Tànkùt 6
6
Bamnà nekwé bu mèn ke kwa
1Nshum àm, a be z'o kwé bu mfèl o num nu là,
a be z'o bùnte num ze dù' mènghua là,
2a be ze ntshob mi a tum ntshu o
kul o là,
mba ntshob mi a tum ntshu o là
nsi ghom o.
3Nshum àm, a mbe ndùlala o sô bu o bwe,
nummb'o vù ntùm mbu mfèl o;
nène, ngwù nsi mbwe i nde't'é.
4Kà bam ndù laglo tshùa miag o,
ke bam ndù nkub miag mu kabte.
5Tum bu i mba njuanyàm be ntum bu ngata' yoṅ nà,
mba saṅ be tum bu ngabùn nsaṅ nà.
Nu ndô bo ndétndét
6Ndô, nèn mbaṅ ndétndét!
Lôte mba bo tshwèt ngù là njene,
ntù' nzenu.
7Ndétndét ke' ghù mfen,
ke ngalôte, ke ngatswite lo.
8Mba tà ndùlala ndétndét be ntse'te ze jujù ngelaṅ ntùn,
nke nkùmte ju z'a jù là ngelaṅ
z'a ku'ni là.
9Ndô, o nsi ke nô be nenô
tà nkum à ndùke?
O nsi bam num miaglo à ngelaṅ ndùke?
10Ndô #Tànk. 24.33-34bùnte ndù: faṅ me na' nzi meju i, faṅ me na' me' miaglo,
Faṅ me na' mfa mbu nzi tonte miaglo.
11Là ndùs'a ke nzi là bwoṅ kab mbu num i
mba ta' nganya' dù' là,
kekua kab mbu num i mba mèn z'a ghù tshuntshùag là.
Keki ngafùte mèn
12Mèn z'a be nzin bo fùte ntshu i là b'a ju banban,
mbe ngafànnu.
13A be nyu' miag, nke ndo' ku i ntshob nu yi,
ndo' ntu mbu mi ntshob nu yi.
14A b'a nda' kebwô bèn mbe ntù i,
a ke' be fite nekwate nukebwô,
bo neywit ntanta nsi.
15A ndùlala ze ze nevù yà ghebte là.
Bo nsi be' i ndende, mèn be ke bèn netsiagt'é.
Ju z'a be mbag Nsi là
16Tshu num bwe ntôg tse Tshùaben be mbàn nà,
a b'a mba nze tse sammbàa, tshu tse nu tse be mbag i là.
17Miag ka'te, lém tatte,
mbu mi a be mfètte lem mbu' là.
18Ntù z'a be ntàmte mfi'
nukebwô là,
nku mi a be nànte neghù
nukebwô là.
19Nkwénta mfùm z'a be ntshob
tatte là,
bo mèn z'a be ntènte ntanta netèt
fètfèt là.
Bamnà num nu màndà
20Nshum àm, tshùb ntag
tàan,
ke ghua' ze netswite
màan.
21Taṅ yub ntù o, ntaṅ yub tô o.
22Bo nsi tshagt'o ndùs'o tshwèt
nzin nà,
mbéb o ndùs'o be num kunndà so là,
ke ntshob nu wù ndùs'o bam
num miaglo là.
23Nummbe ntag b'a ta' lambo,
netswite be ta' nelàne,
nebem mèn z'a be ntùm netswit nkùn nà
b'a manze yôg.
24Bo nsi kabt'o num nu kattù mènnzwi,
num lém ngùn mènnzwi z'a tshwèt ntshob ntshob
ngwa là.
25Kà te lag ghe'te num i, num bwô i,
kà bam ndù nkub miag mi lo'
ntù o.
26Nummbe b'o lo' metu' bàn
ngom kattù mènnzwi yi,
là, mènnzwi nandà z'a be ngù màndà là be
mbagte ta' yôg s'a tanjoṅ nà.
27Be mèn lem mbwôg bam nzwe
t'a tag ke kù ké?
28Be mèn zin num nge'mbwôge
tà nku mi tag ke kù ké?
29A b'a be ndaṅndaṅ num mèn z'a nèn mbaṅ
nzwi mfèl i là;
mèn z'a kwag i là ke nsi tum bwe
banban.
30Bo ke nsi faṅ mèn z'a yi à num nelo'
ntomte wul i yi là,
a be ze mba nziku' bèn nja i là.
31A be ze bo ghom i là, mb'a nsi ba' yen ju là
yoṅ tse sammbàa.
mb'a nsi fà tshu fa ts'a ndà i là.
32Mèn z'a ghù màndà bo ta' mènnzwi là
ke' ghù tu i;
mèn z'a kô nebi là ke ngù a ndùlala.
33A nsi ghù à nda' keko' bo tuswe.
Bo ke nsi bwete tse ze tuswe.
34Nummbe ghe'te be ngù mènntùn tshùag,
ke ghù kondèn lé'njù
yagte mba'a.
35Bo fà be ke lo netshu' mèn yi mb'a ke lôte,
ke bèn mbam nda', mba ndùse o bù a
yàm neshu là.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.