YOSHWA 19
19
Lusomo lwa Vandu Vuluhia lwa Simioni Vaheelwa
1Lwivulu lwa vandu vuluhia lwa Simioni, nalwo lwali lwa khavili khukavulilwa shivala. Lusomo lwavo lwali lwa votokhana lusomo lwa vandu vuluhia lwa Yuda. 2Lusomo lwavo lwalimu na mataala ka Beresheba, Sheba, Molada, 3Hazari Shahuli, Bala, Ezemu, 4Elitoladi, Betsuli, Horuma, 5Zikulagi, Betsi-marakabotsi, Hazari Susa, 6Betsi-lebahotsi, nende Sharuheni; mataala likhomi na kavaka, nende michitsi chili himbi khuko.
7Khwali na mataala kandi khuli Ahini, Rimoni, Etseri nende Ashani; mataala kane, nende michitsi chili himbi khuko, 8nende michitsi chiosi chili himbi khu mataala kenako, khali khutukha mu litaala lia Raama, khuluveka luli ikuvanda. Yishi nashio shivala shia vandu vuluhia lwa Simioni, vanyola khuva shiavo vene. 9Shivala shia vandu vuluhia lwa Simioni, shiarulitswa khu lusomo lwa vandu vuluhia lwa Yuda lwali lukali muno khuvo. Vandu vuluhia lwa Simioni, vanyola lusomo lwavo khurula mu lusomo lwa vandu vuluhia lwa Yuda.
Lusomo lwa Vandu Vuluhia lwa Zabuloni Vaheelwa
10Vandu vuluhia lwa Zabuloni nalwo lwali lwa khavaka khukavulilwa shivala; mupaka ku lusomo lwa vanyola kwakholomokha khutukha mu litaala lia Saridi. 11Mupaka kwenoko, kwarulaho nu kutsia khutukha khuluveka luli imbo wi litaala lia Marala, nu kutuuya mu litaala lia Dabeshetsi, khandi nu kutsia khutukha khu muchela kuli himbi khuluveka luli ivukwi wi litaala lia Yokunehamu. 12Mupaka kwenoko kwashiama nu kutsia khuluveka luli ivukwi khurula mu litaala lia Saridi khutukha khuluveka wi liuva lirulilanga, nu kutsia khutukha khuluveka lwa havundu halaangwangwa Kisilotsi Tabori; kwatsililila khutsia khutukha mu litaala lia Daberatsi khandi nu kutikulukha khutukha mu litaala lia Yafihiha. 13Mupaka kwenoko kwatsililila nu kutsia khuluveka luli ivukwi, nu kutukha mu mataala ka Gatsi-heferi nende Etsi-kazini; kwarulila mu litaala lia Rimoni khandi nu kushiama khutsia khutukha mu litaala lia Neha. 14Mupaka kwenoko kwashiamilaho khurula khuluveka luli ivuluka, nu kutsia khutukha mu litaala lia Hanatsoni, nu kumalilishila mu Luhoongo lwa Ifutaheli. 15Mataala kalimu kali Katatsi, Nahalali, Shimuroni, Idala, nende Betselehemu. Kali mataala likhomi na kavili, nende michitsi chili himbi khuko. 16Mataala kenako nende michitsi chiako, nako kali mu lusomo lwa vandu vi inzu ya vandu vuluhia lwa Zabuloni vanyola khuva shivala shiavo vene.
Lusomo lwa Vandu Vuluhia lwa Isakari Vaheelwa
17Vandu vuluhia lwa Isakari, nalwo lwali lwa khane khukavulilwa shivala; 18lusomo lwi shivala shiavo, lwali na mataala ka Yezireli, Kesolotsi, Shunemu, 19Hafarahimu, Shihoni, Anaharatsi, 20Rabitsi, Kishihoni, Ebezi, 21Remetsi, Eni-ganimu, Eni Hada, nende Betsi-pazezi. 22Mupaka kwenoko kwatuuya khandi khu mataala ka Tabori, Shahasuma, nende Betsi-shemeshi, nu kumalilishila mu Muchela kwa Yorodani. Kali mataala likhomi na sita, nende michitsi chili himbi khuko. 23Mataala kenako nende michitsi chili himbi khuko, nako kali mu lusomo lwi shivala shia vandu vuluhia lwa Isakari vanyola khuva shivala shiavo vene.
Lusomo lwa Vandu Vuluhia lwa Asheri Vaheelwa
24Vandu vuluhia lwa Asheri, nalwo lwali lukhola khane khukavulilwa shivala. 25Lusomo lwi shivala shiavo, lwali na mataala ka Helikatsi, Hali, Beteni, Akushafu, 26Alamu Melechi, Amadi, nende Mishali. Mupaka khuluveka luli imbo kwatuuya khu Shikulu shia Karameli khandi mu litaala lia Shihori Libunatsi. 27Kwashiama nu kutsia khuluveka luli ivukwi, khutukha mu litaala lia Betsi-dagoni, nu kutuya mu lusomo lwa vandu vuluhia lwa Zabuloni khandi mu Luhoongo lwa Ifutaheli khutukha khuluveka luli ivuluka wa mataala ka Betsi-emeki nende Nehiheli. Kwatsililila khutsia khutukha mu litaala lia Kabulu khuluveka luli ivuluka, 28Eburoni, Rehobu, Hamoni, nende Kana, khandi nu kutsililila khutsia khutukha Sidoni. 29Mupaka kwenoko kwatsililila kwashiamila mu litaala lia Raama, nu kutukha mu litaala li imbinga lia Tiro; khandi kwashiamila mu litaala lia Hosa, nu kumalilishila mu Inyanza ya Meditarenia. Kwalimu na mataala ka Maharaba Akuzibu, 30Uma, Afeki, nende Rehobu. Mataala makhomi kavili na kavili, nende michitsi chili himbi khuko. 31Mataala kenako nende michitsi chiako, kali mu lusomo lwi shivala shia vandu vuluhia lwa Asheri vanyola khuva shiavo vene.
Lusomo lwa Vandu Vuluhia lwa Nafutali Vanyola
32Vandu vuluhia lwa Nafutali, nalwo lwali lukhola sita khukavulilwa shivala. 33Mupaka kuluveka ku lusomo lwavo, kwraanjila mu litaala lia Helefu khutsia khutukha khu musala ku museno, kuli havundu halaangwangwa Zahananimu, khutukha mu mataala ka Adaminekebu nende Yaninia, khutsia khutukha mu litaala lia Lakumu, khandi nu kumalilishila khu Muchela kwa Yorodani. 34Mupaka kwenoko kwakomokha nu kutsia khuluveka luli imbo, khuvirila mu litaala lia Azunotsi Tabori, khandi nu kurulila havundu halaangwangwa Hukoku. Kwatuuya mu lusomo lwa vandu vuluhia lwa Zabuloni khuluveka luli ikuvanda, mu lusomo lwa Asheri khuluveka luli ivukwi, khandi khu Muchela kwa Yorodani khuluveka luli ivukwi. 35Mataala kali ni imbinga kali Zidimu, Zeri, Hamaatsi, Rakatsi, Kineretsi, 36Adama, Raama, Hazori, 37Kedeshi, Edurei, Eni Hazori, 38Ironi, Migudali Eli, Horemu, Betsi-anatsi nende Betsi-shemeshi. Kali mataala likhomi na tisa, nende michitsi chili himbi khuko. 39Mataala kenako nende michitsi chili himbi khuko, nako kali mu lusomo lwa vandu vuluhia lwa Nafutali vanyola khuva shivala shiavo vene.
Lusomo lwa Vandu Vuluhia lwa Dani Vaheelwa
40Luhia lwa Dani nalwo lwali lwa saba khukavulilwa shivala. 41Lusomo lwi shivala shiavo lwali na mataala ka Zora, Eshutaholi, Iru, Shemeshi, 42Shahalabinu, Ahiyaloni, Etsula, 43Eloni, Timuna, Ekuroni, 44Elutekeha, Gebetsoni, Bahalatsi, 45Yehudi, Bene Beraka, Gatsi Rimoni, 46Me Yarukoni nende Rakoni, khali lusomo luli Yopa. 47Lwa vandu vuluhia lwa Dani vakoritsa lusomo lwavo, vandu vuluhia lwa Dani lwenelo, vasimukha nivatsia mu litaala lia Lahishi nivalikwana. Valivukula ni tsingulu, niviira vandu vamenyanga mulio; khandi nivalivukula khukwa liavo vene. Vamenyamu khandi nivakalukhanyinya lira li litaala lienelo, khuvula khulaangwa Lahishi khulaangwa Dani. Liakulikhwa kuuka wavo walaangwangwa Dani, namali khukhutsa. 48Mataala kenako nende michitsi chili himbi khuko nako kali mu lusomo lwa vandu vuluhia lwa Dani, vanyola khuva shivala shiavo vene.
Likavulwa li Shivala Lukhumalilikha
49Lwa Vaisraeli vali nivamali khukavula shivala shienesho, vahaakhu Yoshwa mwana wa Nuni lusomo lulala lwi shivala, khuva lwelwe mwene. 50Vamuha litaala lia yali navareevi mwene, khuli Mwami Nyasaye yali navooli. Yaheelwa litaala lia Timunatsi Sera, lili mu shivala shi vikulu shia Efurahimu. Yoshwa yumbakha vuyia litaala lienelo, namenyamu.
51Musalisi Eliazari, Yoshwa mwana wa Nuni, nende vimilili vi tsinzu tsia vandu vi tsimbia tsia Israeli, vakavanyinya tsisomo tsi shivala shienesho, khuvirila mulikhuva ikura khureeveshitsa Mwami Nyasaye, khuli vakhola mu litaala lia Shilo, mu vwinjililu vwi Liheemo Litakatifu. Khulwa yako, Vaisraeli vamala khukavula shivala munjila yeneyo.
© The Bible Society of Kenya, 2013