SENESI 46
46
Sakopo mo tona famili i Esipito
1Nee alu leva ia Iselaele mo ana mea fuli. Nee kaku leva ia ia ki Pele-Sepa, pea nee ina momoli leva ni sakilifisio ki te Atua o tana tamai ko Isaake. 2Pea nee palalau leva te Atua kia Iselaele i he moemisi i te pouli, o ui: Sakopo! Sakopo! Pea nee tali leva e Iselaele: Koeni au! 3Pea nee ui e te Atua: Ko au ko te Atua, ko te Atua o tau tamai. Ke aua naa ke tuania i te hifo ki Esipito, koteuhi e au fakaliliu anai ia koe ko he puleaga lahi i te fenua aena. 4Ko au totonu, e au hifo anai mo koe ki Esipito, pea ko au totonu, e au toe aumai anai ia koe ki heni. I tou mate ko Sosefo ae e ina mapunui anai ou mata.
5Nee mavae leva ia Sakopo i Pele-Sepa. Pea nee fakaheka leva e te u foha o Iselaele tanatou tamai ko Sakopo, mo anatou fanau, mo onatou ohoana, ki te u saliote ae nee fakamomoli ake e Falaone ke aumai ai natou. 6Nee natou ave foki anatou faga manu, mo anatou mea fuli ae nee natou mau i te fenua o Kanaane. Pea nee alu leva ia Sakopo ki Esipito mo tona famili katoa. 7Nee ina ave leva ki Esipito ona foha, mo te u foha o ona foha, mo ona ofafine, mo te u ofafine o ona foha, pea mo tona famili katoa.
8Koeni te u higoa o te u foha o Iselaele, ae nee hihifo ki Esipito. Ko Sakopo mo ona foha. Ko te foha uluaki a Sakopo ko Lupeni.
9Ko te u foha o Lupeni: ko Enoke, mo Palu, mo Eselone, mo Kalimi. 10Ko te u foha o Simeone: ko Semuele, mo Samine, mo Oate, mo Sakine, mo Soale; pea mo Saulo, ko te foha ki te fafine Kanaane. 11Ko te u foha o Levi: ko Kelesoni, mo Keate, mo Melali. 12Ko te u foha o Suta: ko Ele, mo Onane, mo Sela, mo Pelesi, mo Selake. Nee mate leva ia Ele mo Onane i te fenua o Kanaane. Ko te u foha o Pelesi ko Eselone mo Amule. 13Ko te u foha o Isakale: ko Tola, mo Puva, mo Sopo, mo Similoni. 14Ko te u foha o Sapulone: ko Seleti, mo Eloni, mo Saleli. 15Ko te u foha aia ae nee fanaui e Lea kia Sakopo i Patane-Alane, pea mo tana taahine ko Tina. Nee fakatahii natou mo anatou fanau ko te toko tolugofulu ma tolu.
16Ko te u foha o Kate: ko Sifesoni, mo Aki, mo Suni, mo Eteseponi, mo Eli, mo Aloti, mo Aleeli. 17Ko te u foha o Asele: ko Simena, mo Siseva, mo Sisevi, mo Pelia; pea ko tonatou tuagaane ko Selate. Pea ko te u foha o Pelia: ko Epele mo Malikiele.
18Ko te u foha aia ae nee fanaui e Silipa, ae nee tuku e Lapane ki tana taahine ko Lea; pea nee ina fanaui natou kia Sakopo. Nee fakatahii natou ko te toko hogofulu ma ono.
19Ko te u foha o Lasele, ohoana o Sakopo: ko Sosefo mo Pesamino. 20Nee tupu leva kia Sosefo, i te fenua o Esipito, ia Manase mo Efalaimi, ae nee fanaui e Asenate kia ia, ofafine o Potifela, ko te pelepitelo o Oni. 21Ko te u foha o Pesamino: ko Pela, mo Pekeli, mo Asipeli, mo Kela, mo Neemani, mo Esi, mo Losi, mo Mupimi, mo Upime, mo Aleti.
22Ko te u foha aia ae nee fanaui e Lasele kia Sakopo. Nee fakatahii natou ko te toko hogofulu ma fa.
23Ko te u foha o Tane: ko Usime.
24Ko te u foha o Nefetali: ko Sateseele, mo Kuni, mo Setesele, mo Silemi.
25Ko te u foha aia ae nee fanaui e Pila, ae nee tuku e Lapane ki tona ofafine ko Lasele; pea nee ina fanaui natou kia Sakopo. Nee fakatahii natou ko te toko fitu.
26Ko te hahai o te famili o Sakopo, natou ae nee omai totonu maia ia, pea nee hihifo mo ia ki Esipito, ko te toko onogofulu ma ono, kae nee mole lau ai te u ohoana o te u foha o Sakopo. 27Nee mau e Sosefo ni foha e lua, ae nee tupu kia ia i Esipito. Ko te kaugamalie o te famili katoa o Sakopo ae nee nofo leva i Esipito ko te toko fitugofulu.
28Nee fekaui leva e Sakopo ia Suta ke muamua kia Sosefo, o fakaha kia ia, ke alu ake ia ia ki Koseni, koteuhi e hifo anai ia ia ki ai. 29Nee teuteui leva e Sosefo tana saliote, pea nee heka leva ia ia ki ai, pea nee alu leva ia ia ki Koseni, o fakafelavei mo tana tamai ko Iselaele. I tana sio ki tana tamai, nee lele leva ia ia o kalupe* ki tona kia, o uma kia ia, pea nee tagi ia ia i tona kia o fualoa. 30Nee ui leva e Sakopo kia ia: ke au mate i te temi aeni, koteuhi kua au sio ki ou mata, pea kei ke mauli!
31Nee ui leva e Sosefo ki ona tehina, mo te famili katoa o tana tamai: E au alu o fakaha kia Falaone kua kaku mai kia au oku tehina mo te famili katoa o taku tamai, ae nee nonofo i te fenua o Kanaane. 32E au fakaha anai kia ia, ko ni tagata tauhi manu koutou, pea nee koutou aumai akotou faga pipi, mo akotou faga ovi, mo akotou faga tao, pea mo akotou mea fuli. 33Pea kapau e paui anai koutou e Falaone ke koutou olo age kia ia, pea ka ina fehui atu anai kia koutou: 34Pe kotea takotou gaue? Koutou tali age ki ai: E tauhi manu au tagata faifekau talu mai tamatou kei liliki o kaku mai ki te aho nei, o hage pe ko tamatou tamai. I te mea aia e ina fakagafua anai kia koutou ke koutou nofo i te fenua ko Koseni, koteuhi e fakalialia te kau Esipito ki te kau tauhi manu fuli.
ప్రస్తుతం ఎంపిక చేయబడింది:
SENESI 46: WB2011
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
