ಆದ್ಯತ್‌ರ ಪುಸ್ತಕ 8
8
ಜಲಪ್ರಳಯ ನಿಪ್ಪದ್‌
1ದೇವ ನೋಹನ ಪಿಂಞ ಅಂವೊಂಡ ಕೂಡೆ ಹಡಗ್‌ಲ್‌ ಇಂಜ ಎಲ್ಲಾ ಕಾಡ್‌ ಪ್ರಾಣಿಯಳ ಚಾಕ್‌ ಪ್ರಾಣಿಯಳ ಮನಸ್ಸ್‌ಲ್‌ ಗೇನಮಾಡಿತ್, ಬೂಮಿರ ಮೇಲೆ ಗಾಳಿನ ಅಯಿಚತ್. ಅಕ್ಕ ನೀರ್‌ ಶಾಂತಿ ಆಯಿತ್, ಕಮ್ಮಿ ಆಪಕ್‌ ಶುರು ಆಚಿ. 2ಬೂಮಿರ ಒಳ್‌ಲ್‌ಂಜ ನೀರ್‌ರ ಬುಗ್ಗೆ ಪರಿಯುವದು ಪಿಂಞ ಬಾನತ್‌ರ ಕ್‌ಡ್‌ಕೆ ತೊರ್ಂದಿತ್ ನೀರ್‌ ಬಪ್ಪನೆಕೆ ಬಂದಂಡಿಂಜದು ನಿಂದತ್. ಬಾನತ್‌ಂಜ ಪೊಜ್ಜಂಡಿಂಜ ಮಳೆಯು ನಿಂದತ್. 3ಇನ್ನನೆ ದಿವಸ ಪೋನನೆಕೆ ಬೂಮಿರ ಮೇಲೆ ನೀರ್‌ ಕಮ್ಮಿ ಆಯೇಂಡಿಂಜತ್. ನೂಟ್ಯ ಐಂಬದ್‌ ದಿವಸ ಇಂಞು ಆಚಿ. 4ಏಳನೇ ತಿಂಗತ್‌ರ ಪದಿನ್‍ೕಳನೆ ದಿವಸತ್‌ಲ್‌ ಹಡಗ್‌ ಆರಾರಾಟ್ ಸೀಮೆರ ಕುಂದ್ರ ಒಂದ್‌ಲ್‌ ನಿಂದತ್. 5ಪತ್ತನೆ ತಿಂಗಕತ್ತನೆ ನೀರ್‌ ಕಮ್ಮಿ ಆಯಂಡ್‌ ಬಾತ್. ಪತ್ತನೆ ತಿಂಗತ್‌ರ ಒಂದನೆ ದಿವಸತ್‌ಲ್‌ ಕುಂದ್ರ ತುದಿ ಕಂಡ್‌ ಬಾತ್.
6ಇಂಞು ನಾಪದ್‌ ದಿವಸ ಆನ ಪಿಂಞ ನೋಹ ತಾನ್‌ ಮಾಡ್‌ನ ಹಡಗ್‌ರ ಕ್‌ಡ್‌ಕೆನ ತೊರ್ಂದಿತ್, 7ಒರ್‌ ಕಾಕೆನ ಪೊರಮೆ ಬುಟ್ಟತ್. ಬೂಮಿರ ಮೇಲೆ ನೀರ್‌ ಬತ್ತ್‌ವಕತ್ತನೆ ಆ ಕಾಕೆ ಪೊಯಂಡ್‌ ಬಂದಂಡ್‌ ಇಂಜತ್. 8ಇನ್ನನೆ ನೀರ್‌ ಬತ್ತ್‌ಚಾ ಇಲ್ಲಿಯಾಂದ್‌ ನೋಟ್‌ವಕಾಯಿತ್‌ ನೋಹ ಒರ್‌ ಪಾರಿವಾಳತ್‌ನ ಪೊರಮೆ ಬುಟ್ಟತ್. 9ಬೂಮಿರ ಮೇಲೆಯೆಲ್ಲಾ ನೀರ್‌ ಇಂಜಗುಂಡ್, ಪಾರಿವಾಳಕ್‌ ಕಾಲಿಡ್‌ವಕ್‌ ಜಾಗ ಇಲ್ಲತೆ ಪುನಃ ಹಡಗ್‌ಕ್ ತಿರಿತ್‌ ಬಾತ್. ನೋಹ ಅಂವೊಂಡ ಕೈಯಿನ ನ್‍ೕಟಿತ್‌ ಅದ್‌ನ ಪುಡಿಚಿತ್‌ ಹಡಗ್‌ಲ್‌ ತಾಂಡ ಪಕ್ಕ ಕೂಟಿಯಂಡತ್. 10ಅಂವೊ ಇಂಞು ಏಳ್‌ ದಿವಸ ಪಾರಕಾತಿತ್, ಪುನಃ ಪಾರಿವಾಳತ್‌ನ ಪೊರಮೆ ಬುಟ್ಟತ್. 11ಬಯಿಟಾಪಕ ಆ ಪಾರಿವಾಳ ಅಂವೊಂಡ ಪಕ್ಕ ತಿರಿತ್‌ ಬಪ್ಪಕ, ಅದ್‌ ಪರ್ಚಂಡ್‌ ಬಂದ ಎಣ್ಣೆಮರತ್‌ರ ಎಲ್ಕಂಡ್‌ ಅದ್‌ಂಡ ಬಾಯಿಲ್‌ ಇಂಜತ್. ಅದನ ನೊಟ್‌ನ ನೋಹಂಗ್ ನೀರ್‌ ಬೂಮಿಯಿಂಜ ಕಮ್ಮಿ ಆಚೀಂದ್‌ ಗೊತ್ತಾಚಿ. 12ಪಿಂಞ ಇಂಞು ಏಳ್‌ ದಿವಸಕ್‌ ಪಾರಕಾತಿತ್ ಪುನಃ ಪಾರಿವಾಳತ್‌ನ ಪೊರಮೆ ಬುಟ್ಟತ್, ಆಚೇಂಗಿ, ಈ ಕುರಿ ಅದ್‌ ಅಂವೊಂಡ ಪಕ್ಕ ತಿರಿತ್‌ ಬಂದಿತ್‌ಲೆ.
13ನೋಹಂಗ್ ಆರ್‌ ನೂಟ್ಯ ಒರ್‌ ವಯಸ್ಸ್‌ ಆಪ ಕಾಲತ್, ಮೊದಲನೆ ತಿಂಗತ್‌ರ ಮೊದಲೆನೆ ದಿವಸತ್‌ಲ್‌ ಬೂಮಿಯಿಂಜ ನೀರ್‌ ಬತ್ತಿತ್‌ಂಜತ್. ನೋಹ ಹಡಗ್‌ರ ಮೇಲ್‌ ಬಾಗತ್‌ನ ಪೊಳಿಚಿತ್‌ ನೋಟ್‌ವಕ ನೆಲ ಒಣಗಿಪೋಯಿತ್‌ಂಜತ್. 14ಇಂಞು ದಂಡನೆ ತಿಂಗತ್‌ರ ಇರ್ವತ್‌ ಏಳನೆ ದಿವಸತ್‌ಲ್‌ ಬೂಮಿ ಪೂರ್ತಿಯಾಯಿತ್‌ ಒಣಗಿತ್‌ಂಜತ್. 15ಅಕ್ಕ ದೇವ ನೋಹಂಗ್: 16ನೀನ್, ನೀಡ ಕೂಡೆ ನೀಡ ಪೊಣ್ಣ್, ನೀಡ ಕ್‌ಣ್ಣ ಮಕ್ಕ, ನೀಡ ಮೈಮಕ್ಕ ಎಲ್ಲಾರು ಹಡಗ್ಯಿಂಜ ಪೊರಟಿತ್‌ ಪೊರಮೆ ಬಕ್ಕಲು. 17ನೀಡ ಕೂಡೆ ಉಳ್ಳ ಎಲ್ಲಾ ಪ್ರಾಣಿ, ಪಕ್ಷಿ, ಬೂಮಿರ ಮೇಲೆ ಪರ್ಪ ಎಲ್ಲಾ ಪ್ರಾಣಿಯಳ ಪೊರಮೆ ಬುಡ್. ಅಯಿಂಗ ಬೂಮಿರ ಮೇಲೆ ಅಯಿಂಗಡ ಸಂತಾನ ಬಲ್ಯದಾಯಿತ್, ಅಬಿವೃದ್ದಿ ಪೊಂದಿತ್, ಜಾಸ್ತಿ ಆಡ್‍ೕಂದ್‌ ಎಣ್ಣ್‌ಚಿ. 18ಅಕ್ಕ ನೋಹ, ಅಂವೊಂಡ ಪೊಣ್ಣ್, ಕ್‌ಣ್ಣ ಮಕ್ಕ, ಮೈಮಕ್ಕ ಎಲ್ಲಾರು ಪೊರಮೆ ಬಾತ್. 19ಎಲ್ಲಾ ತರತ್‌ರ ಪ್ರಾಣಿ ಪಕ್ಷಿಯ ತಾಂಡ ತಾಂಡ ಜಾತಿ ಪ್ರಕಾರ ಓರೋರ್‌ ಜೊತೆಯಾಯಿತ್‌ ಹಡಗ್ಯಿಂಜ ಪೊರಮೆ ಬಾತ್.
20ಅಕ್ಕ ನೋಹ ಯೆಹೋವಂಗ್‌ ಒರ್‌ ಬಲಿಪೀಠತ್‌ನ ಕೆಟ್ಟಿತ್, ಶುದ್ದವಾನ ಚೆನ್ನ ಪ್ರಾಣಿ ಪಿಂಞ ಪಕ್ಷಿಯಳ ಬಲಿಪೀಠತ್‌ರ ಮೇಲೆ ದಹನ ಬಲಿಯಾಯಿತ್‌ ಬಲಿ ಕೊಡ್‌ತತ್. 21ಬಲಿ ಕೊಡ್‌ತ ನಲ್ಲ ವಾಸನೆ ಯೆಹೋವನ ಕುಶಿ ಪಡ್‌ತ್‌ಚಿ. ಅಕ್ಕ ಯೆಹೋವ: ಮನುಷ್ಯಂಡ ಮನಸ್ಸ್‌ ಚೆರ್ಪತ್‌ಂಜಲೇ ಕೆಟ್ಟದಾಯಿತ್‌ ಇಂಜತೇಂಗಿಯು, ನಾನ್‌ ಇಂಞು ಮಿಂಞಕ್‌ ಮನುಷ್ಯನಗುಂಡ್‌ ಬೂಮಿಕ್‌ ಶಾಪ ಇಡುಲೆ; ನಾನ್‌ ಇಕ್ಕ ನಾಶಮಾಡ್‌ನನೆಕೆ ಇಂಞು ಮಿಂಞಕ್‌ ಎಲ್ಲಾ ಜೀವಿಯಳ ನಾಶ ಮಾಡುಲೆ. 22ಬೂಮಿ ಇಪ್ಪಲ್ಲಿಕತ್ತನೆ ಬಿತ್ತ್‌ವದ್, ಕೊಯ್ಯಿಪಣಿ ಮಾಡ್‌ವದ್, ಕೋಟ ಸೆಕೆ, ಬೆದ್‌ ಕಾಲ ಕುಳುರ್‌ ಕಾಲ, ಪೋಲ್ ಪಿಂಞ ಬಯಿಟ್ ಇಪ್ಪಾಂದ್‌ ಎಣ್ಣ್‌ಚಿ.
ప్రస్తుతం ఎంపిక చేయబడింది:
ಆದ್ಯತ್‌ರ ಪುಸ್ತಕ 8: ಕೊಡವ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2017, New Life Literature (NLL)
