ISAYA 49
49
Israeli, Vulavu khu Vandu vi Tsimbia Tsindi
1Munyi visuulu, mumbulishitsi;
munyi vivala vili ihale wene, muhulile makhuva yaka,
Khali nishili khwivulwa, Mwami Nyasaye yanaanga;
khuraanjila khulitukhu lia mama wanje yanzivula yavoola lira lianje.
2Yuchihitsa makhuva kaanje khuli shivavi shiuchi,
yambisa mushinini shiu mukhono kwekwe;
yakhola khuli muvanu kwiraanyinywa
manambikha mushiula shieshie.
3Yambolela, “Israeli, nivi murumishi wanje;
vandu valiitsa khumba vukhumi shichila yivi.”
4Navutswa navoola, “Mali khukhola muhinzilu kwi shikhaya,
namala tsingulu tsianje vutswa
khandi mbula vukhala vwosi.
Khali ndio, Mwami Nyasaye aliitsa khukholela katoto,
aliitsa khundunga shihanwa khurulana khu kakholanga.”
5Khali nishili khwivulwa, Mwami Nyasaye yandovola;
yakhola khuva murumishi wewe khukalushitsa vandu vuluhia lwa Yakobo khuye,
nu khulera khuye mwene Vaisraeli,
shichila khali inzi mwene naheelwa luyali imbeli wu Mwami Nyasaye;
khandi neye umbetsanga tsingulu.
6Mwami Nyasaye yambolela,
“Murumishi wanje, ndi nu muhinzilu kwi tsingulu kwa yivi urweshitsa,
khumbakha vandu vi tsimbia tsia Yakobo,
khukalushitsa halala Vaisraeli va nachila nivarikala.
Niitsa khukhukhola khuva khuli vulavu khu vandu vi tsimbia tsindi,
nikanyalikha vandu voosi mu shivala vahonyinywi.”
7Mwami Nyasaye, uli Muhonyinyi khandi Mutakatifu wa Israeli
avoolelanga woyo walechelitswa muno,
wa vandu vi tsimbia tsindi tsihimanga, nali murumishi wa vamihi,
“Vami valiitsa khulola nuvohololwi nu khusinjila khukhuha luyali,
shichila Mwami Nyasaye, uli musuuvilwa,
Nyasaye Mutakatifu wa Israeli warovola yivi.”
Khuli Yerusalemi Liliitsa Khukholwa Vuyia
8Mwami Nyasaye avoolanga,
“Mumatukhu ka wenyanga khukholele ka wenyi ninzi wakhuchipa,
mumatukhu ka wenyanga khuhonyinyi ninzi wakhukhonya;
ninzi wakhulinda khandi khuvirila khu yivi,
nalomba lilakano na vandu voosi,
khumukalushitsa mu shivala shia mwamenyamu
nu khumukavulila shivala shiativitswa shienesho,
9khuvoolela vandu vavohwa, ‘Ruli mucheela mwa mwavohwa yomo,’
khandi khuvolela vamenyanga mu shisuundi ‘Mumali khuvohololwa!’
Valiitsa khuva khuli makondi kayaanga vunyasi khu tsinjila,
khandi kanyolanga vunyasi shia havundu hosi khu shikulu.
10Shivalihulilakhu inzala inoho khwenya shia vang'wa
inoho luya lu mu shiangalangwi
inoho mbasu khuvasamba tawe.
11“Niitsa khukalukhanyinya vikulu viosi khukwa injila,
khandi muhaanda kwanje muvambalalu kulitsa khuchingulwa.
12Heenzi, vandu valiitsa khurula ihale wene --
valala khurula khuluveka luli ivuluka,
vandi khurula imbo,
khandi valala khurula ikuvanda.”
13Munyi likulu, mumwimbile tsinyimbo tsiu vuyaanzi;
yivi lilova, kenyekhanga wikhoye;
munyi vikulu, reekuli lwimbo;
shichila Mwami Nyasaye neye uleminyanga vandu veve mwoyo
alavela tsimbavasi vandu veve vanyakhananga.
14Navutswa munyi vamumenyanga mus Sayoni mwavoola,
“Mwami Nyasaye ukhwivale,
khandi umali khukhivilila khutsi.”
15Khulwa yako, Mwami Nyasaye achipanga navoola,
“Mundu mukhali anyala khwivilila mwana wewe wanunyinyanga,
nu khuvula khuyaanza mwana wewe wa mwene yivula?”
Khali niiva aliitsa khumwivilila inzi shinyala khumwivilila tawe!
16Heenzi, namuhandika mira kenyu muvikala via makhono kaanje;
Masisi ki litaala likali lienyu kali imbeli wanje.
17Vandu valiitsa khukhumbakha vuyia vali himbi khwitsa,
khandi yavo vakhutivitsa valiitsa khurula mu yivi.
18Heenza ikulu ma ulole shikholekhanga;
Vandu vovo vakanile halala, nivitsa khu yivi.
Inzi mwene nisuuhanga lwa shili Nyasaye uli mwoyo,
muliitsa khwilola shichila vandu venyu,
khuli mwiiha yilolanga nafwali viuma viu vukuuli vululu.
19“Khali niiva wali wativitswa nukwa lichiinga khandi shivala shioshio ni shiononyinywa,
uliitsa khunyeleha khali vandu vovo vavuli khutukha mu yivi,
khandi yavo vashiononyinya valiitsa khuva varulamu.
20Vaana vivulwa numumenyanga mu vuhaambe
valiitsa khuvoola numuhulilanga,
‘Shivala shieru shiakhucheha;
makhuhe havundu ha khunyala khumenya.’
21Nalwo lwa uliitsa khwireevana mwene mu mwoyo kwokwo,
‘Ni viina wivula vaana yava?
Nakhutsilwa vaana vaanje nimba khuli mukhali mukuumba;
nahilwa mu vuhaambe ninzambakhanwa.
Ni viina wa vilushitsa vaana yava?
Nali narikwa wonyene vutswa,
navutswa vaana yava --
ni hena wa varula?’ ”
22Mwami Nyasaye avoolanga,
“Loli! Niitsa khuhaana shimanyilu khu vandu vi tsimbia tsindi;
valiitsa khulera vaana venyu ingo,
nivamali khuvachinga,
vave vaana vi shiyayi inoho vi shikhana.
23Vami valiitsa khuva khuli vatata venyu;
vaana vi shikhana va vami valiitsa khuva khuli vamama venyu vu khumulela.
Valiitsa khumwinamila ni vakwili hasi mahunama.
Valiitsa khumwichehitsila khumuha luyali.
Nalwo lwa muliitsa khumanya ndi ninzi Mwami Nyasaye;
Yavo valindililanga mwinzi valiitsa khuvula khuheelwa tsisoni.”
24Munyala khunuula musikali vindu viayayaaya khurula muliihe,
inoho khuvukula vavohe vahonyinywa khurula khu mundu mululu?
25Navutswa Mwami Nyasaye avoolanga,
“Ni kilikali, vavohe va vasikali vanyala khuvukulwa,
khandi vindu viayaaywa khuvukulwa khurula khu mundu mululu.
Niitsa khukwanakana na yavo vakhukwananga,
nu khuhonyinya vaana vovo.
26Niitsa khukhola vandu vamutambitsanga khwiirana vene khu vene;
valiitsa khutanda shiraano nende vurima, khuli vatandanga idivai.
Nalwo lwa vandu voosi valiitsa khumanya
ndi inzi Mwami Nyasaye, uli Muhonyinyi wenyu,
khandi Muhavini wenyu, uli Nyasaye Uli Ikulu khu Viosi wa Yakobo.”
© The Bible Society of Kenya, 2013