1 Abanya Korĩnto 1
1
1Ĩngye Paũlo, oyo wabirikirawa busana nʼerisonda lya Nyamuhanga eribya mukwenda wa Kristo Yesu. Ĩngye nʼomũlĩkyetu Sosĩtenĩ, 2tukabasakira haguma, ĩnywe kanĩsa ya Nyamuhanga eyiri eKorĩnto, ababirikirawa eribya bandu ba Nyamuhanga, abahigulawa erimatikana na Kristo Yesu. Kandi tukabasakira haguma nʼabandu bosĩ ehosĩ abakalakira erĩna lyʼomukama wetu Kristo. Yo Mukama wabo nʼowetu. 3Nyamuhanga Tata wetu nʼomukama Yesu Kristo abahe olukogo nʼobuholo.
Omũyĩsa wa Kristo
4Ngaha Nyamuhanga yʼewasĩngya emigulu yosĩ busana nenyũ. Kandi ngamuha ewasĩngya busana nʼolukogo luwe, olo mwahabawa busana na Kristo Yesu. 5Kusangwa eriwatana na Kristo lyabiribaha eribya abʼebindu omo myatsi yosĩ, omwʼĩbũga lyosĩ, nʼamenge gosĩ. 6Engulu ya Kristo yabiribererera omwisi wenyũ, 7neryo simwetabula olũsũnzo nʼoluguma lwa Nyamuhanga, imunemulindirira eriminyikala lyʼomukama wetu Yesu Kristo. 8Naye asyabasĩkya erĩhĩka oko ndũlĩ, isimuli oko lubanza oko kiro kyʼomukama wetu Yesu Kristo. 9Nyamuhanga sialiregula, naye abiribabirikira erisakana nʼomugala wuwe, Omukama wetu Yesu Kristo.
Erigabana omo Kanĩsa
10Neryo balĩkyetu, ngabalemba-lemba omo lĩna lyʼomukama wetu Yesu Kristo, nyiti ĩnywe bosĩ mũbũge kiguma. Nyiti Sihabye erigabana omo katĩkatĩ kenyũ, nĩkwa mubohane omo bũlengekanĩa buguma nʼomutima muguma. 11Kusangwa abalĩkyetu abʼekĩtũnga kya Kloe, babĩrĩnyĩtũlĩrago busana nenyũ bati, hali erinegena omo katĩkatĩ kenyũ. 12Neryo nyiti, obuli mundu ũkwʼĩnywe akabũga ati, Ĩngye indi wa Paũlo, nʼogundi ati, Ĩngye indi wa Apolo, nʼogundi ati, Ĩngye indi wa Petero, nʼogundi ati, Ĩngye indi wa Kristo. 13Ko Kristo agabĩrwe kwehĩ? Na Paũlo mwabambwa oko musalaba busana nenyũ kwehĩ? Kutse mwabatĩsĩbawa omo lĩna lya Paũlo kwehĩ?
14Ngaha Nyamuhanga yʼewasĩngya kundi mondabatĩsya mundu nʼomuguma omo katĩkatĩ kenyũ, nina Krĩspo na Gayo, ĩbobene. 15Neryo Sihabye mundu oyũkabũga ati mwabatĩsĩbawa omo lĩna lyage. 16Nĩkwa monabatĩsya enyũmba ya Setefano, nĩkwa Sĩnyasĩ ogundi nabatĩsaya. 17Kusangwa Kristo mwatanyituma erĩbatĩsya, nĩkwa anyituma erĩtũla Engulu Yowene. Nʼerĩtũlago butsira omo kĩsehya kyʼebĩnywa byʼabandu, neryo omusalaba wa Kristo akasyayirwa mo buyira.
Kristo nĩ bũtokĩ nʼamenge wa Nyamuhanga
18Kusangwa omwatsi wʼomusalaba nĩ bũkĩrũ oko bandu abakahera, nĩkwa nĩ bũtokĩ bwa Nyamuhanga busana netu, ĩtwe tũkalamĩbawa. 19Kusangwa Amasako akabũga ati,
Nasyaherya amenge wʼabʼamenge,
Kandi nasyalũsya eriminya lyʼabanyima-nyima.
20Omundu wʼamenge ali hahi kwehĩ? Omũsakĩ ali hahi kwehĩ? Embũyĩ yʼekihugo yʼomugulu ono yiri hahi kwehĩ? Nyamuhanga abiriyira amenge wʼekihugo kino mo bũkĩrũ.
21Kusangwa ekihugo mokitetatoka eriminya Nyamuhanga omo menge wakyo. Neryo omo menge wuwe Nyamuhanga mwatsemesĩbwa erĩlamya abandu abakĩkĩrĩraya busana nʼobũkĩrũ bwʼomwatsi tũkatũla. 22Kusangwa Abayũda bakabũlaya ebitiko-tiko, nʼAbagĩrĩkĩ bakasonda-sonda amenge; 23nĩkwa ĩtwe tũkakanganaya Kristo oyo wabambawa oko musalaba. Abayũda sĩbanzĩre omwatsi oyũ, nʼabandu bʼEbihanda bakaganza omwatsi oyo mo bũkĩrũ. 24Nĩkwa busana nʼabo Nyamuhanga akabirikira, Abayũda nʼAbagĩrĩkĩ, Kristo nĩ bũtokĩ bwa Nyamuhanga, kandi, ni menge wa Nyamuhanga. 25Kusangwa obukahulawa mo bũkĩrũ bwa Nyamuhanga, ni bwʼamenge kwilaba awʼabandu, nʼobukahulawa mo bolo bwa Nyamuhanga, bũkalĩre kwilaba abandu.
26Balĩkyetu, mwibuke ngoko mwabya ekiro Nyamuhanga ababirikira. Sihabya bangi omo katĩkatĩ kenyũ abakahulawa mo bandu bʼamenge, kutse esyombangĩ, kutse abakulu. 27Nĩkwa Nyamuhanga mwayisoga emyatsi mĩkĩrũ yʼekihugo erihemula abandu bʼamenge. Kandi Nyamuhanga abiriyisoga emyatsi myolo yʼekihugo erihemula esyombangĩ. 28Kandi Nyamuhanga mwayisoga emyatsi eyikaponawa nʼabandu, nʼemyatsi eyikaganzawa nʼabandu nga buyira, kandi emyatsi eyiteho, iniatoka erĩsĩnga emyatsi eyiriho. 29Neryo Sihabye mundu oyukayihalamba embere sya Nyamuhanga. 30Nĩkwa Nyamuhanga abĩrĩbamatĩkanĩa na Kristo Yesu. Kandi Nyamuhanga abiriyira Kristo eribya menge wetu. Busana na Kristo tukatunganana embere sya Nyamuhanga, kandi busana na Kristo tukabya bana ba Nyamuhanga, nʼeribya bwĩranda. 31Neryo ngoko Amasako akabũga ati, Oyukayihalamba, ayihalambe umwʼebyo Omukama abirikola.
ప్రస్తుతం ఎంపిక చేయబడింది:
1 Abanya Korĩnto 1: KB80
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Kinandi © Bible Society of the Democratic Republic of Congo, and Bible Society of Uganda, 1980.