Wikhikən 3
3
1Naka skitapi eyitsəpənak Palosiyək ohəhewow ikək liwisosəpənak Nikotem, tanek etlitplotəm owinowitsəpənak Leswihsow ikək.
2Nekəm pəkəciye anesəpənil Sesohsəl nipayiw, 'tiyal: Nsakəmam, kəciciholpən kənotəkehkikemin weciheyin Kelowəsitow ikək; ipəcəl skat wen okisi lehtonəl yohtəl kənowaskoltikənəl tanil kil kisitonil, skat Kelowəsit wicihemakw.
3Sesohs 'tiyal: Leyo, yəhol, skat wen minowinəmihkosihkw, skatəc onəmitowən Kelowəsit okinceməswakim.
4Nikotem 'tiyal: Tanəc wen təlikisinəmikosin kisi keciwskicinowit? Kisipicesop nisewe wikowasəl apc nəmikoso?
5Sesohs asitewtəm: Leyo, yəhol, skat wen oci nəmikosikw samakwan ikək, naka Kehci-niweskwitow ikək, skat nekəm kisi ksihew Kelowəsit okinceməswahkimək.
6Tan kekw weci tkisitpihak mhəkek, mhək nit; tan kekw wecikisitpihak kehtakwsow ikək, kehtakws nit.
7Mosahk asəkitəhasikəc ktiholən cotehlo tepkawto ktəlnapiyoltiniya apc.
8Wocowsən wetsək tan eliyoli təhatəmowik, kiknotəmən metelamsək kenok skat kci citowən tan weciyak kesəna tan elihak. Nit teleyit msiw wen tan weci əlnapit Kehci-niweskwitow ikək.
9Nikotem asitewtəm: Tanəc yohtəl kekwsal əlikisilew?
10Sesohs asitewtəm: Kil etə etlinotəkehkikemiyən Islel ikək, skat kci citonəl yohtəl kekwseyal?
11Leyo, iyatol noskotəmənen tan kecitowek, nəspiw olamatəmənen tan nimitowek, kenok kilowaw skat wihkwehtoniyowihpən nəspiwolamewakənən.
12Kisi yəholekwsəpən tanil skitkəmikweweyal skat olamsətəmowekosəpən, tanəc ktəli olamsətəməniya yəholeyekw tanil spəmkik təleyal?
13Skat wen kisi onakesə spəmkik nət tepəkt nekəm tan weci pənehkwehsits spəmkik, iya pəmawsowin 'Kwəssəl tan iw spəmkik.
14Tahalo Mowis teliwnakelatpən hatosisowəl pakətakəmikw, nit təkec otahcowi liyonakehlan pəmawsowin 'Kwəssəl.
15Welaman msiw wen tan welamsətək ohəkek otihinc askəmawsowakən.
16Ipəcəl Kelowəsit etohci mosacitpən skitkəmikw wecimilowetpən wihwipə 'Kwəssəl, welaman msiw wen tan welamsətək ohəkek, skatəp ksikehewi, kenok otiyinp askəmawsowakən.
17Ipəcəl Kelowəsit skat oci əlkimawipənil 'Kwəssəl skitkəmikw onmacit pəlotaməlin skitkəmikw, kenok oci ilkimapənil welaman skitkəmikw ocikikan ohəkek.
18Tan wen welamsətək ohəkek skat onmacitplomawo; kenok nekəm tan skat welamsətəmok təkec onmacitploma: Ipəcəl skat wəlamsətəmowən Kelowəsitəl wihwipo 'Kwəssəl wisowən ikək.
19Yot wicihak onmaci tplotəmowakən, ipəcəl pəssakwek ikahak skitkəmikw, kenok pəmawsowinowək peyemimosaciniya piskahtek skat tetpiw pəshakwhek, ipəcəl okisitakənowəl skat kəlowətowiyəl.
20Ipəcəl msiw tan wen poski wapələloket ocisinəmən pəssakwek, skat opəkəciyawən pəssakwek, welaman otəlohkewakənəl skat ocimawənəl.
21Kenok tan wen welameloket, otəlehton olamewakən, pəkəcihepəssakwek, welaman otəlohkewakənəl kəcicitasowəl ocikisitasowəl Kelowəsitow ikək.
22Nit kisitpihetol yohtəl kekwseyal Sesohs pəkəciheyepən, naka tanik wetəkehkimocik ohəkek petapasopənik ktakəm ikək Leswihsowakik, nit tet etlimawi oltititpən, etli papteysowehlowatititpən.
23Naka Sapatis etli paptihsowehloweyehpən. Enənk kwihiw Selemk ipəcəl ktanakot samakwan eyikpən nit. Petapasopənik papteysowehtasoltopənik.
24Ipəcəl Sapatis mehc meskw pihsehlawihipən laplisonək.
25Naka toci papehcitowakən ikehe Sapatisk wetəkehkimkosicik Leswihs ociwakəmehləswakən.
26Petapasiniyal Sapatisəl 'tiyawal: Lapeyi, Təpeltəm, nət skitap tan niseyawtiyekpən Kamək Soltənk, kil tan nespiwəlamewotəpən, sakiht, nekəm paptihsowehlowe, msiw pəmawsowinowək opetapasiniyal.
27Sapatis itəm: Kətama wen oməsənəmowən kekw, skat ocimilamok spəmkik.
28Kilowaw kocinspiwəlamhətipa nil yəholehkpən nil skat Niweskwit, tan Mimkweno; kenok nikankimk nekəm ohəkek.
29Nekəm tan ewat mahtamaliyewəl, mosimaliye nət; kenok mosimaliye witapiyəl tan sehket onotowəl mosimaliyewəl, kəmac olitəhaso ocimosimaliyewol eltakwsilit. Nit tehc yot nolitəhasowakən psənte.
30Nekəm cə pəminəkəmkil kenok nil cə npəmiyapsəkil.
31Nekəm tan wecihat spəmək mawispew. Tan 'cey ktakəmikok; ktakəmikwewe nit, oskowotəmən ktakəmikw. Nekəm tan wecihat spəmkik mawispew.
32Naka tan nemitakwpən naka tan notəkəpən weci nspiwəlamet, onəspiw olamewakən kətama wen wikwehtowən.
33Nekəm tan wikwehton onəspiw wəlamewakən kisi nspiwolamalat Kelowəsitəl olamewakənilin.
34Nekəm tanil Kelowəsit elkimatpənil itəmənəl: Kelowəsitəl okəlosowakənəl; ipəcəl Kelowəsit skat otəlimilowawonəl. Kehci-niweskwilicil ətpihikənək.
35Mihtakwsit Kelowəsit omosacinəl 'Kwessəl, msiw kekw omilan opitinək.
36Nekəm tan welamsətək Kelowəsit 'Kwəssəl ohəkek otiyin askəmawsowakən. Kenok nekəm tan skat welamsətəmok Kelowəsit 'Kwəssəl, skatəc onəmitowən pəmawsowakən; kenok Kelowəsit okiyowakən ənkeso ohəkek.
Currently Selected:
Wikhikən 3: PQM2014
Highlight
Share
Copy
Want to have your highlights saved across all your devices? Sign up or sign in
Maliseet Gospel of John © Canadian Bible Society, 2014