ISAYA 58
58
Lisaala Liatoto nende liu Vuvehi
1Mwami Nyasaye avoolanga,
“Mulaanjilile liyooko, vuchila khuhulukha,
mulaanjilile ikulu muno khuli shisiliva.
Vooleli vandu vaanje vutamanu vwavo vwa vakhola,
vandu vi inzu ya Yakobo vwoni vwavo vwa vakhola.
2Khali ndio, navo vasaalanga khwinzi shia litukhu,
khandi vayaanzililanga khwenya khumanya mechitso kaanje,
khuli ni vandu vuluhia vakholanga likhola liu vulunji
khandi vashili khwivililakhu malako kaanje
inzi Nyasaye wavo.
Vareevanga khukholelwa katoto,
vayaanzililanga khwisuunda khwinzi Nyasaye.
3“Vandu vandevanga,
‘Shichila shina khuhonganga vuchila khulia,
navutswa shiulolakhu tawe?
Shichila shina khwichehitsanga,
navutswa shindu shivulakhuho shia wu kholanga?’
“Khali ndio, khulitukhu lia muhonganga vuchila khulia,
mukholanga ka vene muyaanzi,
numutambitsa varumishi venyu voosi.
4Loli, muhonganga vuchila khulia
khulu khulembana nu khukwana,
nu khurumulana vikhusi khusalilitsana.
Khuhonga vuchila khulia khuli khwa mukholanga
khulitukhu linu khwikalilanga Nyasaye
khuvula khuhulishitsa lisaala lienyu.
5Lwa muhonganga vuchila khulia,
munyi vene mwinyashitsanga;
mwinamanga hasi khuli ni vitundu,
mamukona khu tsinguvu tsia makunia
nende mu likooshe.
Ni kilikali, khunyala khuva nakhwo
khwa mulaanganga khuhonga vuchila khulia?
Nalio linyala khuva litukhu lia inzi Mwami Nyasaye
mbuchililanga?
6“Khuhonga vuchila khulia
khwa nyenyanga nakhwo yukhu,
Khuvoholola yavo vavohwa mucheela
vuchila vutamanu vwosi vwa vakhola,
khuvoholola vanyashitswangwa khuva valakhule,
khandi khulakhula yavo vatambitswangwa khuva vavoholole!
7Khusanga shiukhulia na yavo vali ni inzala
nu khwinjilitsa vamanani vahuya huyanga mu tsingo tsienyu;
khuha vandu vali shekenye tsinguvu tsiu khwifwala,
nu khuvula khwambakhana khukhonya viikho venyu.
8“Numukhola kenako,
niitsa khumukholela ka mwenyanga
khuli liuva liakhanga mu mavwevwe,
khandi numuli valwale muhonyinywi vwangu muno;
nalwo lwa likhola liu vulunji lienyu liliitsa khumwimilila,
ninzi nilimulinda khurulila inyuma nu vukhumi vwanje
inzi Mwami Nyasaye.
9Nalwo lwa muliitsa khusaala,
ninzi Mwami Nyasaye muchipe;
muliitsa khusaala nu mwenyanga khukhonywa,
ninzi nilivoola, ‘Ndi hanu!’
“Niiva muliitsa khulekha khutambitsa vandi,
khuchayana nu khulomoloma vindu vitamanu khu vandi,
10mamuhe vandu vi inzala ilumanga shiukhulia
khandi mukholele vandu vatambitswangwa ka venyanga,
nalwo lwa vulavu vuliitsa khumwashila mu shisuundi
khandi shisuundi shili himbi na munyi
shililolekha khuli mbasu kwakhanga.
11Nalwo lwa inzi Mwami Nyasaye
niitsa khumwimilila shia khase khosi;
khumukholela koosi ka mwenyanga
mumatukhu ku vutiinyu
khuli muli mu shiangalangwi;
niitsa khumuha tsingulu.
Muliitsa khuva khuli mulimi kuli na matsi katushili,
khuli isieveye ivula khukhaama matsi.
12Lichiinga lienyu liali lia khale liliitsa khulombwa vuyia;
muliitsa khulomba vuyia misinji chiali chia khale;
muliitsa khulaangwa vandu valombanga vuyia masisi kapomolwa,
vandu valombanga vuyia tsinjila
tsi litaala tsiu khumenyamu.
Murungu kwi Litukhu li Lisabato
13“Niiva muliitsa khulekha khukhola muhinzilu khulitukhu li Lisabato,
khandi mulekhane ni mihinzilu chienyu chia mukholanga khulitukhu litakatifu lianje lienelo,
niiva muliitsa khukhola litukhu lianje li Lisabato khuva liu vuyaanzi,
nu khuvukula litukhu litakatifu lianje
inzi Mwami Nyasaye khuva liu luyali;
niiva muliitsa khuliha luyali
lwa mulekhana nu muhinzilu kwosi,
inoho khulekha khuyaanzilila khukhola
ka muyaanzitsanga munyi vene,
inoho khulekha khulomoloma tsimbakha tsia vutswa.
14Nalwo lwa muliitsa khuyaanzilila mwinzi Mwami Nyasaye,
nu khukhola khuheelwa luyali shia havundu hosi mu shivala.
Niitsa khuchila mwalia miandu
chiali chia kuuka wenyu Yakobo;
shichila inzi Mwami Nyasaye mali khuvoola.”
© The Bible Society of Kenya, 2013