YOSHWA 13
13
Shivala Shishili Khuvukulwa Khandi
1Yoshwa yali wasakhula khandi ni mihika minyishi. Mwami Nyasaye yamuvoolela, “Uli musakhulu wi mihika minyishi, navutswa khushiliho ni shivala shindi shinyishi shitushili khandi khuvukulwa: 2lusomo lwosi lwa Vafilisti nende Vageshuri, 3khali khutsia khutukha mu lusomo lwosi lwa Avimu, khuluveka luli ikuvanda. (Shivala shiranjilanga khu Muchela kwa Shihori, khu mupaka kwi shivala shia Misri, khali khutsia khutukha khuluveka luli ivuluka khu mupaka kwa Ekuroni, lwalolekha nu lwa Vakanaani. Vami va Vafilisti vamenyanga mu mataala ka Gaza, Ashidodi, Ashikeloni, Gatsi, nende Ekuroni.) 4Khushiliho ni shivala shiosi shia Vakanaani, nende Mehara (Shivala shiali shia Vasidoni), khali khutsia khutukha mu litaala lia Afeki, khu mupaka kwa Vaamori; 5lusomo lwa Vagebali; shivala shia Lebanoni shiosi khutsia khutukha khuluveka luli ivukwi, khurula mu litaala lia Baala Gadi kuluveka luli ikuvanda wi Shikulu shia Herimoni, khutukha khu Injila ya ha Hamaatsi. 6Shivala yishi shilimu nu lusomo lwosi lwa Vasidoni, vamenyanga mu shivala shi vikulu hakari hi Vikulu via Lebanoni nende litaala lia Misirefotsi Mahimu. Niitsa khukhunga vandu yava voosi khurulamu, lwa Vaisraeli valiitsa khuva nivisuundanga. Uliitsa khukavulila Vaisraeli shivala shienesho, khuli khuvoolele ukhole. 7Khulwa yako, kavulila vandu vi tsimbia tisa tsindi nende inusu ya vandu vuluhia lwa Manaase shivala yishi, khu shive shiavo vene.”
Khukavulwa khu Lusomo Khuluveka luli Ivukwi wu Muchela kwa Yorodani
8Vandu vi tsimbia tsia Rubeni nende Gadi nende inusu ya vandu vuluhia lundi lwa Manaase, vali vanyola khale shivala shia Musa, murumishi wu Mwami Nyasaye yali niyavaha; shiali khuluveka luli ivukwi wu Muchela kwa Yorodani. 9Lusomo lwavo lwatsia nulutukha mu litaala lia Aroheri (khundulu khu Luhoongo lwa Arunoni)khandi litaala lili hakari mu luhoongo lwenolo, khandi nishivukulamu shivala shichingukha shialekhana khurula mu litaala lia Medeba, khutukha mu litaala lia Diboni. 10Shiatsililila khutsia khutukha khu mupaka kwa Amoni, khandi nishivukulamu mataala koosi kamihwangwa nu mwami Sihoni wa Vaamori, wamiha nali mu litaala lia Heshiboni. 11Shiavukulamu khandi lusomo lwa Gileadi, tsisomo tsia Geshuri nende Maaka, Shikulu shiosi shia Herimoni, nende litaala lia Bashani liosi khali khutsia khutukha mu litaala lia Saleka. 12Shiavukulamu litaala liu Mwami Ogu, wali wu khumalilikha warulanga mu vandu vuluhia lwa Refahimu, wamihanga nali mu mataala ka Ashitarotsi nende Edurei. Musa yali wakuura vandu venavo, khandi wa vakhunga khurula mu shivala shienesho. 13Navutswa Vaisraeli vakhaywa khukhunga vandu vi tsisomo tsia Geshuri nende Maaka. Vandu venavo, vamenyanga nunundi mu shivala shia Israeli.
14Navutswa Musa shiyali wahaakhu vandu vu lwivulu lwa Levi shivala shiosi tawe; vali vatushili khunyola khuli miandu chiavo shitonye shi misango chia vasambilanga khu vwaali khuli shihanwa khu Mwami Nyasaye wa Israeli.
Lusomo lwa Vandu Vuluhia lwa Rubeni Vaheelwa
15Musa yali wahaana lusomo lulala khu shivala shienesho khu vandu vu luhia lwa Rubeni khuva lwavo vene. 16Lusomo lwavo lwatsia nulutukha mu litaala lia Aroheri, (khundulu khu Luhoongo lwa Arunoni) khandi litaala lili hakari mu luhoongo lwenolo, khandi nuluvukulamu havundu hichingukha halekhana hosi lwa votokhana litaala lia Medeba. 17Lwa vukulamu litaala lia Heshiboni, nende mataala koosi kali havundu hichingukha halekhana: mataala ka Diboni, Bamotsi Baali, Betsi Baali mehoni, 18Yahazi, Kedemotsi, Mefatsi, 19Kiriatsahimu, Sibuma, Zeretsi -- Shahari khu shikulu shili mu luhoongo, 20Betsi-pehori, vikulu vi Shikulu shia Pisiga, nende Betsi-yeshimotsi. 21Lusomo lwenolo lwa vukulamu mataala koosi, kali havundu hichingukha halekhana nende shivala shiosi shiu Mwami Sihoni wa Vaamori, yamiha nali mu litaala lia Heshiboni. Musa yamukuura, khali nakuura vamihi va Midiani: Vamihi venavo vali Evi, Rekemu, Zuri, Huri, nende Reba. Voosi vamihakhu shivala shienesho, havukono wu Mwami Sihoni. 22Mulala khu vandu va Vaisraeli viirila muliihe yali mukhumu walaangwangwa Balamu mwana wa Behori. 23Muchela kwa Yorodani, nakwo kwali mupaka kwa vandu vuluhia lwa Rubeni. Vandu vuluhia lwa Rubeni, navo vamenya mu mataala kenako, khulondokhana khu shia inzu.
Lusomo lwa Vandu Vuluhia lwa Gadi Vaheelwa
24Musa yali wahaana khandi lusomo lulala khu shivala shienesho, khu vandu vuluhia lwa Gadi khuva lwavo vene. 25Lusomo lwavo lwalimu ni litaala lia Yazeri nende mataala koosi kali mu lusomo lwa Gileadi, inusu yi shivala shia Vaamoni, khali khutsia khutukha mu litaala lia Aroheri, khuluveka luli ivukwi wi litaala lia Raba; 26Shivala shiavo shiraanjila mu litaala lia Heshiboni, khutsia khutukha mu litaala lia Ramatsi Mizipehi khandi khu litaala lia Betonimu, khuraanjila mu litaala lia Mahanahimu, khutsia khutukha khu mupaka kwi litaala lia Lodebari. 27Luhia lwa Gadi lwaheelwa khandi inusu yu Luhoongo lwa Yorodani khuluveka luli ivukwi, lwa Mwami Sihoni yamihanga nali mu litaala lia Heshiboni. Shivala shienesho shiatukhanga khuluveka luli ivuluka wi Iyanza ya Galilaya, khandi shivukula mataala ka Betsi-haramu, Betsi-nimura, Sukotsi, nende Zafoni. 28Yaka nako mataala nende michitsi chiu luhia lwa Gadi vaheelwa, khuva shivala shiavo vene.
Lusomo lwa Vandu Vuluhia lwa Manaase vali Ivukwi Vaheelwa
29Musa yali wahaana khandi lusomo lulala khu shivala shienesho, khu inusu ya vandu vuluhia lwa Manaase khuva lwavo vene. 30Lusomo lwavo lwatukhanga mu litaala lia Mahanahimu, khandi luvukulamu litaala liosi lia Bashani -- shivala shiosi shiu Mwami Ogu, nali mwami wa Bashani, khali michitsi chiosi makhomi sita chia Yahiru chili Bashani. 31Lwavukulamu inusu yu lusomo lwa Gileadi, khali mataala ka Ashitarotsi nende Edurei, mataala makali ki shivala shiu Mwami Ogu wa Bashani. Yaka koosi kahaanwa khu inusu ya vandu vivulwa nu mwana wa Manaase walaangwangwa Makiri.
32Nindi Musa yakavula shivala khuluveka luli ivukwi wi litaala lia Yeriko nende Muchela kwa Yorodani, lwa yali nali mu lwomera lwa Moabu. 33Navutswa Musa shiyahaakhu vandu vu lwivulu lwa Levi shivala shiosi tawe. Yavavoolela ndi miandu chia vanyola ni shitonye shirulanga khu vihanwa vihanwangwa khu Mwami Nyasaye wa Israeli
© The Bible Society of Kenya, 2013