Rome iriniwok 6
6
Mia e nipoikw e iteritakosiikw e pactatiikw, aric ki koski pimatisinano e nosanehokw Cecoc
1Tan ke iteikw? Kiapatc ia ki ta pactatinano, awocamec kitci ki miritokw Kice Manito omirotehewin? 2Nama nte icinakon! Pactatowin nama kata kackitamakanopan kitci tiperimikoikw, tarasak ki ki niponawaw pactatowinik. Nama awocamec ki ka ki pimatisinano pactatowinik. 3Ki kiskeritenawatake, kaskina e taciikw ki ki sikahatasonano kitci ki mamweritakosiikw kirika Cecoc Krist. E ki nipotc, mia peikon kaie kirano e ki nipoikw. 4Ka sikahatasoikw, mia peikon e ki rikwaskatikoikw kirika wir, tapickotc kitci nipoikw kirika wir, minawatc kitci ki ocki pimatisiikw, mitowi Cecoc Krist e ki apitcipahikotc Kotawino omackawisiwin e icperitakonik e ki apatcitaritci.
5Kecpin meka tapwe ki mirikoikw kitci mamweritakosiikw kirika Cecoc, e ki nipoikw mia mitowi wir ka nipotc, peikon otcitakotc ki ta mamweritakositano kirika wir, e ki apitcipaikw, mia mitowi wir ka ki apitcipatc. 6Ki kiskeritenano ohwe: epwamoci kiskerimokw Cecoc, pactati iriniwok kit iteritakositano. Aric tarasak e itatisiikopanen ki tcictaskowateriw tcipaiatikok kirika wir Cecoc ka tcictaskowatakaniwitc, kitci ki tca nipatakaniwok anihe matci itatisiwin notc ka nosanetakaniwok, aka tca kaie awocamec pactatowin kitci tiperimikoikw. 7Awik meka e nipotc, pakitiniko pactatowiniw, aka awocamec kitci tiperimikotc. 8Kecpin ki nipoikw kirika Krist, kit tapweritenano kitci pimatisiikw kirika wir. 9Ki kiskeritenano nama awocamec kata nipo Krist esko ka apitcipatc. Nama awocamec kata ki cakotcihiko nipowiniw. 10Apitc ka nipotc, ki totam aka wiskat awocamec kitci cakotcihikotc pactatowiniw, tipipariniw peikwaw e ki nipotc. Aci anotc e ki apitcipatc, pimatisiw Kice Manitowa otci. 11Peikon kaie kirawaw, ki ka iterimitisonawaw e ki nipoekw pactatowinik itekera, kaie e pimatisiekw Kice Manito otci, e mamweritakosiekw kirika Cecoc Krist.
12Aka pakitinamokw pactatowin kitci tiperimikoekw, kaskina tca e aitotamekw, aka kitci totamekw ka ici nataweritamekw kiwiawiwak e nipomakak. 13Aka pakitinamokw wawatc peikw nta e tatik e owiawiekw kitci ici tiperimikoiekw pactatowin, kitci matci totamekw. Aric ki ka pakitinenawaw kipimatisiwiniwaw Kice Manito otci, e kiskeritamekw mia peikon e ki nipoekw, aci tca anotc e koski pimatisiekw. Kirika tekaci ki ka pakiterimitisonawaw kitci atoskectawekw, kitci ki tca mirwapatcitaiekw kipimatisiwiniwaw, icikowisk kitci totamekw. 14Nama tca aci ki ka tiperimikonano pactatowin, aka aci e tiperimikoekw aiamihe irakonikewin, wir tca tipirawe Kice Manito omirotehewin e tiperimikoekw.
Icikowisk kitci itatisiikw
15Pot awik kata iteritamopan ohweriw: “Ki ka nta pactatinano osam aka awocamec e tiperimikoikw aiamihe irakonikewin, aric ma Kice Manito omirotehewin e tiperimikoikw.” Nama ketcinatc! 16Ki kiskeritenawatake, kecpin e pakiterimitisoekw kitci nta atoskectawekw awik, patoc ki ka natotawaw ke ititakw, mia arotakanak kitci iterimitakw, ki tiperimikowaw anahwe ka natotawekw. Kecpin tca e natotamekw pactatowin, ki tiperimikowaw. Nipowinik tca iticimon anihe meskanaw. Kecpin aric natotawekwe Kice Manito, pakitinekwe wir tipirawe kitci tiperimitakw, icikowisk ki ka ici pimatisinawaw. 17Mirwatcimatan Kice Manito ohweriw otci, aci tekaci e irikokoteheiekw e natotamekw anihe kiskinohamakewin ka ki pe otitikoiekw, misawatc weckatc e ki tiperitakosiekw pactatowinik. 18Ki ki wikotcihikowinawaw e tiperitakosiekopanen pactatowinik. Anotc aci tekaci ki pakitickatamowaw Kice Manito kitci tiperimitakw, icikowisk kitci ici pimatisiekw. 19Wetci ici arimweian, e arimotaman e tiperitakosinaniwok, kitci ki witcihitakok kitci nisitotamekw, osam aka e mackawisiekw kitci nisitotamekw. Weckatc kaskina wiec ki ki pakitickatenawaw kiwiawiwaw kitci nosanetaiekw matci pimatisiwin kirika eckam ki ki iti matci totenawaw e wi cakotcihekopanen Kice Manito. Aci aric anotc pakitickatamakw Kice Manito kitci tiperimitakw, kitci totamekw icikowisk ka icinakok, tekaci kitci ki itatisiekw kotc e ici nataweritak.
20Mekwata ka tiperimikoekw pactatowin, nama ki ki otci kackitanawaw icikowisk kitci pimatisiekw. 21Anotc ki waneritenawaw kaskina ka ki ici pa aitotamekw. Tekaci nama ki ki otci witcihikonawaw! Nipowinik iticimon anihe ka ki pe aitotcikatek! 22Aric ki ki wikotcihikowinawaw pactatowinik e tiperitakosiekopanen kirika Kice Manito kit atoskectawaw, wir e tiperimitakw. Mictahi ki witcihikowaw kitci ici pimatisiekw kotc e ici nataweritak. Nikotin e kicikak ki ka mirikowinawaw kakike pimatisiwin. 23Kecpin awik atoskectake pactatowiniw, kackitamatiso kitci nipotc. Aric Kice Manito cawerimew kaskina awiriw ka witcewaritci kirika anihi Ka Tiperimitokw Cecoca, e miratc kakike pimatisiwiniw, aka e petatc kitci koski mirakaniwitc kekwariw.
Canadian Bible Society, 2014