Apostolmi 14
14
Iconium lo
1Thosülo toi Paul ngò Barnabas pama ye Iconium lo Jewmiʼw synagog lo wu. Tilehi pama kükütsü kivi vechewo Jewmi ngò Greekmiqo kutomo no pülüluve. 2Ikemu Jewmi khunoqo pülüni keu milive keno panongu no Jewkumomi kütamiqo xukuthove eno athiküzümiqo lachile penike panongu kükümsü lo alhoküsa xusüve tsüe. 3Ike Paul ngò Barnabas pama ye ado kushuwa tilehi ngo no Ampeu ghenguno akumtoshi pia, eno pama no küpükini kükütsü tsape shikeu kimchitsü akeu shi Ampeu no pama pelo amichipu eno akümzapu kümlàqo shilu pe. 4Aphughi lo timiqo ye kijethave: khami no Jewmiqo laumi shi eno khami no apostolmiqo laumi shive. 5Tile Jewmi ngò Jewkumomiqo no panonguw sakiphemiqo sasü kümqüve no apostolmi pama ghimeqhi püzü atu pesü veqhi nikeu shi püghüe. 6Ikemu pama no ti ithive no Lycaoniami phughiqo, Lystra ngò Derbe eno tipaqha sükümxa lo pove, 7tisheno pama no atsakiviu pesü tamo no asheshue.
Lystra eno Derbe lo
8Lystra lo apukhu kinitave kemi lakhi iqa ache. Pa ye apukhu kinita ghi punú eno khilemu alà cheju miphi kemi lakhi. 9Pa ye Paul no kütsü akeu iní ae. Paul no tsaqüi pa ju kelo pa ye viluve nishiqhiyi akeu küpülü akeu ithulu 10kehu hitoi pi, “Puthughovelo!” Ikelo ye, timi hu no ilheithughi no alà chethuve.
11Kughou Aqokitikhi no Paul no mülà keu ithulu keno panongu no Lycaoniami tsau no hitoi igha thuve, “alhouqo no timi phimpi shi no ningu lau iqighi anie!” 12Panongu no Barnabas pesü Zeus ipi ku, eno Paul no atsapitou shi akehu panongu no pa pesü Hermes kutsü. 13Aphughi khalau Zeus chineki akeu lo achineu ye aqokitikhi sasü aghakishi kümlagho pesü Paul ngò Baranabas pama mülá niye shi akehu amishitsü ngò axamunuqo pesü aphughi khagho lo ighi.
14Ikemu kughou apostol Paul ngò Barnabas pama no ti chilu keno, pama phì süxüve eno aqokitikhi lau poipeghi no ighamuku: 15“Aküsàmiqo, nongu ye kushiye hi shi ani kea? Nikujo ghí nongu toi timi ke. Ningu no nongu lau atsakiviu süghi akeu ye nongu pelo ameküha keu thime jeli hipaqo qhive no xü akeu Lhou, khuu no atsütsǘ, ayeghi, azüghi eno tipaqo lo akeu kümtsü lhosü keno, pa lau ideighi peniye ke. 16Wove keu lo pa no shiyeqo kümtsü pelo pütüta shelo apanagha che pe ke. 17Tishimu pa ye xüani ipikeu shepe qhitsümo keu shimoe: Pa no küpüqhiyi keu piye akeu michi atsütsǘ lono tsütsüghu eno atusho kiqi lono axa jeli nongu tsü; pa no achuqupu kutomo nongu tsü eno alokivi pesü nongu mulo vepiqi tsüe.” 18Atsa hipaqo pive kethiu ghí timiqo no aghakishi kümlagho pesü pama mülá niye shi kelo pama ye akushukulu lakha chilelue.
19Tile no Jewmi khami Antioch ngò Iconium lono ighino timiqo mulo züluve. Panongu no atu pesü Paul veqhi eno pa ye thivea küghashi kümsüve no sünhekiti pesü aphughi khalacheu peve. 20Ikemu kughou küpülümiqo no pa homxa pesü kumqo akeno pa ye ithughive no aphughi lo chesü idewove. Tishiwo thoghiu Barnabas ngò Paul pama ye Derbe lo wuve.
Syria lono Antioch lo Ideighi
21Pama no aphughi tipau lo atsakiviu pesü kütsü kelo timi kutomo no küpülümi shiluve. Tishive no pama ye Lystra ngò Iconium küdau no Antioch lo ideighive, 22eno hipaqo-a lo küpülümiqo pelo panongu küpülü lo kuchou shi apenike hakite eno shikumto tsü. Pama no pi, “Alhou kükaqha lo ilo nike ghenguno ningu ye shiluküsa kutomo veche moayesae.” 23Paul ngò Barnabas pama no akukuho atsütsǜ lo panongu ghenguno kichimiqo süküsü shitsü, eno akighini gholo kümvü keu vechewo panongu no pükhübe chekeu Mipeu lau kulhuqhive tsü. 24Pisidia vechesü wuve kethiu pama no Pamphylia lo ighi, 25eno kughou pama no Perga lo atsakiviu kütsüve keno pama ye Attalia lo iqive.
26Attalia lono pama ye ashuka lono Antioch, khile pama pesü akümlà itehi shiqhilu keu mülàwu peniye Alhouʼw küpükini lo kulhuqhi tsü keno, tilau wuve. 27Tilehi ighi kelo pama no akukuhomiqo amqo shi kukütsü püzü Alhou no pama vechewo kiu mülàtsü eno pa no kíshi Jewkumomiqo lau aküpülü hukikha khaqhive tsüa keno ti kümtsü pesü pìthitsü. 28Eno pama ye tilehi küpülümiqo gholo ado kushuwa ngove.
ప్రస్తుతం ఎంపిక చేయబడింది:
Apostolmi 14: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
