ISAYA 15
15
Likhuva khu Moabu
1Yili nalio likhuva lia Nyasaye khu shivala shia Moabu.
Lwa litaala lia Aru limali khutivitswa mu vutukhu,
luvwelele shivala shia Moabu.
Lwa litaala lia Kiru limali khutivitswa mu vutukhu,
luvwelele shivala shia Moabu.
2Vandu vi litaala lia Diboni vatikulushi hikulu hene mu litempeli khutsia khulila;
Vamoabu vikhulanga shichila mataala ka Nebo nende Medeba.
Vandu voosi vaveeka luhaale
mateelu kavo koosi kaveekwa.
3Vandu voosi khu tsinjila vayifwala tsinguvu tsia makunia;
khali khwikulu khwi tsinzu nende mu vikuri
vandu voosi vikhuvanga nivaroonya miliika.
4Vandu va mataala ka Heshiboni nende Elehale valilanga,
tsikhwili tsiavo tsimali khutukha havundu halaangwangwa Yahazi.
Khali vasikali va Moabu valilanga ikulu;
vaheendanga mwoyo nivatechela.
5Mwoyo kwanje kwavelela shichila shivala shia Moabu;
vandu vayilukhayo vatsia mu litaala lia Zohari
vatukha havundu halaangwangwa Egulatsi Shelishiya.
Vatikulukhanga nivatsia Luhitsu nivalila,
nivali khu muhaanda kutsitsanga Horonahimu
vikhulanga shichila vativitswa.
6Muchela kwa Nimurimu kwakhaama matsi,
vunyasi vwaniala, vulimu vwosi vwayuma.
Shindu shiosi shiviisi shivulakhuho shimeelamu.
7Vandu vambukhanga Mushinoko shi Liise,
vitiukhanga miandu chiavo chia vanyola chiosi,
halala na mavishilu kavo koosi.
8Khulila khwavo khuhulilikhananga shia havundu hosi mu shivala shia Moabu.
Tsikhwili tsiavo tsimali khutukha mu litaala lia Egulahimu,
tsikhwili tsienetso tsimali khutukha Beherelimu.
9Muchela kwa Diboni kwayitsula masahi;
nikhali Nyasaye alameeta matiiinyu kandi khu vandu vi litaala lia Diboni.
Isimba iliitsa khurumwa khwiira vandu
valiitsa khuva nivarikala mwoyo,
nivachelitsanga khwilukha khurula Moabu.
© The Bible Society of Kenya, 2013