ISAYA 18
18
Nyasaye Aliitsa Khusalilitsa Etsopia
1Wooyi! Uli khu vutiinyu yivi shivala shi tsisichi tsitsulamu,
shivala shili iluchelekha wi michela chia Etsopia.
2Shirumanga varumwa ni vakhalakanyilanga mu Muchela kwa Naili,
mu maaro kalombwa khu vitundu vikali kelemanga khu matsi!
Munyi varumwa vaangu, simushi
muhile likhuva khu vandu varaambi khandi vareelelekha shikhanda
mu shivala shi tsingulu khandi shiu vunyali,
shi michela chia vukhanyinyanga.
3Munyi vandu voosi vamenyanga mu shivala,
munyi vamenyanga khulilova,
lwa shimanyilu shi ipendera shiliitsa khusinjilitswa khu shikulu,
muheenze mulole!
Khandi lwa shisiliva shiliitsa khukhuvwa, muhulishitsi;
4shichila Mwami Nyasaye yambolela,
“Nindi havundu hamenyanga mwikulu,
naheenza ndole shikholekhanga;
nimbonjeli vutswa khuli mbasu kusakhanga vululu mbasu,
khuli liime liamanga hasi mumatukhu ki lichesa;
5shichila matukhu ki lichesa nikashili khutukha, shimuli nishiakhamulukha,
khandi lwa matunda maviisi ki misabibu karaanganga khwenga,
alakhalaka shirina ni ikhoni yu khutsoolela, nu khuhalula viseevu viakwo.
6Mivili chia vandu vakhutsa vavo chiliitsa khurikwa nichialakalala
khu manyonyi mu vikulu
nende tsinyama tsindi tsiumbulimu.
Manyonyi kaliitsanga tsinyama
kaliitsa khumenyamu mumatukhu ki shimiyu
khandi tsinyama tsiumbulimu tsiosi khumenyamu mumatukhu ku vushindu.”
7Mumatukhu kenako, vandu valiitsa khulera vihanwa khu Mwami Nyasaye wi Mikaanda Chiliihe, vandu varaambi khandi vareelera shikhanda shiu mmbili, vandu varilwa na vandu vi ihale wene; luhia luli ni tsingulu khandi lukwananga nulukuura, lwa michela chikavulanga shivala shiavo.
© The Bible Society of Kenya, 2013