1 Abanya Korĩnto 3
3
Abagombe ba Nyamuhanga
1Nĩkwa balĩkyetu, ĩngye mondatoka erĩbũga nenyũ nga muli bandu bakwamĩre Omũlĩmũ, nĩkwa nabũga nenyũ nga muli bandu abakwamĩre omubiri, nga muli Bakristo balere-balere.
2Monabalĩsya amasabũ, butsira akalyo akakala-kalĩre, kusangwa Simwabya mukatoka eriryako. Na lino simulimwatokako. 3Kusangwa lino mukine bandu abakwamĩre omubiri. Kusangwa omugulu hakine eritsuro nʼamanegeno omo katĩkatĩ kenyũ, sĩmũkwamĩre omubiri kwehĩ? Kandi simwelendera ngʼabandu bʼekihugo kwehĩ? 4Kusangwa omugulu omundu akabũga ati, Ĩngye indi wa Paũlo; nʼogundi ati, Ĩngye indi wa Apolo; isimuli bandu bʼekihugo kwehĩ?
5Ko Apolo nindi kwehĩ? Kandi Paũlo nindi kwehĩ? Tuli bagombe abaleka ĩmwĩkĩrĩrya. Obuli muguma wʼũkwʼĩtwe tukakola omũbĩrĩ ogo Mukama akatuha erikolago. 6Ĩngye nahera embuto, Apolo mũtũlĩra kuyo kwʼamagetsi, nĩkwa Nyamuhanga yo waleka embuto iyalasa. 7Neryo omũherĩ wʼembuto, nʼoyũkũtũlĩra kuyo kwʼamagetsi sibegasakĩ. Ni Nyamuhanga yũkalasayayo. 8Neryo omũherĩ wʼembuto, nʼoyũkũtũlĩra kuyo kwʼamagetsi balingene, kandi obuli mundu asyahembwa na Nyamuhanga ngoko mũbĩrĩ wuwe ali. 9Kusangwa Nyamuhanga yo tukakola haguma naye, kandi ĩnywe muli irima lya Nyamuhanga.
Kandi muli nyũmba ya Nyamuhanga. 10Neryo Nyamuhanga mwamba olũsũnzo luwe, lwʼomũbĩrĩ. Neryo ngʼomũhĩmbĩ munyima-nyima wʼamenge monahula ekibanza, nĩkwa ogundi akahĩmba kukyo. Neryo obuli mundu ayĩtegaye ngʼakahĩmba ati.
11Kusangwa Nyamuhanga abĩrĩhĩra Yesu Kristo mo kibanza ĩkyokyene, neryo sihali ekindi kibanza ekyangahĩrwaho. 12Neryo omundu akahĩmba oko kibanza omo syamagetsi, kutse esyʼebĩtsĩpa, kutse amabwe wʼobũgũlĩ bunene, kutse miti, kutse biti, kutse esyombuba. 13Kandi omũbĩrĩ wʼobuli mundu asyaminyikala, kusangwa ekiro kya Kristo kyasyakanganĩago. Kandi omuliro asyabĩsũlago, ni muliro asyalenga omũbĩrĩ wʼobuli mundu nga nĩ wa mũsĩndo wahi. 14Obũhĩmbe bwʼomundu bwamabyaho enyũma wʼomuliro, asyahembwa obũhĩngĩ. 15Nĩkwa Obũhĩmbe bwʼomundu bwamahĩsĩbwa omo muliro asyaherya; nĩkwa iye asyalamĩbwa ngʼoyo wabala omo muliro.
16Sĩmwasĩ ko muli hekalũ ya Nyamuhanga kwehĩ, kandi kʼOmũlĩmũ wa Nyamuhanga ĩkere omwisi wenyũ kwehĩ? 17Neryo omundu amaherya ehekalũ ya Nyamuhanga, Nyamuhanga asyamũherya. Kusangwa ehekalũ ya Nyamuhanga ĩbũyĩrĩre, nenyũ muli ehekalũ eyo.
18Sihabye mundu oyũkayĩtebaya. Omundu omo katĩkatĩ kenyũ amaganĩrya nga ni wʼamenge wʼekihugo kino, abye mũkĩrũ, iniatoka eribya wʼamenge kũndũ. 19Kusangwa amenge wʼekihugo kino nĩ bũkĩrũ embere sya Nyamuhanga. Ngoko kĩsakĩre kiti,
Nyamuhanga akahamba abʼamenge omo menge wabo mabi.
20Nʼawandi Masako ati,
Omukama anasĩ kwʼamalengekanĩa wʼabʼamenge kwʼategasakĩ.
21Neryo Sihabye mundu oyukayihalamba busana nʼabandu. Kusangwa emyatsi yosĩ nĩ yenyũ. 22Amabya ini Paũlo, kutse Apolo, kutse Petero, kutse ekihugo, kutse engebe, kutse oluholo, kutse emyatsi ya lino, kutse emyatsi ikandisyasa, emyatsi yosĩ nĩ yenyũ. 23Nenyũ muli aba Kristo, kandi Kristo ni wa Nyamuhanga.
ప్రస్తుతం ఎంపిక చేయబడింది:
1 Abanya Korĩnto 3: KB80
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Kinandi © Bible Society of the Democratic Republic of Congo, and Bible Society of Uganda, 1980.