អេសាយ 8
8
ពាក្យព្យាករស្ដីអំពីការឈ្លានពានរបស់អាស្ស៊ីរី
1ព្រះយេហូវ៉ាមានបន្ទូលនឹងខ្ញុំថា៖ “ចូរយកបន្ទះធំមួយ ហើយសរសេរនៅលើបន្ទះនោះជាអក្សរសាមញ្ញ#8:1 អក្សរសាមញ្ញ―ន័យត្រង់គឺ “ប៉ាកការបស់មនុស្ស”។ថា ‘ម៉ាហេ-សាឡាល-ហាសបាស#8:1 ម៉ាហេ-សាឡាល-ហាសបាស―ន័យត្រង់គឺ “ការរឹបអូសនឹងមកយ៉ាងឆាប់ ការចាប់រំពានឹងមកយ៉ាងលឿន”។’។ 2យើងនឹងយកសាក្សីស្មោះត្រង់ឲ្យធ្វើបន្ទាល់សម្រាប់យើង គឺបូជាចារ្យអ៊ូរី និងសាការីកូនរបស់យេបេរេគា”។
3បន្ទាប់មក ខ្ញុំបានចូលទៅឯព្យាការិនី ហើយនាងក៏មានផ្ទៃពោះ រួចបង្កើតបានកូនប្រុសម្នាក់ នោះព្រះយេហូវ៉ាមានបន្ទូលនឹងខ្ញុំថា៖ “ចូរដាក់ឈ្មោះកូននេះថា ម៉ាហេ-សាឡាល-ហាសបាស 4ដ្បិតមុនក្មេងនេះចេះហៅថា ‘ឪពុក’ ឬ ‘ម្ដាយ’ ទ្រព្យសម្បត្តិរបស់ដាម៉ាស់ និងជ័យភណ្ឌរបស់សាម៉ារីនឹងត្រូវគេយកទៅនៅចំពោះស្ដេចអាស្ស៊ីរី”។
5ព្រះយេហូវ៉ាមានបន្ទូលនឹងខ្ញុំថែមទៀតថា៖
6“ដោយព្រោះប្រជាជននេះបានបដិសេធទឹកស៊ីឡូអាដែលហូរគ្រឿនៗ
ហើយរីករាយនឹងរេស៊ីន និងកូនរបស់រេម៉ាលាវិញ
7ដូច្នេះ មើល៍! ព្រះអម្ចាស់នឹងធ្វើឲ្យទឹកទន្លេអ៊ើប្រាតដ៏ខ្លាំងក្លា ហើយច្រើន ឡើងមកគ្របលើពួកគេ
គឺស្ដេចអាស្ស៊ីរី និងអស់ទាំងសិរីរុងរឿងរបស់ទ្រង់។
ទឹកទន្លេនោះនឹងឡើងមកគ្របលើអស់ទាំងប្រឡាយរបស់ពួកគេ
ហើយហូរមកលើអស់ទាំងច្រាំងរបស់ពួកគេ
8រួចវានឹងគំហុកទៅក្នុងយូដា ព្រមទាំងជន់លិច ហើយហូរកាត់ ក៏ឡើងរហូតដល់ក។
អេម៉ាញូអែលអើយ ស្លាបដែលលាតសន្ធឹងរបស់វា នឹងបានពេញទទឹងរបស់ទឹកដីអ្នក!#8:8 អេម៉ាញូអែលអើយ ស្លាបដែលលាតសន្ធឹងរបស់វា នឹងបានពេញទទឹងរបស់ទឹកដីអ្នក!―ឬ “ប៉ុន្តែព្រះគង់នៅជាមួយយើង ស្លាបដែលលាតសន្ធឹងរបស់ព្រះអង្គ នឹងបានពេញទទឹងរបស់ទឹកដីអ្នក”។”។
9ប្រជាជាតិនានាអើយ ចូរឲ្យត្រូវបានបំបែក#8:9 ចូរឲ្យត្រូវបានបំបែក―ឬ “ចូររួមគ្នា”។ ហើយត្រូវបានវាយកម្ទេចចុះ!
អស់អ្នកពីស្រុកឆ្ងាយអើយ ចូរផ្ទៀងត្រចៀកស្ដាប់ចុះ!
ចូរក្រវាត់ខ្លួន ប៉ុន្តែត្រូវបានវាយកម្ទេចវិញ
ចូរក្រវាត់ខ្លួន ប៉ុន្តែត្រូវបានវាយកម្ទេចវិញ!
10ចូរពិគ្រោះគ្នារៀបផែនការចុះ ប៉ុន្តែវានឹងបរាជ័យ
ចូរពោលពាក្យសម្ដីចុះ ប៉ុន្តែវានឹងមិនកើតឡើងឡើយ
ដ្បិតព្រះគង់នៅជាមួយយើង។
ព្រះយេហូវ៉ានៃពលបរិវារជាជម្រកតែមួយគត់
11ព្រះយេហូវ៉ាបានមានបន្ទូលដូច្នេះនឹងខ្ញុំ ដោយព្រះហស្តដ៏មានព្រះចេស្ដា ហើយព្រះអង្គក៏បង្គាប់ខ្ញុំមិនឲ្យដើរក្នុងផ្លូវរបស់ប្រជាជននេះ ដោយថា៖
12“កុំហៅថាការឃុបឃិត ចំពោះអ្វីដែលប្រជាជននេះហៅថាការឃុបឃិតនោះឡើយ។
កុំខ្លាចអ្វីដែលគេភ័យខ្លាចនោះឡើយ
ហើយក៏កុំតក់ស្លុតដែរ។
13គឺព្រះយេហូវ៉ានៃពលបរិវារហើយ ដែលអ្នករាល់គ្នាចាត់ទុកជាវិសុទ្ធ។
គឺព្រះអង្គជាទីភ័យខ្លាចរបស់អ្នករាល់គ្នា
ហើយគឺព្រះអង្គជាទីតក់ស្លុតរបស់អ្នករាល់គ្នាដែរ។
14ព្រះអង្គនឹងធ្វើជាទីវិសុទ្ធ
ប៉ុន្តែចំពោះវង្សត្រកូលអ៊ីស្រាអែលទាំងពីរ ព្រះអង្គនឹងធ្វើជាថ្មនៃការជំពប់ និងជាថ្មដានៃសេចក្ដីបណ្ដាលឲ្យជំពប់ដួល;
ចំពោះអ្នកដែលរស់នៅយេរូសាឡិម ព្រះអង្គនឹងធ្វើជាអង្គប់ និងជាអន្ទាក់ផង។
15មនុស្សជាច្រើននឹងជំពប់នឹងថ្មនោះ
ក៏ដួល ហើយបាក់បែកទៅ
ពួកគេនឹងជាប់អន្ទាក់ ហើយត្រូវបានចាប់ផង”។
16ចូរចងសេចក្ដីបង្គាប់ទុក ហើយបិទត្រាក្រឹត្យវិន័យ
នៅក្នុងពួកសិស្សរបស់យើង។
17ខ្ញុំនឹងរង់ចាំព្រះយេហូវ៉ាដែលលាក់ព្រះភក្ត្ររបស់ព្រះអង្គពីវង្សត្រកូលយ៉ាកុប
ខ្ញុំនឹងរំពឹងមើលទៅព្រះអង្គ!
18មើល៍! ខ្ញុំ និងកូនៗ ដែលព្រះយេហូវ៉ាបានប្រទានមកខ្ញុំ ជាទីសម្គាល់ និងជាការអស្ចារ្យនៅក្នុងអ៊ីស្រាអែល គឺមកពីព្រះយេហូវ៉ានៃពលបរិវារដែលគង់នៅភ្នំស៊ីយ៉ូន។ 19កាលណាគេនិយាយនឹងអ្នករាល់គ្នាថា៖ “ចូរសួររកពួកគ្រូអន្ទងខ្មោច និងពួកគ្រូខាបព្រលឹង ដែលពោលប៉ប៉ាច់ប៉ប៉ោច និងពោលអេចអូច” នោះតើមិនគួរឲ្យប្រជាជនសួររកព្រះរបស់ខ្លួនវិញទេឬ? តើរកមនុស្សស្លាប់ជំនួសមនុស្សរស់ធ្វើអី? 20ចូរទៅរកក្រឹត្យវិន័យ និងសេចក្ដីបង្គាប់! ប្រសិនបើគេមិននិយាយស្របតាមពាក្យនេះទេ នោះគ្មានពន្លឺអរុណនៅក្នុងខ្លួនគេឡើយ។
21ពួកគេនឹងឆ្លងកាត់ស្រុក ទាំងមានទុក្ខវេទនា និងអត់ឃ្លាន។ កាលណាពួកគេអត់ឃ្លាន ពួកគេនឹងខឹង ហើយប្រទេចផ្ដាសាទាំងស្ដេចរបស់ខ្លួន និងព្រះរបស់ខ្លួន ដោយមើលទៅលើ 22រួចពួកគេមើលទៅផែនដីវិញ នោះមើល៍! មានតែទុក្ខវេទនា សេចក្ដីងងឹត និងភាពខ្មៅងងឹតនៃទុក្ខព្រួយ! ហើយពួកគេនឹងត្រូវបានបណ្ដេញទៅក្នុងភាពងងឹតសូន្យ៕
Trenutno izabrano:
អេសាយ 8: GKHB
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
GLOBAL KHMER BIBLE©
Copyright © 2023 by Global Bible Initiative