ಆದ್ಯತ್‌ರ ಪುಸ್ತಕ 9
9
ನೋಹಂಡ ಕೂಡ ದೇವಡ ಒಪ್ಪಂದ
1ಅಕ್ಕ ದೇವ ನೋಹನ ಪಿಂಞ ಅಂವೊಂಡ ಕ್‌ಣ್ಣ ಮಕ್ಕಳ ಆಶೀರ್ವಾದ ಮಾಡಿತ್: ನಿಂಗ ಅಬಿವೃದ್ದಿ ಪೊಂದಿತ್, ನಿಂಗಡ ಸಂತಾನ ಬಲ್ಯದಾಯಿತ್, ಈ ಲೋಕತ್‌ನ ದುಂಬಿಚಿಡುವಿರ. 2ಬೂಮಿರ ಮೇಲೆ ಉಳ್ಳ ಎಲ್ಲಾ ಪ್ರಾಣಿಯ, ಬಾನತ್‌ಲ್‌ ಉಳ್ಳ ಎಲ್ಲಾ ಪಕ್ಷಿಯ, ನೆಲತ್‌ಲ್‌ ಪರಿಯುವ ಎಲ್ಲಾ ಪ್ರಾಣಿಯ ಪಿಂಞ ಸಮುದ್ರತ್‌ಲ್‌ ಉಳ್ಳ ಎಲ್ಲಾ ಮೀನ್‌ ನಿಂಗಕ್‌ ಬೊತ್ತಿತ್‌ ಬೊರಡ್‌ವ. ಅದನೆಲ್ಲಾ ನಿಂಗಡ ಕೈಕ್‌ ಕೊಡ್‌ತಿತುಳ್ಳ. 3ನಾನ್ ನಿಂಗಕ್‌ ಕಾಳ್‌ಕಡ್ಡಿ ಪಿಂಞ ತರಕಾರಿನ ತಿಂಬಕ್‌ ತಂದನೆಕೆ, ಬೂಮಿರ ಮೇಲೆ ಉಳ್ಳ ಜೀವಜಂತುವಳ ನಿಂಗಕ್‌ ಆಹಾರವಾಯಿತ್‌ ತಂದಿಯೇ. 4ಆಚೇಂಗಿ ಯರ್ಚಿನ, ಅದ್‌ಂಡ ಜೀವ ಆನ ಚೋರೆರೆ ಕೂಡೆ ನಿಂಗ ತಿಂಬಕ್ಕಾಗ. 5ಇದಲ್ಲಾತೆ ನಿಂಗಡ ಜೀವತ್‌ನ ಎಡ್‌ಪಂವೊನ ಕಂಡಿತವಾಯಿತ್‌ ಅದಂಗಾಯಿತ್‌ ಲೆಕ್ಕ ಕ್‍ೕಪಿ. ಒರ್‌ ಕಾಡ್‌ಪ್ರಾಣಿ ಮನುಷ್ಯನ ಕೊಂದತೇಂಗಿ, ಆ ಪ್ರಾಣಿ ಚಾವಂಡು. ಒರ್‌ ಮನುಷ್ಯ ಇಂಞೊರ್‌ ಮನುಷ್ಯನ ಕೊಂದತೇಂಗಿ, ಆ ಮನುಷ್ಯ ಚಾವಂಡು. 6ದೇವ ಮನುಷ್ಯನ ತಾಂಡ ರೂಪತ್‌ಲ್‌ ಸೃಷ್ಟಿ ಮಾಡ್‍ನಗುಂಡ್, ಒರ್‌ ಮನುಷ್ಯ ಇಂಞೊರ್‌ ಮನುಷ್ಯನ ಕೊಂದತೇಂಗಿ, ಅಂವೊಂಡ ಜೀವ ಸಹ ಒರ್‌ ಮನುಷ್ಯಂಡ ಕೈಯಿಂಜಲೆ ಪೋಪ. 7ನಿಂಗ ಅಬಿವೃದ್ದಿ ಪೊಂದಿತ್ ದುಂಬಿತ್, ಬೂಮಿರ ಮೇಲೆ ನಿಂಗಡ ಸಂತಾನಕಾರಂಗ ದುಂಬ ಬೊಳೆಯಡ್‍ೕಂದ್‌ ಎಣ್ಣ್‌ಚಿ.
8ಇದಲ್ಲಾತೆ ದೇವ ನೋಹನ ಪಿಂಞ ಅಂವೊಂಡ ಕ್‌ಣ್ಣ ಮಕ್ಕಳ ನೋಟಿತ್: 9ನೋಟಿ, ನಾನ್ ನೀಡ ಕೂಡೆ ಪಿಂಞ ಬಯ್ಯ ಬಪ್ಪ ನೀಡ ಸಂತಾನತ್‌ರ ಕೂಡೆ, 10ನೀಡ ಕೂಡೆ ಜೀವಂತವಾಯಿತುಳ್ಳ ಎಲ್ಲಾ ಜೀವಿಯಡ ಕೂಡೆ, ಹಡಗಿಂಜ ಪೊರ್‌ಟ್ ಬಂದ ಪಕ್ಷಿಯ, ಚಾಕ್‌ ಪ್ರಾಣಿಯ ಪಿಂಞ ಎಲ್ಲಾ ಕಾಡ್‌ ಪ್ರಾಣಿಯಡ ಕೂಡೆ ನಾಡ ಒಪ್ಪಂದತ್‌ನ ಮಾಡುವಿ. 11ನಾನ್ ನಾಡ ಒಪ್ಪಂದತ್‌ನ ನೀಡ ಕೂಡ ಸ್ತಿರ ಮಾಡುವಿ; ನಾನ್ ನೇರಾಯಿತ್‌ ಜೀವಂತವಾಯಿತುಳ್ಳ ಪ್ರಾಣಿಯಳ ಪಿಂಞ ಬೂಮಿನ ನಾಶ ಮಾಡ್‌ವಕ್‌ ಇಂಞೊರ್‌ ಜಲಪ್ರಳಯತ್‌ನ ಅಯಿಪುಲೇಂದ್‌ ಎಣ್ಣ್‌ಚಿ. 12ಇಂಞು ದೇವ: ನಾನ್ ನಿಂಗಕು ನಾಕು ಪಿಂಞ ನಿಂಗಡ ಕೂಡೆ ಉಳ್ಳ ಎಲ್ಲಾ ಜೀವಜಂತುವಕು, ಇಂಞು ಮಿಂಞಕ್‌ ಬಪ್ಪಕುಳ್ಳ ಎಲ್ಲಾ ಸಂತಾನಕು ಮಾಡುವ ಒಪ್ಪಂದಕ್‌ ಗುರ್ತಾಯಿತ್, 13ನಾನ್ ಮೋಡತ್‌ಲ್‌ ನಾಡ ಮಳೆ ಬಿಲ್ಲ್‌ನ ಬೆಚ್ಚಿತುಳ್ಳ. ಅದ್‌ ನಾಕು ಈ ಬೂಮಿಕು ಮಾಡ್‌ನ ಒಪ್ಪಂದಕ್‌ ಗುರ್‌ತಾಯಿತ್‌ಪ್ಪ. 14ನಾನ್ ಈ ಬೂಮಿರ ಮೇಲೆ ಮೋಡತ್‌ನ ಅಯಿಪಕ, ಮಳೆ ಬಿಲ್‌ಲ್‌ ಕಂಡ್‌ ಬಪ್ಪ. 15ಅಕ್ಕ ನಾನ್, ನಾಕು ನಿಂಗಕು ಪಿಂಞ ಎಲ್ಲಾ ತರತ್‌ರ ಜೀವಜಂತುವಡ ಕೂಡೆ ಮಾಡ್‌ನ ಒಪ್ಪಂದತ್‌ನ ಗೇನ ಮಾಡಿಯೊವಿ. ಇಂಞು ಮಿಂಞಕ್‌ ಜೀವಂತವಾಯಿತ್‌ಪ್ಪ ಎಲ್ಲಾ ಜೀವಿಯಳ ನಾಶ ಮಾಡ್‌ವಕ್‌ ಮಳೆ ಜಲಪ್ರಳಯವಾಯಿತ್‌ ಆಪುಲೆ.
16ಆ ಮಳೆ ಬಿಲ್ಲ್‌ನ ಬಾನತ್‌ಲ್‌ ಕಂಡ್‌ ಬಪ್ಪಕ, ನಾಕೂ ಬೂಮಿಲ್‌ ಜೀವಂತವಾಯಿತುಳ್ಳ ಜೀವಿಯಡ ಕೂಡೆ ಉಳ್ಳ ನಿತ್ಯ ಒಪ್ಪಂದತ್‌ನ ಗೇನಮಾಡಿಯೊವೀಂದ್‌ ಎಣ್ಣ್‌ಚಿ. 17ಪಿಂಞ ದೇವ ನೋಹಂಗ್: ಅಕ್ಕು, ಈ ಮಳೆ ಬಿಲ್‌ಲ್‌ ನಾಕ್‍ ಪಿಂಞ ಜೀವಂತವಾಯಿತುಳ್ಳ ಎಲ್ಲಾ ಜೀವಿಯಡ ಕೂಡೆ ನಾನ್ ಮಾಡ್‌ನ ಒಪ್ಪಂದಕ್‌ ಗುರ್‌ತ್‍ೕಂದ್‌ ಎಣ್ಣ್‌ಚಿ.
18ಹಡಗಿಂಜ ಪೊರ್‌ಟ್ ಬಂದ ನೋಹಂಡ ಕ್‌ಣ್ಣ ಮಕ್ಕ ಶೇಮ್, ಹಾಮ್, ಯೆಫೆತ್‌ ಎಣ್ಣುವಯಿಂಗಳೇ. (ಹಾಮ್ ಕಾನಾನ್‌ಕ್‌ ಅಪ್ಪನಾಯಿತ್‌ಂಜತ್‌) 19ನೋಹಂಡ ಈ ಮೂಂದ್‌ ಕ್‌ಣ್ಣ ಮಕ್ಕಡಿಂಜಲೇ ಈ ಬೂಮಿರ ಮೇಲೆ ಎಲ್ಲಾ ಕಡೆಯೂ ಜನ ದುಂಬ್‌ಚಿ.
20ಜಲಪ್ರಳಯ ಆನದು, ನೋಹ ವ್ಯವಸಾಯ ಮಾಡ್‌ವಕ್‌ ಸುರು ಮಾಡ್‌ಚಿ. ಆದ್ಯವಾಯಿತ್‌ ದ್ರಾಕ್ಷಿ ತೋಟತ್‌ನ ಮಾಡ್‌ನಂವೊ ಇಂವೊನೇ. 21ಅಂವೊ ತಾನ್‌ ಮಾಡ್‌ನ ದ್ರಾಕ್ಷಿರಸತ್‌ರ ಕಳ್ಳ್‌ನ ಜಾಸ್ತಿ ಕುಡಿಚಿತ್‌ ಅಂವೊಂಡ ಗುಡಾರತ್‌ಲ್‌ ಬೆತ್ತಲೆಯಾಯಿತ್‌ ಬುದ್ದಂಡತ್. 22ಕಾನಾನ್‌ಕ್‌ ಅಪ್ಪನಾನ ಹಾಮ್, ಅಪ್ಪ ಬೆತ್ತಲೆಯಾಯಿತ್‌ ಉಳ್ಳಾನ ಕಂಡಿತ್, ಅಂವೊ ಪೊರಮೆ ಪೋಯಿತ್‌ ತಾಂಡ ಅಣ್ಣತಮ್ಮಣಂಗಳಾನ ಶೇಮ್ ಪಿಂಞ ಯೆಫೆತಂಗ್‌ ಎಣ್ಣ್‌ಚಿ. 23ಆಚೇಂಗಿ ಶೇಮ್ ಪಿಂಞ ಯೆಫೆತ್‌ ಕಂಬಳಿನ ಎಡ್‌ತ್‌ಂಡ್‌ ತಂಗಡ ಬೆನ್ನ್‌ರ ಮೇಲೆ ಇಟ್ಟಂಡ್‌ ಬಯ್ಯಕ್‌ ನಡ್‌ದಂಡ್‌ ಪೋಯಿತ್‌ ಅಪ್ಪಂಡ್‌ ಬೆತ್ತೆಲೆನ ಮುಚ್ಚ್‌ಚಿ. ಅಯಿಂಗಡ ಮೂಡ್‌ನ ಇಂಞೊರ್‌ ಬರಿಕ್‌ ತಿರ್‌ಗಿತ್‌ಂಜನಗುಂಡ್‌ ಅಯಿಂಗ ಅಪ್ಪಂಡ ಬೆತ್ತಲೆನ ಕಂಡಿತ್‌ಲೆ. 24ನೋಹ ಕುಡಿಚ ಬೋದೆಯಿಂಜ ಏವಕ ತಾಂಡ ಚೆರಿಯ ಮೋಂವೊ ಮಾಡ್‌ನದ್‌ ಗೊತ್ತಾಚಿ. 25ಅಂವೊ ಹಾಮಂಡ ಸಂತಾನಕ್‌ ಶಾಪ ಇಟ್ಟಿತ್, ಅಂವೊ ಶೇಮ್, ಯೆಫೆತ್‌ರ ಸಂತಾನತ್‌ರ ಅಡಿಯಾಳಂಗಕ್‌ ಅಡಿಯಾಳಾಯಿತ್‌ ಇಪ್ಪಾಂದ್‌ ಎಣ್ಣ್‌ಚಿ . 26ಇಂಞು ನೋಹ: ಶೇಮಂಡ ಯೆಹೋವನಾನ ದೇವಂಗ್‌ ವಂದನೆ. ಕಾನಾನ್‌ ಶೇಮಂಗ್‌ ಅಡಿಯಾಳಾಯಿತ್‌ ಇರಡ್. 27ಯೆಹೋವನಾನ ದೇವ ಯೆಫೆತ್‌ರ ಜಾಗತ್‌ನ ಬಲ್ಯದ್‌ ಮಾಡಡ್‌ ಪಿಂಞ ಶೇಮಂಡ ಅಬಿವೃದ್ದಿಲ್‌ ಅಂವೊಂಗು ಪಾಲ್‌ ಕ್‌ಟ್ಟಡ್. ಕಾನಾನ್‌ ಅಂವೊಂಗ್‌ ಅಡಿಯಾಳಾಯಿತ್‌ ಇರಡ್. 28ಜಲಪ್ರಳಯ ಬಂದ ಪಿಂಞ ನೋಹ ಇಂಞು ಮುನ್ನೂಟ್ಯ ಐಂಬದ್‌ ಕಾಲ ಬದ್‌ಕ್‌ಚಿ. 29ಅಂವೊ ಒಟ್ಟ್‌ ಒಂಬೈನೂಟ್ಯ ಐಂಬದ್‌ ಕಾಲ ಬದ್‌ಕಿತಿಂಜತ್, ಪಿಂಞ ಚತ್‌ ಪೋಚಿ.
ప్రస్తుతం ఎంపిక చేయబడింది:
ಆದ್ಯತ್‌ರ ಪುಸ್ತಕ 9: ಕೊಡವ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2017, New Life Literature (NLL)
