2 SAMWELI 19
19
Yohabu Yakholela Mwami Daudi Shihenye henye
1Yohabu yavoolelwa ndi Mwami Daudi, alilanga niyikhula Abisolomu. 2Vasikali va Daudi vahulila ndi alilanga, shichila mwana wewe yali umali khukhutsa. Litukhu liavo lia vali ni tsingulu tsiu khukuura liakalukhana vwangu niliva litukhu liu khuvelela mu mioyo. 3Vakalukha mu litaala lienelo ni vanyenyekhanga, khuli vasikali vanyoli tsisoni, shichila vilukhanga khurula mu liihe. 4Mwami Daudi yakhunikha mu moni mwemwe, nalila tsikhwili navoola, “Mwana wanje! Mwana wanje Abisolomu! Abisolomu, mwana wanje!”
5Nalwo lwa Yohabu yasimukha, natsia khwinjila mu inzu yu Mwami Daudi navoola, “Ukholele varumishi vovo tsisoni nunundi -- vandu vakhuhonyinyi yivi nende vaana vovo vi shiyayi nende vi shikhana, khali vakhali vovo nende vakhali vovo vamenyinywa. 6Uhinganyinyanga yavo vakhuyaanza yivi, khandi ukhonyanga yavo vakhuhimanga! Umali khukhumanyinya havulavu ndi vimilili va vasikali nende vasikali vavo, shivali shindu khu yivi tawe. Nakhalola ndi wakhavele nu vuyaanzi muno, niiva Abisolomu yakhavele nashili mwoyo nunundi, khandi khutsi voosi nu khwakhutsa. 7Simukha utsi nunundi khutinyilitsa vasikali vovo. Nzisuuhanga khuvirila mu lira liu Mwami Nyasaye ndi niiva ulambakhana khutsia, khali mulala khuvo shiatsitsanga khutsililila khuva nivi mukamba mu mavwevwe tawe. Yaka nako katsitsanga khuva matamanu muno, khuvira matiinyu koosi kakhukwila yivi khuraanjila muvuvukha vwovwo khutukha nunundi.” 8Mwami Daudi yasinjila natsia khwikhala khu shisoko shieshie, himbi ha shilivwa shi litaala lienelo. Vasikali veve vavoolelwa ndi aliho, ma voosi ni vamuvotokhana.
Daudi Yakalukha Yerusalemu
Vasikali va Israeli voosi vali nivamali khwilukha, shia mulala natsia ingo wavo wa yarulanga. 9Vandu varaanga khulembana nivareevana vene khuvene, shia havundu hosi mu vandu vi tsimbia tsiosi tsia Israeli. Vavoolelana vene khuvene, “Mwami Daudi yakhuhonyinya khurula khu vatsiku veru; khandi nakhuhonyinya khurula khu Vafilisti. Navutswa nunundi umali khwilukha mu shivala shieru shichila Abisolomu. 10Khwavekha Abisolomu makura khuva mwami weru, navutswa umali khukhutsila mu liihe. Shichila shina khwambakhane khulomoloma makhuva khulondokhana khuli khunyala khutsia khuchelitsa khulera Mwami Daudi?”
11Makhuva ka Vaisraeli vavoolanga katukha khu Mwami Daudi. Nalwo lwa Mwami Daudi yaruma vasalisi Zadoko nende Abiatsari, khutsia khureeva vimilili va vandu va Yuda, “Shichila shina munyi mwenyanga khuva vukhumalilikha khukhonya khukalushitsa Mwami Daudi mu inzu yeye yu vwami? 12Munyi muli viikho vaanje, musahi kwanje mwene; shichila shina muli vukhumalilikha khungalushitsa?” 13Daudi yavavoolela khandi vavoolele Amasa, “Uli mwiikho wanje, musahi kwanje. Khuraanjila nunundi khurovole khuva mwimilili wu mukaanda kwa vasikali vaanje havukono ha Yohabu. Nyasaye anziiri niiva niitsa khuvula khurweshitsa kenako.” 14Makhuva ka Daudi yavoola kayaanzitsa vandu voosi va Yuda, nivarumana likhuva khuye akalushi, halala na varumishi veve.
15Lwa Mwami Daudi yali nali khu luchendo lwelwe lu khukalukha, yakana na vandu va Yuda ha Muchela kwa Yorodani. Vandu venavo vali vatushi mu litaala lia Gilugali khumuhelishitsa khwambukha muchela. 16Khulitukhu lilala lienelo, Shimei mwana wa Gera wi litaala lia Bahurimu, lili mu vandu vuluhia lwa Benyamini, yilukhaka natsia khu Muchela kwa Yorodani khwakanila Mwami Daudi. 17Shimei mwana wa Gera, yali na vandu iheelefu indala khurula mu vandu vuluhia lwa Benyamini. Murumishi wa vandu vi inzu ya Saulu walaangwangwa Ziba, yitsa khandi na vaana veve vi shiyayi likhomi na varanu nende varumishi makhomi kavili; nivatukha ha Muchela kwa Yorodani Mwami Daudi nashili khutukhaho. 18Vambukha muchela khuheeleshitsa vandu vu mu inzu yu vwami khwambukha, khuvakhonya khukhola shia shindu shiosi, shiu Mwami Daudi yenyanga vakhole.
Shimei Yakanila Daudi
Lwa Mwami Daudi yali niyirechekhanga khwambukha, Shimei yisiuva mwene hasi imbeli wewe; 19navoola, “Yivi mwami, nuyaanza lekha khwitsushitsakhu vindu vitamanu, via nakhola khulitukhu lia warula Yerusalemu. Lekha khumbukula vutamanu inoho khunganakanila shindu shitamanu. 20Inzi murumishi wowo manyi ndi kholi vwoni. Nashio shivune shichilanga nimba wu khuraanga khurula mu vandu vi tsimbia khuluveka luli ivuluka, khwitsa nunundi khwakanila yivi.”
21Navutswa Abishai mwana wa Zeruya, yalaanjilila navoola, “Shimei utushili khwiirwa, shichila yalaama mundu wu Mwami Nyasaye yavekha makura khuva mwami.”
22Navutswa Daudi yavoolela Abishai nende amwavo wewe Yohabu, “Ni viina umureevi inganakani yu khukhonya? Mwenyanga khunderela vutiinyu? Ninzi Mwami wa Israeli nunundi, khandi mundu avulakhuho khali mulala khu Vaisraeli utsitsanga khwiirwa nunundi.” 23Nalwo lwa Mwami Daudi yavoolela Shimei, “Khusuuvilitsanga ndi utsitsanga khuvula khwiirwa.”
Mefiboshetsi Yakanila Daudi
24Mefiboshetsi nali wali, kuuka wa Saulu yakholomokha natsia khwakanila Mwami Daudi. Mefiboshetsi yarula natsiayo, vuchila khusava vilenje vievie, khuvekakhu matelu keke, inoho khufuyakhu tsinguvu tsietsie, khurula khulitukhu liu Mwami Daudi yarula Yerusalemi khutukha lwa yakalukha mu milembe. 25Lwa Mefiboshetsi yatukhaho naruli Yerusalemu, khwitsa khwakanila Mwami Daudi; Mwami Daudi yamureeva, “Mefiboshetsi, shichila shina nu wambakhana khutsia ninzi?”
26Mefiboshetsi yamuchipa, “Yivi mwami, wamanya vulahi ndi inzi nafwokoya. Navoolela Ziba uli murumishi wanje, aninyinyi khu ipunda yanje, simushi nzi nivi, navutswa yangata. 27Yakhukaata yivi mwami, lwa yavoola ndi nambakhana khukhulonda. Navutswa manyi ndi yivi uli khuli injelosi ya Nyasaye. Khulwa yako, khola kakhuyaanzitsanga. 28Khali ndio, yivi wamala khwiira viikho vaanje voosi; navutswa walekha inzi khuva mwoyo khulia shiukhulia khu imesa yoyo. Yivi mwami, ni shina shianyala khumeeta khukhureeva?”
29Mwami Daudi yamuchipa, “Ka uvooli kamali khutukha! Mali khuviritsa ndi yivi nende Ziba, mukavane miandu chia Saulu.”
30Mefiboshetsi yavoolela Mwami Daudi, “Lekha Ziba avukule miandu chiosi. Sangalanga muno, shichila yivi mwami wanje ukalushi ingo mu milembe.”
Barazilai Yakalukha Ingo
31Barazilai yali uruli mu litaala lia Rogelimu, lili mu lusomo lwa Gileadi khwitsa khuheelishitsa Mwami Daudi, khwambukha Muchela kwa Yorodani. 32Barazilai yali musakhulu wi mihika makhomi munane. Yali mundu muhinda khandi neye wahilila Mwami Daudi shiukhulia, lwa yali namenyanga mu litaala lia Mahanahimu. 33Mwami Daudi yavoolela Barazilai, “Hamba khutsi nivi khumenya mu Yerusalemu. Niitsa khukhuha shia shindu shiosi, shia wenyanga.”
34Navutswa Barazilai yachipa Mwami Daudi, “Inzi ndi musakhulu wi mihika minyishi, shichila shina nzi khumenya nivi mu Yerusalemu? 35Ndi ni mihika makhomi munane; khandi mbulakhu shindu shinyala khuchila sangale. Mbulakhu mutsanzo kwi shiukhulia shianje nende shia ng'wetsanga. Shinyala khuhulila mioyo chia vandu vimbanga tsinyimbo tawe; khandi nzitsanga khuva vutswa musiko mulitoho khu yivi mwami wanje. 36Shindushili khunyola shihanwa shikali khuli shienesho tawe. Natsiakhu hatititi vutswa nivi injelekha wu Muchela kwa Yorodani. 37Nuyaanza lekha inzi murumishi wowo, ngalushi mu litaala li ingo weru, wa valinda himbi khu shilindwa shia tata wanje nende mama wanje. Mwana wanje ulaangwangwa Kimuhamu ali hanu, khukhurumishila. Yivi mwami, muvukule, umukholele ka ulolanga ni malahi muno.”
38Mwami Daudi yachipa Barazilai, “Nzitsanga khumuvukula, khandi mukholele koosi ka wenyanga. Niitsa khukhukholela shia shindu shiosi, shia uliitsa khundeva khukholele.” 39Nalwo lwa vandu voosi, vambukha Muchela kwa Yorodani, Mwami Daudi niyambukha khandi. Mwami Daudi yakhumbelela Barazilai, namukasitsa; ma Barazilai nakalukha ingo wewe.
Yuda nende Israeli Vahinjitsana Shichila Mwami Daudi
40Lwa Mwami Daudi yambukha natsia mu litaala lia Gilugali, Kimuhamu yambukha naye. Vasikali voosi va Yuda nende vandi inusu va Israeli, valiho khuheelishitsa Daudi khwambukha Muchela kwa Yorodani. 41Nalwo lwa Vaisraeli voosi, varula nivatsia khu Mwami Daudi, nivamureeva, “Shichila shina vamwiru veru, nivali vandu va Yuda, vavele ninganakani ndi vali nu vunyali vu khukhurulitsa hanu khukhuheelishitsa yivi, vandu vi inzu yoyo, nende vasikali vovo khutsia khwambukha Muchela kwa Yorodani?”
42Vandu va Yuda vachipa Vaisraeli, “Khukholi kenako, shichila Mwami Daudi nu mwiikho weru. Shichila shina kachilanga nu muva nu vurima? Mukanakananga khunyala khuva khwaliakhu shindu shiu Mwami Daudi, inoho khali wakhuhaakhu shihanwa shiosi?”
43Vaisraeli vachipa vandu va Yuda, “Mwami Daudi nu weru hali likhomi mu vunyishi, khuvira lwa muvoolanga nu wenyu, khali niiva nu mwiikho wenyu. Shichila shina mukhulechelitsanga? Khutukha mumanye ndi ni vanga khutsi, navo vali vu khuraanga khukanakana khukalushitsa Mwami Daudi!”
Navutswa vandu va Yuda valomoloma nu vululu muno, khuvira Vaisraeli.
© The Bible Society of Kenya, 2013