YOSHWA 20
20
Mataala Kukhwilushilamu
(Liv 35:9-34)
1Mwami Nyasaye yavoolela Yoshwa, 2avoolele Vaisraeli, “Rovoli mataala ku khwilushilamu ka navoolela Musa amuvoolele makhuva khulondokhana khuko. 3Mundu niyitsukhani niyiiri wundi, vuchila khwenya khumwiira anyala khutsiayo, ave wihonoloshe khurula khu mundu uvanzanga shisahi. 4Aliitsa khwilushila mu litaala lilala khu mataala kenako, khandi asinjile mu vwinjililu vwi litaala lienelo, avoolele vimilili vi litaala lienelo makhuva keke; ma vimilili vamwinjilitsi mu litaala liavo, khandi vamuhe havundu hanyala khutsililila khumenya navo. 5Niiva mundu uvanzanga shisahi, alamulondayo, vandu vi litaala lienelo vakhamulekha mu makhono ku mundu uvanzanga tawe. Valiitsa khumulinda, shichila yitsukhana niyiiri wundi, vuchila khwenya khandi shiuvuli vurima vwachila namwiira tawe. 6Aliitsa khutsililila khumenya mu litaala lienelo, khutukha lwa yaalwa mushiina imbeli wa vandu voosi, khandi khutukha lwa mundu urumikhanga khuli Mukali wa vasalisi voosi akhutsa. Mundu mwenoyo anyala khukalukha ingo wavo mu litaala liavo mwene, lia yali niyilukhamu.”
7Vahula haluveka litaala lia Kedeshi mu lusomo lwa Galilaya, mu shivala shi vikulu shia Nafutali; litaala lia Shekemu, mu shivala shi vikulu shia Efurahimu; nende litaala lia Heburoni mu shivala shi vikulu shia Yuda. 8Khuluveka luli ivukwi wu Muchela kwa Yorodani, nali havundu hichingukha mu lwomera mu shiangalangwi, khuluveka luli ivukwi wi litaala lia Yorodani, varovola litaala lia Bezeri lili mu lusomo lwa Rubeni. Varovola litaala lia Ramotsi, mu lusomo lwa Gadi lili mu shivala shia Bashani, mu lusomo lwa Manaase. 9Yaka nako kali mataala ku khwilushilamu karovolwa ka Vaisraeli voosi nende vandu vacheni vamenyanga muvo. Mundu witsukhana niyiiri wundi, vuchila khwenya yanyolanga vulindi iweneyo, khurula khu mundu uvanzanga shisahi; shivali viirakhu mundu wosi, nivashili khumuyaala mushiina imbeli wa vandu voosi tawe.
© The Bible Society of Kenya, 2013