Matiu 10

Yisa pii tuumba

(Maak 3.13-19; Luk 6.12-16)

1Ka Yisa daa ti bol’ o nyaandoliba pinaayi la na nti niŋ ba yiko ni bɛ kariti alizin’ biɛri niriba zuɣu bahira, ka tibiri dɔro balibu kam mini dɔr’ biɛri balibu kam ni mali ninvuɣ’ shɛba. 2O tuumba pinaayi maa yuya m-bɔŋɔ: Saimɔn ŋun yuli lan booni Pita la min’ o tizo Anduru ni Zɛbidii bihi Jeemsi min’ o tizo Jɔn ni 3Filip mini Baatolomiu ni Tomas ni Matiu ŋun daa nyɛ farigudeera la ni Alifius bia Jeemsi ni Taddius ni 4Saimɔn ŋun daa nyɛ bɛn bɔri ni bɛn’ Izraɛlnim’ su bɛmaŋ’ la ni yino ni Judas Isikariɔt ŋun daa ti yi Yisa nyaaŋa la.

Yisa tuumba pinaayi timbu

(Maak 6.7-13; Luk 9.1-6)

5Ka Yisa daa tim tuumba pinaayi maa ka kpahi bɛ zuɣu ni yɛli, “Miriya ka yi chaŋ bɛn pa Yɛhudianim’ sani, yi mi di kpɛnya Samarianim’ tin’ shɛl’ ni, 6amaa chamiyala Izraɛlnim’ bɛn bɔrigi kaman piɛri la sani. 7Yi yi chana, yin’ yihimiya waazu yɛra, ‘Alizanda nam mirina.’ 8Ka tibimiya barinima, ka neemiya kpiimba, ka chɛliya ka kɔnsi kpaŋda, ka karimiya alizin’ biɛri bahira. Yi dee’ li la yoli, yi gba timiya li yoli. 9Di ʒin ya liɣiri din nyɛ salima bee anzinfa, hal di zaŋya kɔbo gba n-niŋ yi liɣiri kolibihi ni 10#1 Kɔr 9.14; 1 Tim 5.18 bee n-ʒin ya adiikunima n-chaŋ yi chandi maa bee n-yɛnya daliyanima ayiyi; yi mi di piriya namda bee n-gbibi jaaŋgbɛhi, dama tumtumda kam simdi ni bɛ ti o bindirigu.

11 “Yi yi ti kpe fɔntiŋ’ ni bee tiŋkpaŋa, yin’ bɔhimiya n-nya ninvuɣ’ chirichi n-kpe o yiŋa m-be nimaani hal nti yi tiŋ’ maa ni. 12Yi yi ti kpe yil’ shɛli, yin’ puhimiya ba puhiri suŋ. 13Yili maa yi nyɛla yil’ chirichi, yin’ chɛliya ka yi daalibarika kpalim di ni; amaa di yi pala yil’ chirichi, yin’ chɛliya ka yi daalibarika kpalim yi sani. 14#Tuma 13.51 Ka so yi ti bi deei ya bee n-zaɣisi yi yɛligu wumbu, yi yi ti yɛn yi yili maa ni bee di tiŋ’ maa ni, yin’ pihimiya yi napɔna taŋkpaɣu bahi di zuɣu. 15#Mat 11.24; Pil 19.24-28 Yɛlimaŋli ka n yɛri ya, zaadali Sɔdomnim’ mini Gomɔranim’ azaaba nyabu ni ti so tiŋ’ maa nim’ dini.”

Wahala mini nahiŋgu din kanna

(Maak 13.9-13; Luk 12.11-12; 21.12-17)

16 # Luk 10.3 Yisa daa lan yɛli ba, “Nyamiya, n tim ya mi kaman piɛri ni be kunduna sunsuuni shɛm la; dinzuɣu maliya yɛm kaman tinvura, ka benya baalim kaman ŋmana la. 17Miriya daadamnima! Bɛ ni ti gbahi ya tahi ʒiishɛhi, ka fiɛbi ya Yɛhudianim’ jɛmbu duri ni, 18ka zaŋ ya tahi gomnanim’ mini nazuɣuri tooni n zuɣu, ka yi ti niŋ n shɛhiranima bɛ mini bɛn pa Yɛhudianim’ sani. 19Dinzuɣu bɛ yi ti gbahi ya tahi saria karibu shee, yin’ di chɛliya ka yi suhuri zɔhiri yi ni ti yɛn yɛli shɛm bee n-tɔɣisi shɛm zuɣu; di saha maa yi ni ti baŋ yi ni yɛn yɛli shɛm, 20#Maak 13.9-11; Luk 12.11-12; 21.12-15 dama pa yinima nti yɛn tɔɣisi, amaa di ti yɛn nyɛla yi Ba Naawuni Shia n-yɛn be yi ni tɔɣisira.

21 # Maak 13.12; Luk 21.16 “Di saha nir’ ni ti yi o mabia nyaaŋa n-chɛ ka bɛ ku o; ka doo ni ti yi o bia nyaaŋa n-chɛ ka bɛ ku o, ka bihi gba ti zaɣisi bɛ banim’ mini bɛ manima, ka zaŋ ba puhi kubu. 22#Mat 24.9, 13; Maak 13.13; Luk 21.17 Ka sokam ni ti jɛn ya n yuli zuɣu. Amaa ŋunkam ti niŋ suhukpeeni hal ni wahala ŋɔ bahigu ni ti tiligi. 23Bɛ yi ti muɣisi ya tin’ shɛl’ ni, yin’ yimiya ni n-taɣi tiŋa; dama yɛlimaŋli ka n yɛri ya, yi na ku chaŋ tuui Izraɛl tinsi zaa ka Daadam Bia labina.

24 # Luk 6.40; Jɔn 13.16; 15.20 “Karimbia bi garit’ o karimba; dabili mi bi garit’ o duuma. 25#Mat 9.34; 12.24; Maak 3.22; Luk 11.15 Di simdi ni karimbia bemi kaman o karimba; ka dabili mi be kaman o duuma. Ka bɛ yi zaŋ alizin’ biɛri naa yuli Biilzibul m-boli yil’ yidana, wula ka bɛ lee ni bol’ o yiŋnim’ bɛna?”

Di ni simdi ni niriba zo so

(Luk 12.1-3)

26 # Maak 4.22; Luk 8.17 Yisa daa lan yɛla ba yaha, “Dinzuɣu di zɔriya ba dabiɛm, dama binshɛɣu kani din sɔɣiya ka ti ku yi palo, binshɛɣu mi kani m-be ashilɔni ka bɛ ti ku baŋ li. 27N ni yɛli ya shɛli zibisim ni, yɛlimiya li neesim ni; ka yi ni wum shɛli ashilɔni, yin’ molimiya li gili luɣilikam.”

Ti ni simdi ni ti zo so

(Luk 12.4-7)

28 “Di zɔriya bɛn ni tooi ku daadam ka ku tooi ku o shia; amaa zomiyala Naawuni ŋun ni tooi zaŋ daadam niŋgbuŋ min’ o shia zaa niŋ buɣim ni la.” 29Ka bɔhi ba, “Jahinjɛya ayi bi kɔhirila siidi yini? Ka bɛ ni yino mi ku lu tiŋa ka di pala yi Ba Naawuni yubu ni. 30Hal yi zabiri zaa mali kalinli. 31Dinzuɣu di chɛliya ka yi suhuri zɔhira; yi mali buchi pam gari jahinjɛya.”

Bɛn ʒe Yisa nyaaŋa niriba ni

(Luk 12.8-9)

32Yisa daa lan yɛli, “Ŋunkam ʒe n nyaaŋa niriba ni, n gba ni ti ʒe dilan’ nyaaŋa m Ba Naawuni ŋun be alizanda ni ŋɔ sani; 33#2 Tim 2.12 amaa ŋunkam zaɣisi ma niriba ni, n gba ni ti zaɣisi dilana m Ba Naawuni ŋun be alizanda ni ŋɔ sani.”

Yisa ŋun tahi tuɣiligu na

(Luk 12.51-53; 14.26-27)

34 “Di tɛhiya ni n kamina ni n ti ti dunia ŋɔ nim’ suhudoo; m bi kamina ni n ti ti suhudoo, amaa takɔbi ka n tahina. 35N kamina ni n ti tuɣili bidibiga min’ o ba ni bipuɣiŋga min’ o ma ni paɣa min’ o yidana ma; 36#Mai 7.6 ka nir’ yiŋnim’ ni nyɛla o dimnima.

37 “Ka ŋun yur’ o ba bee o ma gari ma, o bi simdi ni o doli ma; ka ŋun yur’ o bidibiga bee o bipuɣiŋga gari ma, o bi simdi ni o doli ma, 38#Mat 16.24; Maak 8.34; Luk 9.23 ka ŋun mi bi kpuɣ’ o dapulli m-buɣi doli ma gba bi simdi ni o doli ma. 39#Mat 16.25; Maak 8.35; Luk 9.24; 17.33; Jɔn 12.25 Ka ŋunkam tiligir’ o nyɛvili ni ti kɔŋ li, ka ŋunkam mi kɔŋd’ o nyɛvili n zuɣu ni ti lan nya li.”

Laara nyabu

(Maak 9.41)

40 # Maak 9.37; Luk 9.48; 10.16; Jɔn 13.20 O daa lan yɛli yaha, “Ŋunkam deeri ya deerila mani, ka ŋunkam deeri ma deerila ŋun tim ma na. 41Ka ŋunkam deeri anabi o ni nyɛ anabi zuɣu ni ti deeg’ anabi laara; ka ŋunkam deeri wuntizɔra o ni nyɛ wuntizɔra zuɣu ni ti deei wuntizɔra laara. 42Ka ŋunkam mi niŋ hal ko’ mahim biɛla ti n nyaandoliba ni yino, hal ŋun pɔri bɛ ni gba, o ni nyɛ n nyaandol’ zuɣu, yɛlimaŋli ka n yɛri ya, o ti ku kɔŋ di laara.”

Lär dig mer om Naawuni Kundi Kasi

Matiu 10

Populära bibelverser från Matiu 10

Populära bibelverser från
Matiu 10