2 SAMWELI 18
18
Likhutsa lia Abisolomu
1Mwami Daudi yalaanga halala vasikali veve voosi, navakavula mu mikaanda chia vasikali iheelefu indala, khandi chia vasikali imia indala. Yarovola vimilili vavo vu khuvimilila. 2Nalwo lwa Daudi yavaruma khutsia mu vituma vivaka; shituma shilala shiatsia na Yohabu; shituma shindi nishiatsia na amwavo Yohabu walaangwangwa Abishai mwana wa Zeruya, khandi shiukhumalilikha nishitsia na Itahi wi litaala lia Gatsi. Shia mulala yimililanga shituma shieshie. Mwami Daudi yavavoolela, “Inzi mwene nzitsanga khutsia na munyi.”
3Navutswa vachipa, “Lekha khutsia na khutsi. Niiva khunyala khwilukha, valiitsa khuvula khukhuheendela khutsi mwoyo. Khali niiva inusu ya vasikali veru valiitsa khukhutsa, valiitsa khuvula khukhuheendela khutsi mwoyo. Navutswa utushili khuva na vasikali tsiheelefu likhomi khurula mu khutsi. Vuliitsa khuva vulahi nurikale mu litaala likali, ukhurumile vukhonyi.”
4Mwami Daudi yavachipa, “Niitsa khukhola ka munyi vene, mulolanga ni malahi.” Mwami Daudi yasinjila himbi khuluveka lwi shilivwa, lwa vasikali veve varoonjela nivarulaho mu mikaanda chia vasikali iheelefu indala, khandi chia vasikali imia indala. 5Mwami Daudi yavoolela Yohabu, Abishai nende Itahi, “Muvuli khusalilitsakhu mundu muvukha Abisolomu, shichila inzi.” Vasikali voosi vahulila makhuva ka Daudi, yali navoolelanga vimilili va vasikali veve.
6Vasikali va Daudi vasimukha nivatsia mushikuri, nivakwana Vaisraeli mu muliru kuli mu lusomo lwa Efurahimu. 7Vasikali va Daudi vakuura Vaisraeli; vakuurwa vutamanu muno, khandi vandu tsiheelefu tsimia tsivili, niviirwa khulitukhu lienelo. 8Liihe lialanda shia havundu hosi mu shivala shienesho; vandu vanyishi nivakhutsila mu muliru, khuvira yavo vali nivakhutsila mu liihe.
9Abisolomu yitsukhana niyakani na valala khu vasikali va Daudi. Abisolomu yali nahilanga isushili yeye; khandi lwa yatsililila khuvirila hasi wu musala muraambi ku museno, murwi kwa Abisolomu kwahaanda mu tsisia tsiu musala kwenoko. Isushili yeneyo, yatsililila nu luchendo, nirika Abisolomu niyeleli mu vushindu. 10Lwa mulala khu vandu va Daudi yalola kenako, yavoolela Yohabu, “Nakhalola Abisolomu niyeleli mu musala ku museno!”
11Yohabu yamuvoolela, “Niiva wamulola, shichila shina nuvula khumwiirila hawenaho? Inzi mwene nakhakhuheele ifetsa vitonye likhomi vi nende lukhanda.”
12Navutswa mundu mwenoyo yachipa, “Khali niiva ulamba ifetsa vitonye iheelefu indala, shinyala khusalilitsa mwana wu Mwami Daudi tawe. Khutsi voosi khwahulila Mwami Daudi, navoolelanga yivi, Abishai nende Itahi, ‘Muvuli khusalilitsakhu mwana wi shiyayi Abisolomu, shichila inzi.’ 13Navutswa niiva shinakhalondi malako ku Mwami Daudi, nu khwiira Abisolomu, Mwami Daudi yakhahulili makhuva kenako -- ahulilanga makhuva khulondokhana khu shia shindu shiosi -- khandi wakhavele ihale wene khurula khwinzi.”
14Yohabu yamuvoolela, “Shinyala khumalila vwiyangu vwanje khu yivi tawe.” Yavukula marimu kavaka, nalivira mu shiliru shia Abisolomu nashili mwoyo, niyeleli mu musala ku museno. 15Nalwo lwa vasikali likhomi khu vasikali vachinjilanga Yohabu viuchi, vavotokhana Abisolomu, nivamurumula nu khumwiira.
16Khulwa yako, Yohabu yakhuva shisiliva; ma vasikali veve nivalekha khuhitsanyinya Vaisraeli; shichila Yohabu neye wavikalila. 17Vavukula mmbili kwa Abisolomu, nivakusiuva mu vwina vuraambi vwene, vwali nuvuli mu muliru. Vavukhunikha na machina makali kene manyishi. Vaisraeli voosi vilukha nivatsia ingo wavo wa varulanga vene.
18Lwa Abisolomu yali nashili mwoyo, yali wayumbakha mwene lichina lielie liu khwitsushitsilakhu mu Luhoongo lu Mwami Daudi. Yakanakana navoola, “Mbulakhu mwana wa nivula unyala khungulikha, nimali khukhutsa.” Yakulikha lichina lienelo “Lichina lia Abisolomu liu Khwitsushitsilakhu”; khandi nalio lira lialio nunundi.
Daudi Yikhula Abisolomu
19Nalwo lwa Ahimaazi mwana wa Zadoko yavoolela Yohabu, “Lekha nzilukhache, khutsia khuvoolela Mwami Daudi makhuva macheni ndi Mwami Nyasaye, umali khumuhonyinya khurula khu vatsiku veve.”
20Yohabu yamuvoolela, “Shikali kario tawe! Lekha khutsia khumuvoolela makhuva macheni nunundi. Ulatsia khumuvoolela isaa yindi; navutswa lekha khutsia khumuvoolela nunundi, shichila mwana wi shiyayi wu Mwami Daudi, umali khukhutsa.” 21Yohabu yavoolela murukwa wewe Muetsopia, “Simukha utsi khuvoolela Mwami Daudi ka uloli mwene.” Murukwa Muetsopia mwenoyo yinamila Yohabu natsia vwangu.
22Navutswa Ahimaazi mwana wa Zadoko yavoolela Yohabu, “Mbulakhu lia mbendelanga mwoyo, linyala khwikholekha; nuyaanza lekha khali inzi nzilukhache, nonde Muetsopia munyuma.”
Yohabu yamureeva, “Mwana wanje, shichila shina wenyanga khutsia? Shindu shivulakhuho shiutsitsanga khunyola nukhola ndio.”
23Ahimaazi yamuvoolela khandi, “Khali shina shikholeshe, khutukha nzi.”
Yohabu yavoola, “Simukha utsi.” Ahimaazi yakholomoshela khu muhaanda kukhalakanyanga mu Luhoongo lwa Yorodani; niyilukhaka nava imbeli wu Muetsopia mwenoyo.
24Lwa Daudi yali niyikhale hakari hi shilivwa shiu mukari nende ilwanyi, mundu walindanga havundu henaho, yasimukha nanina ikulu wi shilivwa shiali nishili himbi khu lisisi. Lwa yaheenza ilwanyi, yalola mundu musatsa nali khunjila, yilukhakanga wonyene. 25Mundu walindanga havundu henaho, yikha hasi navoolela Mwami Daudi; Mwami Daudi navoola, “Niiva ali wonyene, aleranga makhuva malahi.” Khulwa yako, mundu mwenoyo yilukhaka khali nava himbi khutukhaho.
26Mundu walindanga havundu henaho, yalola khandi mundu wundi nali khunjila yilukhakanga wonyene, navoolela mulindi wi shilivwa, “Lola! Mundu wundi ali khunjila yilukhakanga wonyene!”
Mwami Daudi yamuvoolela, “Khali ye anyala khuva aleranga makhuva malahi.”
27Mundu walindanga havundu henaho yavoola, “Sasanyinyanga mwilukhachi wu khuraanga woyo khu Ahimaazi mwana wa Zadoko, shichila nindio khandi yilukhakanga.”
28Ahimaazi yalaanga Mwami Daudi, niyisiuva mwene hasi khumwinamila; navoola, “Yivi mwami, witsominyi Mwami Nyasaye, uli Nyasaye wowo, lwa akhuheele tsingulu tsiu khukuura vatsiku vovo.”
29Mwami Daudi yareeva, “Mwana muvukha Abisolomu anyala khuva nu mulamu?”
Ahimaazi yamuchipa, “Lwa Yohabu yaruma murumishi wowo mwene nende inzi, nalola shituma shia vandu, nivalombanga liyooko. Navutswa shinyala khumanya shindu shiosi, khulondokhana khu kikholekhanga tawe.”
30Mwami Daudi yamuvoolela, “Sinjila yeyo.” Yarulaho natsia khusinjilayo.
31Nalwo lwa Muetsopia mwenoyo yatukhaho, navoolela Mwami Daudi, “Yivi mwami, nunundi ndi na makhuva malahi ku khukhuvoolela! Mwami Nyasaye umali khukhuhonyinya nunundi, khurula khu yavo voosi vakhuhinjitsanga yivi!”
32Mwami Daudi yareeva Muetsopia, “Mwana muvukha Abisolomu anyala khuva nu mulamu?”
Muetsopia mwenoyo yamuchipa, “Yivi mwami, kakholeshe khuye kaliitsa khwikholekha khu vatsiku vovo voosi, khandi khu yavo voosi vakhuhinjitsanga.”
33Mwami Daudi yavelela muno mu mwoyo kwekwe. Yanina ikulu khutsia munzu ili mu vwinjililu vwi shilivwa ikulu, natsia khulililayo. Lwa yali natsitsanga, yalilanga tsikhwili, navoola, “Mwana wanje Abisolomu! Mwana wanje Abisolomu! Abisolomu, mwana wanje! Yivi mwana wanje, vwakhavele vulahi mbe ninakhutsa havukono hoho!”
© The Bible Society of Kenya, 2013