ISAYA 50
50
1Mwami Nyasaye avoolanga,
“Ni hena wa ibarwa yu khulekhana yu khuhilana yachila nu khulekhana na mama wenyu ili?
Inoho ni viina wandi ni likoovi lielie wachila nimukuulitsa khuye?
Loli! Vwoni vwenyu navwo vwachila numukuulanyinywa,
vutamanu vwenyu navwo vwachila nu khulekhana na mama wenyu.
2Shichila shina nitsaho nimbula khunyola mundu?
Lwa nalaanga, shichila shina mundu navula khunjipa?
Khunyala khuvoola mukhono kwanje kwahimbiha kunyala khuvula khuhonyinya?
Inoho nyala khuva mbulakhu tsingulu tsiu khuhonyinya?
Loli, ngondeshelanga inyanza ma ikhaama matsi,
kholanga michela chikwa khuli shiangalangwi;
tsisutsi tsiachio tsihuunyanga vukuundu shichila tsivula matsi,
nitsikhutsa shichila vuluhu.
3Ninzi umwaminyanga malesi,
khuli ni vandu vikhulanga vakhutsu vavo.”
Varumishi vu Mwami Nyasaye Valalonda Malako
4Mwami Nyasaye unzechitsi kanyala khuvoola,
khu ndinyilitsi woyo wateteshela.
Shia mu mavwevwe neye wu kholanga mba ni lienya
liu khwenya khuhulila ka yenyanga khunzechitsa.
5Mwami Nyasaye wanzikula maroyi kaanje,
khandi shili khuhinganakhu
inoho khumwambakhana.
6Nahaana mukongo kwanje khu yavo vandumulanga,
tsiseye tsianje khu yavo vasinyulanga matelu kaanje;
shinavakayakhu lwa vambetsanga tsisoni
inoho khundutsila maree mu moni mwanje tawe.
7Navutswa Mwami Nyasaye neye ukhonyanga inzi,
shinyala khuheenditswa mwoyo tawe.
Khali nuumanga imoni khuli lichina,
khandi manyi vulahi ndi niitsa khuvula khuheelwa tsisoni.
8Woyo ushinganga khurula mu vutamanu ali himbi ninzi.
Ni viina unyala khumbinjitsa?
Leshi khusinjile naye mushiina.
Ni viina wenyanga khunzala?
Leshi avoole makhuva kachilanga niyenya khunzala.
9Loli! Mwami Nyasaye neye ukhonyanga inzi;
ni viina unyala khuvoola havulavu vutamanu vwa nakhola?
Loli, vandu venavo voosi valiitsa khuvwa tsingulu khuli inguvu irandukhanga;
tsinjetso tsiliitsa khuvalia khutukha lwa vavwa.
10Ni viina khu munyi uheetsanga Mwami Nyasaye luyali
nu khulonda likhuva liu murumishi wewe,
khali niiiva achendanga mu shisuundi vuchila khulola vulavu,
navutswa khali ndio, wasuuvilila mu Mwami Nyasaye
khandi aheenza khu Nyasaye wewe amukhonye?
11Loli! Munyi voosi va muvwanyinyanga mulilu mu vandi khwenya vativitswi,
muliitsa khutivitswa nu mulilu kwa mwa vwanyinyanga mu vandi.
Mwami Nyasaye aliitsa khuchila kikholeshe;
khandi muliitsa khunyakhana vululu muno.
© The Bible Society of Kenya, 2013