SENESI 47
47
Te famili o Sakopo i Koseni
1Nee alu leva ia Sosefo o fakaha kia Falaone: Kua tau mai oku tehina mo taku tamai mai te fenua o Kanaane, mo anatou faga ovi, mo anatou faga pipi, pea mo anatou mea fuli; Koeni natou kua nonofo i te fenua o Koseni. 2Nee too leva e Sosefo te toko nima i ona tehina, o ave natou kia mua o Falaone. 3Nee ui leva e Falaone kia natou: Kotea takotou gaue? Nee natou tali leva kia Falaone: E tauhi manu au tagata faifekau, o hage pe ko tamatou tamai. 4Nee natou toe ui leva kia Falaone: Kua kovi osi te hoge i te fenua o Kanaane, pea e mole kei mau he meakai ke fafaga ai te u manu o au tagata faifekau, koia kua matou omai ai o nonofo fakatemi i te fenua aeni. Ke ke fakagafua ki au tagata faifekau ke natou nonofo i te fenua o Koseni. 5Pea nee ui leva e Falaone kia Sosefo: Koeni kua tau mai kia koe tau tamai mo ou tehina, 6e fakalogo te fenua katoa o Esipito kia koe. Filifili e koe te kogamea lelei tukupau o te fenua ke natou nonofo i ai. Ke natou nonofo i te fenua o Koseni! Pea kapau e ke mau ia natou ni tagata poto i te tauhi manu, pea ke tuku natou ke tokakaga ki aku faga manu.
7Nee toe ave foki e Sosefo tana tamai ko Sakopo ke felavei mo Falaone. Pea nee tapuaki leva ia Sakopo kia Falaone. 8Nee ui leva e Falaone kia Sakopo: E tau fia tou mauli? 9Nee tali leva e Sakopo kia Falaone: Ko te u tau o toku mauli, i te temi ae nee au fealuaki ai, ko tau e teau tolugofulu. E siisii pe te u tau o toku mauli mo kovi, e mole natou kaku ki te u tau o aku tamai. 10Nee tapuaki leva ia Sakopo kia Falaone, pea nee mavae leva ia ia ia mua o Falaone.
11Nee foaki leva e Sosefo ki tana tamai mo ona tehina he kele i te fenua o Koseni ke natou nofo i ai, i te kogamea lelei tukupau o te fenua, ia tafa o Lamisese, o fai ki te fakatotonu ae nee tuku age e Falaone. 12Nee tokaga leva ia Sosefo ki te pane o tana tamai, mo ona tehina, mo te famili katoa o tana tamai, o fakafuafua ki tonatou kaugamalie.
13Nee mole kei mau he pane i te fenua katoa, koteuhi nee lahi osi te hoge; pea nee gaegae osi te fenua o Esipito mo te fenua o Kanaane o tupu ko te hoge. 14Nee tanaki leva e Sosefo te paaga katoa ae nee mau i te fenua o Esipito mo te fenua o Kanaane, o fetogi aki te fulumeto. Pea nee ina fakaulu leva te paaga aia ki te fale o Falaone. 15Pea nee osi leva te paaga o te fenua o Esipito mo te fenua o Kanaane, pea nee olo leva te hahai o Esipito kia Sosefo, o ui: Foaki mai kia matou he pane! Pe e tonu ke matou mamate i ou mua, koteuhi kua osi tamatou paaga? 16Nee ui leva e Sosefo: Koutou foaki mai akotou faga manu, pea hoki au foaki atu anai kia koutou he pane, mo kapau kua osi akotou paaga. 17Nee natou avake leva kia Sosefo anatou faga manu, pea nee foaki leva e Sosefo kia natou he pane o totogi aki te u hosi, mo te u ovi, mo te u pipi, mo te u asino. I te tau aia nee foaki leva e Sosefo te pane ki te hahai o Esipito, o totogi aki anatou faga manu.
18Nee osi leva te tau aia, pea nee natou toe olo leva kia Sosefo i te tau ake ae, o ui kia ia: E mole matou fufu foki ki tomatou aliki, kua osi amatou paaga, pea kua nonofo amatou faga manu mo koe. Kei toe pe ki omatou sino totonu mo omatou kele ke aumai kia koe. 19Kotea anai ke matou mamate ai i ou mua, kae tutuu noa omatou kele? Ke ke totogi matou mo omatou kele, kae ke ke foaki mai kia matou he meakai. Pea ko matou mo omatou kele, e matou faifekau anai kia Falaone, koteuhi e mole matou fia mamate. Foaki mai kia matou ni pulapula ke to pea ke matou mauli ai, pea ke aua naa tutuu noa omatou kele. 20Nee totogi leva e Sosefo te u kele fuli o Esipito maa Falaone; koteuhi nee kovi osi te hoge, pea nee tahi fakatau leva e te kau Esipito tana gaueaga. Pea nee liliu leva te fenua ko te kele o Falaone. 21Nee fakaliliu leva e Sosefo te hahai katoa o Esipito o popula kia Falaone, mai ae potu ki ae potu. 22Nee gata tahi ki te u kele o te kau pelepitelo nee mole totogi e Sosefo, koteuhi nee i ai he lao a Falaone ae nee ina puipui natou. Ko Falaone ae nee tokaga ki onatou mauli. Koia ae nee mole totogi ai e Sosefo onatou kele. 23Nee ui leva e Sosefo ki te hahai: I te aho nei kua au totogi koutou mo okotou kele ke koutou popula kia Falaone, e au foaki anai kia koutou he pulapula ke to ai te u gaueaga. 24Kae i te temi tanaki o te fulumeto, e koutou foaki anai kia Falaone te vaega nima o te fulumeto. E fakalogo kia koutou te u vaega fa ae e toe, ke to ai akotou gaueaga, pea ke fafaga ai akotou fanau mo natou fuli ae e nonofo i okotou fale. 25Nee natou ui leva: E ke haofaki omatou mauli! Pea koeni e ke toe fakaha tou ofa kia matou i te mea aeni, koia e matou tali ai ke matou popula kia Falaone. 26Nee fakatuu leva e Sosefo te mea aia ko he lao o kaku mai ki te aho nei: e foaki anai te vaega nima o te u fua o te kele kia Falaone. Nee gata pe ki te u kele o te kau pelepitelo, nee mole mau e Falaone.
27Nee nofo leva ia Iselaele i Esipito, i te fenua ko Koseni. Nee natou mau leva i ai ni kele, pea nee natou mau leva ni fanau, pea nee natou liliu leva o hahai osi.
28Nee mauli leva ia Sakopo i Esipito ia tau e hogofulu ma fitu. Ko te fualoa o te mauli o Sakopo ko tau e teau fagofulu ma fitu. 29Nee fakaoviovi mai leva ia Iselaele ki te temi o tona mate, pea nee ina paui leva tona foha ko Sosefo, o ui kia ia: Kapau e ke ofa kia au, pea ke fakaha mai kia au tou ofa mo tou agatonu: Aua naa ke tanu au i Esipito. E au kole atu kia koe, ke ke fakapapau mai kia au, o tuii mai tou nima i toku lalo kauaga. 30Ka au moe anai o fakatahi mo aku tamai, e ave anai au ke au mamao mai te fenua o Esipito, pea e ke tanu anai au i te tanuma o aku tamai. Nee tali fenei leva e Sosefo: E au fai anai o mulimuli ki au palalau. 31Pea nee ui leva e Sakopo: Fakapapau mai kia au! Pea nee fakapapau age leva e Sosefo kia ia. Pea nee punou leva ia Iselaele ki tona fuga palepale.
ప్రస్తుతం ఎంపిక చేయబడింది:
SENESI 47: WB2011
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
