YOSHWA 23
23
Yoshwa yavoolela Vaisraeli Makhuva Kukhumalilikha
1Mihika minyishi nichimali khuvira, Mwami Nyasaye yaha Vaisraeli lihulukha khurula khu vatsiku vamenyanga himbi khuvo. Mumihika chienecho, Yoshwa yali musakhulu wi mihika minyishi. 2Yoshwa yalaanga halala Vaisraeli voosi, vimilili vavo vasakhulu, vimilili va vandu, vakhalachi, halala na vimilili vandi va vandu, navavoolela, “Mali khusakhula, khandi ndi ni mihika minyishi. 3Mumali khulola shia shindu shiosi, shiu Mwami Nyasaye, uli Nyasaye wenyu yakhola khu vandu vi tsimbia tsindi tsiosi shichila munyi. Mwami Nyasaye, uli Nyasaye wenyu, neye wakwanilanga munyi. 4Mali khukavulila vandu vi tsimbia tsienyu lusomo lwarikala lwa vandu vi tsimbia tsindi khuva lwenyu, khandi tsimbeka tsia vandu vi tsimbia tsindi tsiosi tsia mali khukuura, khuraanjila khu Muchela kwa Yorodani khuluveka luli ivukwi khutukha khu Inyanza ya Meditarenia khuluveka luli imbo. 5Mwami Nyasaye, uli Nyasaye wenyu, aliitsa khuvakhola vamwilushi nu khukhalukha inyuma, nu khuvakhunga imbeli wenyu lwa muliitsa khuva numwisuundanga. Muliitsa khuvukula shivala shiavo, khuli Mwami Nyasaye, uli Nyasaye wenyu yamulaaka. 6Khulwa yako, mulonde malako, mukhole shia shindu shiosi shiahandikwa mu Shitabu shia Malako ka Musa. Muvuli khulechelitsakhu khali lilala khu malako kenako; 7mulivula khusanga na vandu vi tsimbia tsindi vashimenyanga mu munyi venavo. Muvuli khulomolomakhu shindu shiosi, khulondokhana khu mira ka vanyasaye vavo inoho khurumishila mira kenako, lwa mwisuuhanga inoho khuvarumishila inoho khuvasikamila. 8Navutswa mutsililile khuva vasuuvilwa khu Mwami Nyasaye, uli Nyasaye wenyu, khuli mukholanga nunundi. 9Mwami Nyasaye wamukhunjila imbeli wenyu vandu vi tsimbia tsi tsingulu khandi vu vunyali muno. Khali mundu avulakhuho, wali ni tsingulu tsiu khukuura munyi. 10Mulala khu munyi anyala khuchila vasatsa iheelefu indala vilushi, shichila Mwami Nyasaye, uli Nyasaye wenyu, neye wamukwanilanga khuli yali niyamulaaka. 11Khulwa yako, muve vacheli, muyaanze Mwami Nyasaye, uli Nyasaye wenyu. 12Niiva mulambakhana khuhulishitsa ka yenyanga khandi musanje na vandu vi tsimbia tsindi vamenyanga mu munyi numuhilana navo, 13nu vulahi khumanya ndi Mwami Nyasaye, uli Nyasaye wenyu, aliitsa khwambakhana khumukhunjila vandu vi tsimbia tsienetso, lwa muliitsa khuva numwisuundanga. Navutswa valiitsa khuva vandu vatamanu muno khu munyi, khuli mureeko inoho vwina khandi valulu muno khuli shivoko shiu mundu amushiutanga khu maveeka inoho mavwa karootsanga mu tsimoni tsienyu. Yaka kalatsililila khwikholekha khutukha, lwa khali mulala khu munyi aliitsa khuvula khurikalakhu mu shivala shilahi, shiu Mwami Nyasaye, uli Nyasaye wenyu yamuha yishi.
14“Khulwa yako, nakhava himbi khukhutsa nunundi. Shia mundu wosi khu munyi wamanya mu mwoyo kwekwe, khandi mu liiva lielie liosi ndi Mwami Nyasaye wamuha vindu viosi vilahi, via yali niyamulaaka alamuha. Shia lilaaka liosi lia yamulaaka warweshitsa; lilako livulakhuho lia yavula khurweshitsa. 15Navutswa khuli yarweshitsa lilaaka liosi, lia yali niyamulaaka, nindio khandi aliitsa khumukholela vindu vitamanu viosi. 16Niiva mulameneka lilakano liu Mwami Nyasaye, uli Nyasaye wenyu, numusaala khandi numurumishila vanyasaye vandi, nalwo lwa Mwami Nyasaye aliitsa khumutivitsa, khuvirila mu vurima vwevwe; vwangu yuvu mundu avulakhuho, khali mulala khu munyi uliitsa khurikala mu shivala shilahi yishi, shia yamuha munyi.”
© The Bible Society of Kenya, 2013