YOSHWA 24
24
Yoshwa Yalomoloma khu Vandu Lukhumalilikha
1Yoshwa yalaanga halala vandu vi tsimbia tsiosi tsia Israeli mu litaala lia Shekemu. Yalaanga vasakhulu, vimilili, vakhalachi, halala na vimilili vandi va Vaisraeli, nivitsa imbeli wa Nyasaye. 2Yoshwa yavoolela vandu voosi, “Mwami Nyasaye, uli Nyasaye wa Israeli, avoolanga ndi mumatukhu kakhale, vakuuka venyu vamenyanga khuluveka lundi lu Muchela kwa Efurate, nivarumishila vanyasaye vandi. Mulala khu vakuuka venyu venavo yali Tera, nali tata wa Aburahamu nende Nahori. 3Navutswa ninzi warulitsa kuuka wenyu Aburahamu, mu shivala shili injelekha wu Muchela kwa Efurate, nimwimilila shia havundu hosi mu shivala shia Kanaani. Ninzi wachila niyivula vitsukhulu vanyishi. Ninzi wachila niyivula Isaka, 4nikhola Isaka khwivula vaana vi shiyayi vavili Yakobo nende Esau. Ninzi waha Esau, shivala shi vikulu shia Edomu khuva shieshie mwene, navutswa kuuka wenyu Yakobo nende vaana veve, vakholomokha nivatsia khumenya mu shivala shia Misri. 5Ninzi waruma khandi Musa nende Haruni, ninderela Vamisri matiinyu khulondokhana khu ka nali nikholi muvo; khali nimurulitsa mu shivala shienesho. 6Ninzi warulitsa vakuuka venyu mu shivala shia Misri, numutukha khu Inyanza Imuuchi. Vamisri vamuhitsanyinya na makaare kiliihe nende vasikali vi tsifarasi khutukha khu Inyanza Imuuchi. 7Navutswa vakuuka venyu vililila khu Mwami Nyasaye avakhonye, ma Mwami Nyasaye nalera shisuundi hakari henyu nende Vamisri. Yalera matsi ki inyanza khuvo, nikavakhunikha; munyi vene numulola makhuva ka nali nikholi mu shivala shia Misri.
“Mwamenya mu shiangalangwi mihika minyishi. 8Khulwa yako, namulera mu shivala shia vandu vuluhia lwa Vaamori, vamenyamu khuluveka luli ivukwi wu Muchela kwa Yorodani. Vamukwana, navutswa ninzi wamuha tsingulu tsiu khuvakuura. Mwavukula shivala shiavo, niviira lwa mwisuundanga khuvo. 9Lwa Balaka mwana wa Zipori, Mwami wa Moabu, yirechekha khukwana Vaisraeli, yarumana likhuva khu Balamu mwana wa Behori, khwitsa khumulaama. 10Navutswa shinali ni lienya liu khuhulishitsa Balamu tawe. Yamukasitsa, nimuhonyinya khurula khu Balaka. 11Mwambukha Muchela kwa Yorodani, numutukha mu litaala lia Yeriko. Vandu vi litaala lienelo, halala na vandu vi tsimbia tsia Vaamori, Vapeerizi, Vakanaani, Vaahitse, Vagirigashi, Vaahivi, nende Vayeebusi vamukwana, navutswa ninzi wamuha tsingulu tsiu khuvakuura. 12Lwa mwali numwisuundanga, navatechelitsa nikhunga vami vavili va Vaamori. Mwambakhana khurumishila vivavi nende vura vwenyu khuvakhunga. 13Ninzi wamuha shivala shia mwali numushili khulimakhu, khandi mataala ka mwali numushili khumbakhakhu. Mumenyayo nunundi, numulia matunda ki misabibu nende misayituni, khurula khu misala chia mwali numushili khuraakakhu.”
14Yoshwa yatsililila khuvoola, “Khulwa yako, muhe Mwami Nyasaye luyali, mumurumishile mu vwatoto khandi mu vusuuvilwa. Mulekhane na vanyasaye va vakuuka venyu varumishilanga, nivali mu shivala shia Mesopotamia khandi mu shivala shia Misri, murumishile Mwami Nyasaye. 15Niiva muvula lienya liu khumurumishila, murovole nunundi woyo wa mwenyanga khurumishila, kave vanyasaye va vakuuka venyu varumishilanga, nivali mu shivala shia Mesopotamia inoho vanyasaye va Vaamori, vamumenyanga mu shivala shiavo nunundi. Navutswa khulwanje mwene, inzi nende vandu vi inzu yanje, khutsitsanga khurumishila Mwami Nyasaye.”
16Nalwo lwa vandu vavoolela Yoshwa, “Shiukhunyala khwambakhana Mwami Nyasaye, khurumishila vanyasaye vandi tawe! 17Mwami Nyasaye, uli Nyasaye weru, neye warulitsa vakuuka veru nende khutsi mu vurukwa mu shivala shia Misri, khandi khwalola viloleshitsu via yakhola. Neye wakhulinda vulahi mu milembe, shia havundu hosi ha khwatsitsanga mu vandu vi tsimbia tsiosi tsia khwavirilamu. 18Mwami Nyasaye yakhukhunjila Vaamori voosi vamenyanga mu shivala shinu. Khali khutsi khutsitsanga khandi khurumishila Mwami Nyasaye; shichila neye Nyasaye weru.”
19Navutswa Yoshwa yavoolela vandu, “Muvula vunyali vu khurumishila Mwami Nyasaye; shichila ni Nyasaye Mutakatifu. Ni Nyasaye wimbotokha, khandi avulakhu vunyali vu khumusemeha vutamanu vwenyu inoho vwoni vwenyu. 20Niiva mulalekhana nu Mwami Nyasaye, khurumishila vanyasaye vandi, nalwo lwa aliitsa khumukalukhana nu khumusalilitsa. Aliitsa khumutivitsa, khali niiva matukhu kandi yali wamukholelakhu malahi.”
21Navutswa vandu vavoolela Yoshwa, “Shikali kario tawe! Khutsitsanga khurumishila Mwami Nyasaye.”
22Yoshwa yavavoolela, “Munyi vene muhaananga vushiahidi vwenyu, khulondokhana khu munyi vene ndi murovole khurumishila Mwami Nyasaye.”
Vavoola, “Ni kilikali, khutsi vene khuli vashiahidi.”
23Yoshwa yavoola, “Mulekhane na vanyasaye vacheni vamuli navo mu munyi, mure mioyo chienyu mu Mwami Nyasaye, uli Nyasaye wa Israeli.”
24Nalwo lwa vandu vavoolela Yoshwa, “Khutsitsanga khurumishila Mwami Nyasaye, uli Nyasaye weru, khandi khuhulishitsi malako keke.”
25Yoshwa yakhola lilakano na vandu khulitukhu lienelo, khandi navaha mivaalo ku khulonda nende mechitso mu litaala lia Shekemu. 26Yoshwa yahandika malako kenako koosi mu shitabu shia Malako ka Nyasaye. Yavukula lichina likali, nalisinjilitsa hasi wu musala ku museno, himbi Havundu Hatakatifu wu Mwami Nyasaye. 27Yoshwa yavoolela vandu voosi, “Lolikhu! Lichina yili, liliitsa khuhaana vushiahidi khulondokhana khu khutsi. Limali khuhulila makhuva koosi, ku Mwami Nyasaye akhuvoolele. Khulwa yako, litsitsanga khuhaana vushiahidi khulondokhana khu munyi, khumwikalila khuhinganyinya Nyasaye wenyu.” 28Yoshwa yaseevula vandu nivarulaho, shia mundu wosi nakalukha mu lusomo lwelwe, lwa yarulamu mu shivala shienesho.
Yoshwa nende Eliazari Vakhutsa
29Lwa makhuva kenako kikholekha, Yoshwa mwana wa Nuni, wali nali murumishi wu Mwami Nyasaye yakhutsa, nali ni mihika imia indala ni likhomi. 30Vayeveela mmbili kwekwe mu shilindwa mu mulimi kwekwe mwene, kwali havundu halaangwangwa Timunatsi Sera mu shivala shi vikulu shia Efurahimu khuluveka luli ivuluka wi Shikulu shia Gahashi.
31Matukhu koosi ka Yoshwa yali nashili mwoyo, Vaisraeli varumishilanga Mwami Nyasaye. Namali khukhutsa, vatsililila khukhola kenako, lwa vimilili vavo vali nivashili mwoyo, vali nivalolakhu vene shia shindu shiosi, shiu Mwami Nyasaye yali niyakholela Vaisraeli.
32Mmbili kwa Yosefu, kwa Vaisraeli vali nivarulitsa mu shivala shia Misri, kwayeveelwa mu litaala lia Shekemu, mu mulimi kwa Yakobo yali niyakuula khu vaana va Hamori, wali nali tata wa Shekemu, khu ifetsa vitonye imia indala. Vitsukhulu va Yosefu, navo vavukula mulimi kwenoko nivamenyamu.
33Eliazari mwana wa Haruni yakhutsa, mmbili kwekwe nu kuyeveelwa mu shilindwa mu litaala lia Gibeha, lili mu shivala shi vikulu shia Efurahimu, litaala liali niliaheelwa mwana wewe Finiasi.
© The Bible Society of Kenya, 2013