi pi, “Athiküzümiqo, itsà inilo. 14Simon no ningu vilo Alhou no kíshi atüghi lono chhosü püzü Jewkumomiqo gholo pa je ghenguno no timi amqo lakhi kìshelu keno kishékulu pivae. 15Tungkupumiqo no pikeu tsaqo ghí hipau gholo puloküqhalu ani, eno tiye hitoi yèpüani:
16“ ‘Hithiu ino ideighi nani
eno Davidʼw aphiki ikiqive keu shiqhepuku kithe nani.
Ti kütsave keqo ino shiqhepukuve nani,
eno ino athoputhove tsü nani,
17tishianguno timi kümtsü no Ampeu phu pe nani,
tiye ino iw shiluve kemi Jewkumomiqo ghí Alhou phu pe nani,
hiye Ampeu khuu no thime hipaqo kümtsü khaghi no ithipe akeno pa no pie,’#15:17 Amos 9:11,12
18hiye khaghi no ithi akeu thimeqo ke.
19“Tighenguno ino xakütha tsülu akeu ye hike, ningu ye Jewkumomi khunoqo no Alhou lau xaideghi ani keno panongu ghenguno ighono kushokütsü shive pe kepu kumoe. 20Tishini ke züqhulo ningu ye panongu lau akiyé lono ajulho lhouqo müláve keu chuqu chumo nikeu, kipito mikucho kumo shimo nikeu, lhoxü tshüqhi-pìthí keu shì eno ajì chumo kepu shi pive kepue. 21Kughengu khaghinomu Moses yeza ye aphughi kümtsü lo kütsüvea eno Synagogqo kümtsü lo Sabbath tsalà lono phisü acheni ke.”
Jewkumomi Küpülümiqo lau Mijetsümiw Yèsü
22Tishive no apostolmi eno kichimiqo gholo akukuhomiqo kümtsü küqha no pano likhi panow timi khami kìshe pesü Paul ngò Barnabas pama gholo Antioch lo puwu nikeu shi xathalu. Panongu no küpülümiqo gholo sakiphemi, Judas (Barsabbas ipi chekeu) eno Silas pama kìshelu. 23Panongu gholo hitoi yèpe tsüpuwu:
Apostolmi eno kichimi, nongu thiküzümiqo,
Antioch, Syria eno Cilicia lo Jewkumomi küpülümi akemiqo lau:
Petha tsü ani.
24Ningu gholo timi khami no ningu lau no puloza lumo no wu püzü nongu pünaqhi ani, eno panongu no kiu pi keno tino nongu kükümsü püna ani ipi ningu no chilu ani. 25Ikehu ningu kümtsü puloküqha no timi khami kìshe pe ningu küsàu kiviu Paul ngò Barnabas pama gholo no nongu lau puwu nikeu shie— 26timi hipaqo ye Ampeu Jisü Khristo je ghenguno aküxü pephe tsüve kemiqo ke. 27Tighenguno ningu no yèsü kiu yè ani keno akichi tsà lono mütsümishei shive niye Judas ngò Silas puwu ani. 28Aghungú Kimthe ghengu eno ningu ghengu ghí akivipu ipi kümsü no, hi aqhou avehupu shi akeu nguno alau ye kiumu nongu pünamoni keu shivae: 29Nongu ye ajulho lhouqo lau aghashi pe müláve keu chuqu chumo nikeu, lhoxü tshüqhi-pìthí keu shì eno ajì chumo nikeu eno kipito mikucho kumo jeli lono putosüve pe nikeu shivea. Nongu no hipaqo lono kutokupui luve aye achipishi anani.
Akivishi alo.
30Ike kìshe pe püakeu hutoi Judas ngò Silas pama puwuve eno Antioch lo iqive, tile akukuhomiqo hekütsü no yèsü pesü panongu tsüe. 31Timiqo no yèsü philu kelo panongu shikumto keu kükütsü tsà ghenguno alokivishive. 32Judas ngò Silas pama ye tungkupumi ghí kehu, hakite keu tsà kutomo pesü küpülümiqo shikumto tsü. 33Ado hami tile ngove kethiu küpülümiqo no alokughuno kükümgha petha gholo no panongu puwu kemiqo lau pama kighide puwove. 34Ikemu Silas ye tilau ngo aghíni keu shi xathave.#15:34 Kaku khami lo ye ajò hipau küha eno atsa hipau peitha acheni. 35Eno Paul ngò Barnabas pama ye Antioch lo ngove no tilehi pama eno kütami kutomo no Ampeu tsà pesü kütsü eno shika ae.
Paul ngò Barnabas Pama dolo Akükümsü Kiyeqüve keu
36Atsala hami thiu Paul no Barnabas vilo pi, “Nikujo idewo no ningu no Ampeu tsà pesü aphughi khilehi kütsüvea keno tipaqo kümtsü lo wu no küpülümiqo ye kiutoi ani keno xuju wunie.” 37Ike Barnabas ye pama gholo John, Mark ipi ku chekeu, ghí sasü wuni shiqhiyi ae, 38ikemu Paul no kümsü keu no pa ye püzüu akümlà mülà khamo no Pamphylia lo pama qhive no idewove keu ghenguno sasü wumove keu pavi ipi kümsüe. 39Pama dolo aloqhi akükümsü küqha mülave no amqo kütüta shive. Barnabas no Mark sasü zükilu lono Cyprus lo wuve, 40ikemu Paul ye Silas kìsheluve no küpülümiqo no pama Ampeuʼw küpükini lo kulhuqhive tsü no cheve. 41Pa no Syria ngò Cilicia qhalo wu no akukuhouqo shikumto tsüe.
ప్రస్తుతం ఎంపిక చేయబడింది:
Apostolmi 15: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
