Rome iriniwok 7
7
Aiamihe nipowiwin e kanawapatcikatek
1Niwitcicanak, ki kiskeritenawatake ohwe minawatc ke iteian, aci meka wewerita e kiskeritamekw aiamihe irakonikewin. Acteriw iriniw kitci nosanetatc irakonikewiniw irikik tepirak ke pimatisitc. 2Mitowi ohwe ka itasinatek: iskwew e nipowitc patoc acteriw mocak kitci witci tacikematc onapema mekwata e pimatisiritci. Aric niporitena, nama aci apataniw aniheriw irakonikewiniw. 3Kecpin kiapatc e pimatisiritci anihi onapema, e nta witci tacikematc kotakihi iriniwa, pacikwatisiwinik ici pimatisiw. Aric kecpin e niporitci onapema, aci pakitinakaniwiw, nama awocamec tiperitakosiw aiamihe irakonikewinik itekera. Matci kata ki aiamihe nipowiw kotakihi iriniwa, namaiew ohwe pacikwatisiwin.
4Ekoni peikon e icinakok kirawaw otci, niwitcicanak. Nama aci ki tiperitakosinawaw aiamihe irakonikewinik itekera. Ka nipotc Krist, mia mitowi e ki nipoekw kitcitcakociwak itekera, meckotc tca kitci tiperimitakw wir ka ki apitcipahakaniwiritci, kitci ki tca miro totamokw e ici nataweritak Kice Manito. 5Epwamoci kiskerimokw Cecoc, ki ki pimatisitano kitci mireritamihitisoikw kotc e ici nataweritcikatek ko owiawinak itekera. Ka petamokw aiamihe irakonikewin, ki ki nataweritetano kitci matci totamokw. Ani e itatisiikopanen, ki ki kackitamatisonano kitci nipoikw. 6Aric anotc aci ki wikotcihikowinano neta irakonikewinik, aci meka e ki nipoikw anihe otci ka ki tiperimikoikw. Ekoni tca ke ki otci atoskectawokw Kice Manito, e wapatahitokw Miro Manito ke totamokw. Nama aci ki ka atoskectawano weckatc ka ki pe ici atoskectawokw mekwata ka pe tiperimikoikw neta aiamihe irakonikewinik ka ki itasinatek.
Aiamihe irakonikewin kirika pactatowin
7Tan ke iteikw? Aiamihe irakonikewin ia ni ka itotiskemakak kitci pactatinaniwok? Nama nte icinakon! E tapwataman irakonikewin, ekoni ka otci kiskeritaman kekwan ni pactatowin. Nama meka ni ta ki otci kiskeritetai e maratak kitci nataweritaman kekocic kotak awik e ici tatak, kecpin aka ki otci arimotcikatek neta irakonikewinik:
“Nama ki ka pameritamwaw kekociciriw e ici tatak kiwitc iriniw.” Exode 20.17; Deutéronome 5.21
8Ka ickwa kiskeritaman anihe irakonikewin, mia pactatowin e ki otamiromakak nitehik kirawe kitci nataweritamwan niwitc iriniw e ici tatak. Aka meka e kiskeritcikatek irakonikewin, pactatowin nama pimatisimakan pitc otehinak.
9Weckatc epwamoci kiskeritaman aiamihe irakonikewin, nama takonopan ke ki ici arimeritamihikoan. Aric ani apitc ka nisitotaman irakonikewin, mia e ki nitawikik pactatowin nitehik. 10Mia e ki nipoan nit iteritakositai. Ki pakitinikatew anihe aiamihe irakonikewin kitci witcihikoian e pimatisian, aric kirawe nin otci, aiamihewinik itekera nipowinik ni ki iciwirikon. 11Ka ickwa kiskeritaman anihe irakonikewin, mia e ki wiecimikoan pactatowin, kirawe tca e ki otamiromakak pitc nitehik, nac kitci nipahikoan.
12Tapwe icinakon ohwe: aiamihe irakonikewin Kice Manitok otciparin. Tato nta e tatiki, Kice Manitok otciparin, icikowisk icinakok, kaie mirwacin. 13Ni ki nipahikon ia miro kekocic? Nama nte icinakon! Pactatowin meka ka ki itotiskemakak! Ni ki peten irakonikewin ka mirwacik, nama aric ni ki otci nosanetan. Ekoni wetci ki pactatian kirika ki nipoain. Ekoni wetci kiskeritakok tan mia e icinakok pactatowin. Anihe irakonikewin wapatahiwemakan e matci itatisiikw kecpin e pactatiikw.
Iriniwok ka tiperimikotcik pactatowiniw
14Ki kiskeritenano aiamihe irakonikewin Kice Manitok e otciparik. Aric nin nama ni sapin, tepirak e iriniwian, mia arotakan e iteritakosian, pactatowin e atoskectaman. 15Nama ni nisitoten wetci ki totaman anihe ka totaman. Nama meka ni toten e ici nataweritamapan kitci totaman, aric ni toten aka e ici sakitaian. 16Kecpin tca e totaman anihe mia aka e ici nataweritaman kitci totaman, ni wapatahiwan e nisitowinaman e mirwacik irakonikewin. 17Namaiew tca nin tipirawe ka totaman. Pactatowin nitehik ka tiperimikoan ka itotiskemakak. 18Ni kiskeriten meka aka e takok ka mirwacik pitc nitehik, ni wi itwan kotc e icinakosian e iriniwian. Pitc nitehik ni nataweriten kitci miro totaman, nama aric ni kackitan kitci itotiskeian. 19Nama meka ni toten anihe ka mirwacik e ici nataweritaman. Aric mocak ni toten ka maratak aka ka ici nataweritaman. 20Kecpin tca totamane aka ka nataweritaman kitci totaman, namaiew aci nin ka totaman. Pactatowin nitehik ka itotiskemakak.
21Enko ohwe mocak ka isparian: apitc e wi totaman ka mirwacik, ni toten mocak ka maratak. 22Pitc nitehik tapwe ni naheritamwan Kice Manito otirakonikewin.#7.22 Pot wi itemakanotake: ni nataweriten kitci nosanetaian Kice Manito otirakonikewin. 23Aric takon kiapatc kotak irakonikewin ka icinikatek pactatowin, mocak e otamiromakak niwiawik. Macikam e ici naheritamwak. Ekota ni wetciparik pactatowin e tiperimikoan. 24Ni micta arimisin! Awin ke pe nta wikotcihitc, aka kitci atameritakosian aniheriw otci nitehik e icinakosiwak ka otcipitikoian nipowinik? 25Mirwatcimatan Kice Manito, e ki pe iciticohwatc anihi Ka Tiperimitokw Cecoca kitci pe nta wikotcihimitokw!
Ekoni tca wetci iteian anihe e icinakok: nimitoneritcikanik ni wi atoskectawaw Kice Manito e nosanetaian otirakonikewin, aric aka e sapian e iriniwian notc ni tiperitakosin pactatowinik.
Canadian Bible Society, 2014