Isaya 45
45
Muwaha Mulungu yakumuhagula Kulo
1Muwaha Mulungu yamuhagula Kulo yawe mutemi!
Kamuwika ho yagasume makungugo
yawawusize watemi vilungo vyawo.
Nayo Muwaha Mulungu komudigulila Kulo
milango ye makaya gose.
Ninga Muwaha Mulungu yakumulonjela Kulo yakutya,
2“Ane yo nene du mono nokuwikaniziza nzila yako,
nogatenjelemula matunda hamonga ne vigongo,
noyibenanga ne milango ye vyuma
hamonga ne madindilo gayo gose.
3Nane nokupela viwutwa vyono vili hatitu
hanhu ha cinyele.
Nagwe baho ho komanyila
vyono ane yo nene Muwaha Mulungu.
Kanyhi na vyono Mulungu we Waisilayeli
yo yakucemile mwi'tagwa lyako.
4Ane nghakuhagula agwe,
ho wumutaze mwitumami wangu Isilayeli,
wanhu wangu wono nawahagula.
Nane nakondya kukupela lilumbo yiwaha
hamba wuwe agwe si wumanyile 'ne.
5“Ane yo nene du Muwaha Mulungu
hasina hamba mulungu yunji kanyhi, langa yo nene du.
Nane nokusikamya, hamba wuwe agwe si wumanyile'ne ng'o.
6Nane nghuzinoza zizi ho wanhu wose ku wulawilila
ku mhelo ye yinze sunga ku lubavu luyagwe
ho wamanye vyono ane yo nene du Muwaha Mulungu,
na vyono hasina hamba mulungu yunji kanyhi
langa yo nene du.
7Yo nene mono nawuwumba wuzelu no wutitu
yo nene mono ndetaga wumoteswe no wongomele.
Yo nene du Muwaha Mulungu, mono nizitumaga zizi zose.
8Nane nololeta wusume ku wulawa ku wulanga nha mvula,
nayo yisi yolokwiwikaniza ho yiwubocele
na mu mapango gago wolowa mulamu
hamonga no wiling'ano.
Ane no Muwaha Mulungu mono nolozinoza zizi zijele.”
I vilungo viwaha vyo Mulungu
9“Wulenyi! Hambi nyungu yono yihwanile zinyungu zose,
hongo yosuma kwisumaniza na mono yayiwumba?
Hambi lilongo nalyo,
lyosuma kumuwuza mono yakuliwumba liwe kutya,
alu wukunoza cici?
Hamba nyungu ma,
yosuma kumutya mono yayiwumbile yiwe kutya, aa,
agwe si wumanyile kuwumba?
10Hamba ho yuli munhu wo wose,
mono kosuma kwijelela yawatye walezi wakwe,
‘Alu nhawule mukandela nili nhavivi?’
11Ninga Muwaha Mulungu, u Mulungu mono yelile
wa Isilayeli, mono kawikanizaga zose, yakutya, nhavi,
‘Agwe wusina soko yo yose yo kumbuza-mbuziza ze wanangu,
hamba kunonjeleza zono zinojeye nitume!’
12Hambi nha yo nene mono nayiwumba yinze,
hamonga ne wanhu wose wono wekaye mumo.
Na mu vilungo vyangu, nghawutandaza wulanga.
Kanyhi yo nene mono nghulilajiliza lizuwa, no mwezi,
hamonga ne zinyelezi.
13Ane yo nene mono namusagahiza Kulo
ho yawufisilize wuhile wangu
yaziwice zose mu mugoloka.
Nane nozigolosa zinzila zakwe zose mono kowa kukola.
Mwene yo kololizenga kanyhi likaya lyangu lya Yelusalemi.
Nayo kowawika welecele i wawingwa wangu wose,
nayo hamba si kolopegwa malipo yaye,
hamba cihumbilizwa co cose ho yetume zizo.”
Vyo yakutya u Muwaha Mulungu.
14Muwaha Mulungu yakuwalonjela we nghungugo ya Isilayeli yakutya,
“Ne sawo ya mu yisi ya Misili,
na ya mu yisi ya Kushi, yose yowa yenyu nyenye.
Nawo i wanhu watali muno wa ku Seba,
awo wowa wetumami wenyu,
womutyatyenyi akuno wawope ne manyolo.
Wofugama ha mwande yenyu wawe kutya,
‘Mbeka Mulungu yali hamonga nanye,
kanyhi mweneco yo Mulungu du yali wene.
15Mulungu we Waisilayeli mono yakuwaponya
wanhu wakwe mbeka yo Mulungu mono yehundice yali wene.
16Ne wanhu wono wasesaga vihwani
wose wolokozwa soni,
na wose hamonga wolopuvywa.
17Ninga Isilayeli koponywa no Muwaha Mulungu
ne mhonelo yakwe yowa ya cibitilila,
ne wanhu wakwe, hamba si wolokozwa soni yaye.’ ”
18No Muwaha Mulungu yo Mulungu du yali wene
mono yawuwumba wulanga!
Kanyhi yo yayisimya no kuyiwumba yinze
yakayinoza yisikame no kwikala cibitilila.
Hamba si yayiwumba ho yiwe yitongo du lya caka,
langa yayiwumba yiwe wikalo we wanhu.
Kanyhi yo mweneco mono yakutya,
“Ane yo nene Muwaha Mulungu du
hamba hasina kanyhi mulungu yunji, langa nene du.
19Nane hamba si nonjile zizi cinyele, hamba
kuwuhundika yaye wuhile wangu.
Hamba lunji kuwalomba wanhu wa Isilayeli
ho wandime mu yisi nyhiwa yono ndekwe.
Ane yo nene no Muwaha Mulungu, nane nghulonga ze mbeka,
no kuzinoza zo mugoloka zimanyice.”
U Muwaha Mulungu we yinze ne vihwani vya Babiloni
20Muwaha Mulungu yakutya nhavi,
“Ale! Mwikongholelaje hamonga,
anye nyo wanhu we makungugo gose,
wose mono muponile mu wugwe wo wutemi wa Babiloni,
muze wose ku wuling'anizwe!
Anye nyo wanhu mono mudinghulaga
vihwani vyenyu vye mabici viseswe,
muwa kulomba kuli milungu yono si yomuponyenyi yaye.
Anye nyo wanhu walele!
21Ale nzonyi muzilonje zenyu ha mahakama,
muwalece wono wasitakwe walongane weneco wose.
Alu mwene mukwihwesa nani mono yawila
mu vilo vye katali vyono zizi zolokwijela?
Yo nene du Muwaha Mulungu, u Mulungu
mono kawaponyaga wanhu wakwe.
Na hasina mulungu yunji, langa nene du.
22“Muze kuli'ne, ho mupone
anye nyo wanhu we yinze yose!
Ane no Mulungu nili wene, nili baha.
23No wihuwizo wangu wa mbeka, hamba si wopituka yaye.
Kanyhi nelahiza, nghehuwiza ko mulomo wangu
nha vyono wanhu wose wolokuza wafugamile nene,
wehuwize nha vyono wowa wali cihuliko kuli'ne.
24“Nawo wololonga wawe kutya vyono
wusume ne vilungo, vyose vili muli'ne,
ninga wono wasulile'ne, wose wolokozwa soni.
25Nene no Muwaha Mulungu nolowaponya we ndelo yose
ya Yakobo, nawo wolonghumya no kunumbiza nene du.
Cigogo Bible © Bible Society of Tanzania, 2002.