Tànkùt 5
5
Ntag num nekù mènnzwi kebwô
1Nshum àm, kù' ntoṅ num
zenu àm,
kù' ntoṅ num yàm nezi'te.
2Ndùlala ndù o lem nkwate,
mba ndù nkub ntshu mu lem nelène.
3Nummbe nkub ntshu ngùn mènnzwi
be nyi ṅwa'a,
lém se botte ntshùa njùanjùa
mfèt.
4Là, a be mbe miagte, ngùn mènnzwi là zwe
ntshùa zwetshù'tshù'ù,
ntshùag ntshùa ṅwi ze bo kuà
njam bàa là.
5Nku mi be nswe' nkum num vùkob,
nku mi be nzin tà nkum
ngô fe ben.
6A be mb'a tshakendà num manze tse,
ke ke ndèn dù' z'a tshwèt nèn nà, ndùlala ke
ke njen tse manze yôg.
7Nshumnshum tshàm, bin kù' ntoṅ nju' àm ndonni.
Kà bin sô ku zin num ntshob mi a tum ntshu àm nà.
8Kag manze z'a tshwèt nèn nkum num i là nsi,
kà ghebte mbaṅ nzendà i.
9Mbwôg ndù k'a swèn yu ngù'
tsemo' ben,
nswèn tsho ngu'njù ngatshùag;
10mbwôg ndù kà ba ghùn jù ju o njwèle,
z'a be ntàm so fa'
ntùm ndà mènghua là.
11Mbwôg ndù k'o tsham zwe ndùse
yen ngelaṅ,
ndùse mbàb wul o kôg fa là!
12Nummb'o nsi tshob yen ngelaṅ, nà ndù:
A na' ntshùa ndùke me bam netswit nkùn,
ntshùa ndùke ntù àm gha kà
bo tshobt'àm à?
13A na' ntshùa ndùke me ke ghù neju' ntshu ghatswite àm,
ke kù' ntoṅ mbwe ben tse bo
ke nzi't'àm n'à?
14A lo tù' à metsili mba njoṅ
nge' fa lo tsho àm,
netèt ngô bo mbumte.
Nu mènnzwi nguanmèn
15Nu ntse mi a tum num so lagntse là,
ntse mi a tum ntùm
so tôntse là.
16Ndù tsho tumnsi ntse nsi ke sa nèn
à ntshundà ké?
Tsho bon netsha'ntse nsi ke swe' à num ba nsém ké?
17A bwô a b'a mu tù' wù,
ke b'a ndù mu bin à ba ghùn.
18A bwô ndù mbotni be so tôntse,
tsiaṅte bin mènnzwi ze bin yi lo ngon nà.
19Kwinyàm s'a be ngag neshu là, njuanyàm z'a dun mebwô là,
a bwô ndù a lo' ntù o, kà ze nelo' ntù' bum o,
a bwô ndù o ke ndab wut ke tsin num nkôni mi.
20Nshum àm, a nsi tshùa ndùke k'o nke ndab wut
num ta' ngùn mènnzwi
a nsi tshùa ndùke k'o ke nkab num ndàntù
mènnzwi z'o ke' lèn i l'à?
21Nummbe tse manze mènntùn fa
b'a num miag Tshùaben.
A be ndôte njoṅ tshagnze tse fa.
22Ngatshùagntù tsho ntùm ko' mi
mfànnu,
nkù nukebwô tse ghom i.
23A nsi kwù nummb'a ke' zi'te là,
a nsi tiag njam ze bà z'a ta neshu là.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.