YOSHWA 12
12
Mira ka Vami va Musa yakuura
1Vaisraeli vali nivakuuri khale, khandi nivavukuli shivala khuluveka luli ivukwi wu Muchela kwa Yorodani, khuraanjila mu Luhoongo lwa Aranoni khutukha mu Luhoongo lwa Yorodani, khali khutsia khutukha khuluveka luli ivuluka wi Shikulu shia Herimoni. Vakuura vami vavili. 2Mulala khu vami venavo yali Sihoni, wamihanga Vaamori, nali mu litaala lia Heshiboni. Yamiha khuraanjila havundu halaangwangwa Aroheri (Khundulu khu Luhoongo lwa Aranoni) khandi litaala lia hakari mu luhoongo lwenolo, khutukha khu Muchela kwa Yaboku, kuli khu mupaka kwa Vaamoni; khali inusu yu lusomo lwa Gileadi lwa valitsilwamu. 3Yamiha khandi Luhoongo lwa Yorodani, khuraanjila khu Inyanza ya Galilaya khuluveka luli ikuvanda, khali khutukha mu litaala lia Betsi-yeshimotsi (Khuluveka luli ivukwi wi Inyanza yi Ichumbi) khandi nu kukholomokha khutsia khutukha hasi hi Shikulu shia Pisiga.
4Vakuura khandi Mwami Ogu wa Bashani, wali nali mulala khu vandu vukhumalilikha vuluhia lwa Refahimu, yamihanga nali Ashitarotsi nende Adurei. 5Yamiha khuraanjila khu Shikulu shia Herimoni, Saleka, lusomo lwa Bashani lwosi khutukha khu mipaka chia mataala ka Geshuri nende Maaka, khali inusu yu lusomo lwa Gileadi, khutsia khutukha mu lusomo lu Mwami Sihoni wi litaala lia Heshiboni.
6Vami vavili venavo vali vakuurwa na Musa nende Vaisraeli. Musa, nali murumishi wu Mwami Nyasaye yali wahaana shivala shiavo, khu vandu vi tsimbia tsia Rubeni nende Gadi, nende inusu ya vandu vuluhia lwa Manaase, khuva shiavo vene.
Mira ka Vami va Yoshwa Yakuura
7Yoshwa nende Vaisraeli vakuura vami voosi, vu lusomo luli khuluveka luli imbo wu Muchela kwa Yorodani, khuraanjila Baali-gadi, havundu hali mu Luhoongo lwa Lebanoni khutsia khutukha khu Shikulu shia Halaki, khuluveka luli ikuvanda himbi Edomu. Yoshwa yakavulila shivala shienesho vandu vi tsimbia tsia Israeli; nishiva shiavo khumatukhu koosi. 8Lusomo yulu lwavukula shivala shi vikulu, shivala shili hasi hi vikulu khuluveka luli imbo, Luhoongo lwa Yorodani ni vivala vili hasi halwo, mwichendanyama, vikulu khuluveka luli ivukwi, nende shivala shiumakanu khuluveka luli ikuvanda. Vandu vi shivala yishi vali Vaahitse, Vaamori, Vakanaani, Vapeerizi, Vaahivi, nende Vayeebusi. 9Vaisraeli vakuura Mwami wi litaala lia Yeriko, Mwami wi litaala lia Ai (himbi Betseli), 10Mwami wi litaala likali lia Yerusalemi, Mwami wi litaala lia Heburoni, 11Mwami wi litaala lia Yarumutsi, Mwami wi litaala lia Lakishi, 12Mwami wi litaala lia Eguloni, Mwami wi litaala lia Gezeri, 13Mwami wi litaala lia Debiri, Mwami wi litaala lia Gederi, 14Mwami wi litaala lia Horoma, Mwami wi litaala lia Aradi, 15Mwami wi litaala lia Libuna, Mwami wi litaala lia Adulamu, 16Mwami wi litaala lia Makeda, Mwami wi litaala lia Betseli, 17Mwami wi litaala lia Tapuha, Mwami wi litaala lia Heferi, 18Mwami wi litaala lia Afeki, Mwami wi litaala lia Lasharoni, 19Mwami wi litaala lia Madoni, Mwami wi litaala lia Hazori, 20Mwami wi litaala lia Shimuroni Meroni, Mwami wi litaala lia Akushafu, 21Mwami wi litaala lia Tanaki, Mwami wi litaala lia Megido, 22Mwami wi litaala lia Kedeshi, Mwami wi litaala lia Yokunehamu (himbi khu Shikulu shia Karameli), 23Mwami wi litaala lia Dori (Khuluchinga lwi inyanza), Mwami wi litaala lia Gohimu (lili Gilugali), 24nende Mwami wi litaala lia Tiriza -- vami voosi vali makhomi kavaka na mulala.
© The Bible Society of Kenya, 2013