Isaya 44
44
Muwaha Mulungu yo Mulungu yali wene du
1Muwaha Mulungu yakutya,
“Wuhulicize 'gwe go nghungugo ya Isilayeli
go mwitumami wangu,
anye nyo wanhu wangu wahagulwa
nyo wana wa Yakobo.
2Ane yo nene no Muwaha Mulungu mono
namuwumbenyi wulawa wulelwe wenyu.
Holeka mulece kogopa, anye nha muli
wetumami wangu.
Kanyhi muli wanhu wangu, wendece wangu.
3Nane noyipela malenga yisi yono yina nyhilu,
kanyhi notula makolongo gahulume mu yisi nghavu.
Nane nowajidila zo muhe wangu i wana wenyu.
Kanyhi nowalugutiza we zindelo zenyu.
4Nawo wocindika viswanu nhe mahanze mamwajile
viswanu malenga, wowa nho mubici wono wucindice
ha mivwilo ye malenga.”
5“Nawo wanhu wolonga yumonga yumonga wawe kutya,
‘Ane nili wo Muwaha Mulungu.’
Nawo wolokuza wehangulize hamonga
ne wanhu wa Isilayeli.
Nawo wose munhu na lwakwe
kolokwiyandika litagwa lyo Muwaha Mulungu
mu mhukumhuku yakwe,
no kwiyitya vyono yaweza yumonga
ne wanhu wo Mulungu.”
6Nayo Muwaha Mulungu mono yatemile, kanyhi
mono kawadimaga Waisilayeli
u Muwaha Mulungu we mihanga,
yakutya nhavi,
“Ane yo nene mulongozi, na wo mundumo,
ane mono nili Mulungu nili wene,
na hasina kanyhi mulungu yunji langa nene du.
7Wulenyi, hambi ho yuli yunji kanyhi
mono kusuma kuzituma zono ane netuma?
Hamba nani mbi mono yali yasume
kuwila zose nha vyono zolokwijela
ku wulawa katali ha mwamulizo, sunga
za ku vilo vya ku ndumo?
8Holeka anye wanhu wangu, mulece kogopa!
Hambi nha mumanyile nha vyono ku wulawilila
mu vilo vye katali sunga nalu,
ane nali nakondya kuwila, nha vyono zizi zolokwijela,
kanyhi yo nyenye wahomelezi wangu.
Wulenyi, hambi ho yuli mulungu yunji kanyhi?
Hamba ho yuli mulungu yunji mono nayo yali vilungo
mono ane nghali namuhulika?”
Wuhemba vihwani wukubedegalwa
9Nawo wanhu wono wakunoza vihwani viseswe, wose wapuwile, sunga ne vihwani vyawo vye milungu vyono wakuviguza ko wuguzi wukamu, navyo visina hamba cambuzi cidodo bwete. Nawo wanhu wawo wono wakuyihemba milungu ye vihwani viseswe, mbeka wabofu, kanyhi wasina wizuce hamba hadodo, kanyhi wokolwa cevu. 10Kanyhi hamba si yinojeye munhu yenozeze cihwani cenjedulwe, yacinoze ciwe yo mulungu yacihembe! 11Hambi nha munhu wo wose mono kocihemba, nha kokolwa soni. Nawo wanhu wono wakusesa vivyo vihwani, nha wanhu du, wono wasina cinji co cose. Holeka anye muwalekaje du, hambi nha wose wolokwima ha wuling'anizi, nawo wolokogofywa muno no kukolwa cevu.
12Nayo u mutyani, nha yakuwa kusola cuma cidodo du, kawa kucinyanya mu moto. Hanyuma yakucinoza cuma cico mu hwani yono yakuyisaka mweneco. Ninga na lono yakutyana, katugaga nzala, ne nyhilu ye malenga, hamonga no mukatalo. 13Nayo muselemala kapimaga lubawo ne cipimo cakwe. Kawa kuwicila citanjilo ne kalamu. Hanyuma kawa kuyisesa ne visesezo vyakwe, kawa kuyinoza yiwa yina hwani yo munhu ne futa yono yikwendeza, kawa kuciwika cihwani cico mu kaya yakwe. 14Hanji yadahile kuyitemanga mibici yo muhagata, ho yayitumamile, hamba lunji mibici ye minghola, hamba mubici wo wose, wa mu mbago. Hamba lunji kohadika mubici wo muhagata, kawa kulindila mvula yiwutonyele yiwuwiluse. 15Na hanyuma kawa kusola libici linji lyo mubici wuwo, so ngwagu, na linji kawa kusesa cihwani, Ne mabici ganji go mubici wuwo kawa kugetumamila nha ngwagu zono kokota ho zimupele civuce, no kutelecela ndigwa zakwe. Ne libici linji lyo mubici wuwo du, kawa kusesa mulungu, kawa kumuhemba. 16Kanyhi ngwagu zinji, yakupembela moto, kawa kuwitumamila so kukasika nyama, no kuyilya, nayo kawa kwiguta. Hanyuma kawa kwiyoteza ha moto akuno yakutya, “Kaa! Nye civuce ciswanu si! Nye moto wanoga si!” 17Ne mabici ganji gono gasigaye go mubici wuwo du, kawa kusesa cihwani, na hanyuma yayo ati, kawa kucinamila no kucihemba. Kawa kucilomba yakutya, “Agwe yo gwegwe mulungu wangu, nghukulomba wumhonye!”
18Na mbeka wanhu we liwala lilyo, wapuwile, hamba si wakuzimanya bwete na zono wakwituma yaye. Hambi meso gawo hamonga ne mahala gawo, nha wafufunize, ho walece kuyimanya i mbeka. 19Nayo yuyo mono kasesaga vivyo vihwani, yasina hamba lihweso lyo kutya, “Alu mwene mabici ganji ge libici lili, nha nigapembela. No moto wayo nhelecela ndigwa yangu, kanyhi nghasicila ne nyama yangu, niwa kuyilya. Hanyuma libici lyono lisigaye niwa kusesa cihwani. Naluno nicifugamiye cihwani ciseswe co mubici wu wulya!” 20Ne nghani yiyi, yo nghani yo wulele, yihwanile wubwiga mavu. Hambi i mahweso gakwe go wupufi, nha gakondya kumwajiliza nzila, ho yalece kuyiwona nzila yono yina wutazi. Hamba si yakusuma kumanya, nha vyono cico cihwani cono yebate mu muwoko wakwe, si mulungu yaye.
Muwaha Mulungu yo Muwumbi, kanyhi yo Muponyi
21Muwaha Mulungu yakutya, nhavi,
“Anye nyo nghungugo ya Isilayeli,
mukumbucile ta nghani ayi,
nha vyono anye muli wetumami wangu.
Ane yo nene mono namuwumbenyi muwe wetumami wangu.
Holeka nane hamba si nomusemwenyi yaye.
22Nakondya kuwupatila lukulu wubi wenyu nhe livunde.
Holeka mumbuyilaje.
Hambi nha yo nene du mono nghumuponyenyi.”
23Mwimbe ne nyemo 'nye nyo wulanga!
Nanye nyo kusi ye 'si, mwimbe mwihindile muno!
Nanye nyo matunda hamonga ne mabici gose ga mu mbago,
mwimbe ne nyemo kwe mazi mawaha.
Hambi Muwaha Mulungu nha kawulajila wuwaha wakwe,
mu nzila yo kuwaponya wanhu wa Isilayeli.
24“Ane yo nene Muwaha Mulungu wenyu, u muponyi wenyu.
Ane yo nene mono namuwumbenyi.
Ane yo nene Muwaha Mulungu,
u muwumbi we vinhu vyose
yo nene mono nawutandaza wulanga na lono nayiwumbile yinze,
hasina hamba monga mono yanhaziliza.
25Yo nene mono nivimilaga vitanjilo vye watowa visangu,
no kuwapela lukwale i waganga,
yo nene mono niwalambizaga we mahala,
no kulajila vyono mahala gawo yo nghani ya wulele du.
26Ninga kolo mwitumami wangu yakuwila,
nane kolo nghumutuma mwitumami wangu
ho yakalajile ze mahweso gangu,
nane niganozaga mahweso gago
hamonga no wuwile wuwo viwa vya mbeka.
Nane nghuyilonjela Yelusalemi,
nha vyono wanhu wowuya wekale mumo kanyhi,
na vyono ne makaya ga Yuda gozengwa kanyhi.
Ne makaya gago, i matongo gayo gokwinulwa.
27Ane nongaga nghani du, niwa kulinyaza lilenga.
28Nghumulonjela Kulo, nghutya,
‘Agwe yo gwegwe mono kowufisiliza wuhile wangu,
nagwe konoza zono nghukulajiliza
kololajiliza Yelusalemi yizengwe kanyhi
hamonga no musinji we Nyumba yo Mulungu.’ ”
Cigogo Bible © Bible Society of Tanzania, 2002.