Wikhikən 2
2
1Nohowewe kiskət nipowawakən ikehehpən Cenek, Koliletk Sesohs wikowasəl nit iyopənil.
2Naka Sesohs naka tanik wetəkehkimotpənik ohəkek wikwimapənik nipowawakənək.
3Tan ma tahk mekwpahak Sesohs wikowasəl 'tiyal Sesohsəl: Kətama omekwapakəmiwiyək.
4Sesohs 'tiyal: Ehpit wawcihol? Ntepənaskowihakəm meskw ikəpew.
5Wikowasəl 'tiya lokewino: Tan Sesohs iyalolakw, nit əlokhətikw.
6Nit əpoltowək nit kamacin samakwaneyak pənapskweyək katkokək, Leswihsək itəliwakəmelətimkewey amow ikək; lipəskasoltowəkal nisinsk kalonək.
7Sesohs 'tiya: Psənpehlok samakwaneyak katkokək samakwan. Opəsənəpehlawa, tetpəpehlawa.
8'Tiya: Ocisokatok təkec lahpiləmowək etlisakəmawit wikəpaltimək. Naka otəlapiləmowaniya.
9Tan toci etlisakəmawit wikəpaltimək kisi kwetək samakwan, tan mekwpahahkehtasik, skat okəcicitowən tama 'cey, kenok lokewinowək tanik sokahtakwik samakwan okəcicitoniya, etlisakəmawit wikəpaltimək wihkwimal mosimaliyewol,
10'Tiyal: Msiw wen təmk ponehtakw mekwpahak kelowak, okisi məkesəmoltitit, toci tan skat etohci kəlowətonok. Kenok kil kisi nkehton kelowak mekwpahak maləməte təkec.
11Nit yot təmkewe kinowaskoltikən Sesohs kisitakwpən Cehnek, Koliletk, omesowehtonepən okici təmitəhatəmowakən tanik wetəkehkimotpənik ohəkek otəli wəlamsəmtəm otiniyapən ohəkek.
12Nit akimte Sesohs lipənehkwesopən Cepəlniyəmk, nekəm wikowasəl, wicikimacihi oskitapi, naka tanik wetəhkehkimocik ohəkek, yot tet skat osipkiyol tiwniyawihpən.
13Nit keka Leswihsək onankəmihakeweyamowa, Sesohs ətkwakwehe Selosalemk.
14Otətlimskowah Kcihimiyewikwamək nit tanik etlankohətilicihi kowoso, əsihp, pəles, nociyeswonkik manəpolta.
15Oci kisehton ipes apapəsihs ikək, msiw ocinotepawola Kcihimiyewikwamək, kowoso, əsihp, osokiyahkan nociyeswonkik omanimowah, okətkwehtowanəl otatowi potihwal.
16'Tiya tanihi ankowekhaticihi pəles: Sematək nihtəl: Mosahk malsanikwamehtowahkekw Nmihtakws wihk.
17Tanik wetəkehkimocik ohəkek omikwitəhatəmənin otəlowikhasin: Okəselməkwsot kil k ikək 'cey, nəhkahləkon.
18Nit tehc Leswihsək asitewtəmit Sesohsəl, 'tiyawal: Kekwse kinowaskoltikən mesowehtowiyek kocilehton nihtəl?
19Sesohs 'tiya: Nkikaskwoskehtok yot Kcihimiyewikwam, nsokənək nkisitonc.
20Nit tehc Leswihsək itəmotit: Newowinsk kesikətən cel kamacin kwənitasopən yot kci himiyewikwam, kil kisitonc nsokənək?
21Kenok Sesohs weskowotək ohək okici himiyewikwamin.
22Nit tehc kisi apicipet, tanik wetəkehkimocik ohəkek omikwitəhatəməlin nekəm kisi yohokon iyapənil yohtəl. Olamsətəməniya tan elwikhasik Kci wikhikənək, naka kəlosowakən tan Sesohs kisi iyalatpən.
23Na tan toci Sesohs eyit Selosalemk wikhəpaltimək nankəmihakewe wikhəpaltowikiskətək, ktanaksowək welamsətəmotit wisowənək, tan toci nemitoticil kinowaskoltikənəl tanəl kisi lehtakecil.
24Kenok Sesohs skat otəliyolamsətowawən ohəkewak; ipəcəl msiw wenihi okəciciha;
25Skat otəmitəhamawiyəl wenil onəspiw olamewən oskicinowəl; ipəcəl onəkanənəmənəl tanil kekwsal eyikil pəmawsowi nowək.
Currently Selected:
Wikhikən 2: PQM2014
Highlight
Share
Copy
Want to have your highlights saved across all your devices? Sign up or sign in
Maliseet Gospel of John © Canadian Bible Society, 2014